ខេត្តបាត់ដំបង ៖ សេចក្តីរាយការណ៍បន្ថែមជុំវិញករណីជនមិនស្គាល់មុខជិះរថយន្ត MAZDA ទៅគប់កញ្ចក់ឃ្លាំងរថយន្តក្រុមហ៊ុនតូយ៉ូតា ក្រោយពីធ្វើការស្រាវជ្រាវពីកម្លាំងនគរបាលក្រុងបាត់ដំបង និងកម្លាំងជំនាញនៃស្នងការខេត្ត គឺគិតនៅត្រឹមម៉ោង៩ព្រឹកថ្ងៃទី១៥ ធ្នូ នេះ បានឈានដល់ការឃាត់ខ្លួនជនបង្កម្នាក់។
សេចក្តីរាយការណ៍បន្តថា ជនសង្ស័យខាងលើ ឈ្មោះពៅ ចំណាន អាយុ៣១ឆ្នាំ មានទីលំនៅក្នុងភូមិដង្កោទាប សង្កាត់ទូលតាឯក ក្រុងបាត់ដំបង ។ ជនសង្ស័យរូបនេះ គឺជាអតីតបុគ្គលិកក្រុមហ៊ុនលក់រថយន្តខាងលើនេះតែម្ដង ។
ប្រភពបន្តថា ក្នុងសកម្មភាពរបស់ជនសង្ស័យរូបនេះ គឺបានយកកែវទៅគប់លើជញ្ជាំងកញ្ចក់ឃ្លាំងរថយន្តនោះ ដោយត្រូវបានថតជាប់ក្នុងកាមេរ៉ាសុវត្ថិភាព ទើបសមត្ថកិច្ចងាយនឹងស្វែងរកជនសង្ស័យរហូតបានឃាត់ខ្លួននេះ ។
បន្ទាប់ពីឃាត់ខ្លួន ជនសង្ស័យបានសារភាពប្រាប់សមត្ថកិច្ចយ៉ាងខ្លីថា «ខ្លួនពិតជាបានយកកែវទៅគប់លើជញ្ជាំងកញ្ចក់ឃ្លាំងរថយន្តនោះមែន ដោយសារខឹងថៅកែបណ្ដេញខ្លួនចេញពីក្រុមហ៊ុន» ។ ទោះជាយ៉ាងណា ពេលនេះ មន្ត្រីជំនាញកំពុងសួរនាំជនសង្ស័យ ដើម្បីកសាងសំណុំរឿងបញ្ជូនទៅតុលាការហើយ ៕
គួររំលឹកថា ឃ្លាំងលក់រថយន្តមួយកន្លែង ស្ថិតនៅភូមិរំចេក៤ សង្កាត់រតន: ក្រុងបាត់ដំបង ជាប់ផ្លូវជាតិលេខ៥ នៅខាងមុខផ្លូវចូលផ្សារថ្មី ត្រូវជនមិនស្គាល់មុខជិះរថយន្តម៉ាកMAZDA ទៅឈប់ខាងមុខ រួចចុះទៅគប់បំបែកកញ្ចក់ឃ្លាំង បង្កឱ្យមានការភ្ញាក់ផ្អើលយ៉ាងខ្លាំង កាលពីវេលាម៉ោង០៩ និង២៧នាទីយប់ថ្ងៃទី១៤ ធ្នូ ដែលគេសង្ស័យថា អាចជារឿងគំនុំ ។
ចែករំលែកព័តមាននេះ