រាជធានីភ្នំពេញ ៖ សេចក្តីរាយការណ៍បឋមឱ្យដឹងថា មានហេតុការណ៍គ្រោះថ្នាក់ចរាចរណ៍ដ៏រន្ធត់បំផុត ដោយរថយន្តម៉ាកហ៊ីយ៉ាន់ដាយដឹកទំនិញធុនធំមួយគ្រឿង ខណៈបើកចុះពីលើស្ពានព្រែកសំរោង ដល់ចំណុចរង្វង់មូលរាងកោង ក៏បានជ្រុលបុកចូលទៅក្នុងដេប៉ូឈើមួយកន្លែង បណ្តាលឱ្យបុរសម្នាក់ដែលដេកយាមទីនោះស្លាប់យ៉ាងអាណោចអាធ័មបំផុត កើតឡើងកាលពីវេលាម៉ោង០២ចូលថ្ងៃទី១៥ ធ្នូ នេះ ស្ថិតនៅចំណុចរង្វង់មូលព្រែកសំរោង (ត្រើយខាងជើង) ក្នុងភូមិកោះក្របី សង្កាត់ព្រែកថ្មី ខណ្ឌច្បារអំពៅ ។
សេចក្តីរាយការណ៍បន្តថា បុរសដែលស្លាប់ខាងលើ មានឈ្មោះហ៊ន ហ៊ាន អាយុ៤៨ឆ្នាំ មានមុខរបរជាអ្នកបើករថយន្តឱ្យសាលាឯកជនមួយ និងជាអ្នករត់ម៉ូតូឌុបផងដែរ ប៉ុន្តែនៅពេលយប់គឺគាត់មកដេកយាមនៅដេប៉ូឈើនេះ ។ ជនរងគ្រោះ មានប្រពន្ធ និងកូនចំនួន៦នាក់ក្នុងបន្ទុក ។ ដោយឡែក ខាងភាគីរថយន្តបង្ក គឺត្រូវសមត្ថកិច្ចឃាត់ខ្លួនអ្នកបើកបរបញ្ជូនទៅស្នងការបាត់ រីឯព្រូ៣នាក់ទៀត មិនត្រូវបានឃាត់ខ្លួននោះទេ ។
អ្វីដែលគួរឱ្យខ្លោចចិត្តសម្រាប់ជនរងគ្រោះដែលស្លាប់ខាងលើនោះ គឺគាត់នឹងត្រូវរៀបការកូនស្រីនៅដើមខែក្រោយនេះហើយ ។ បើតាមការឱ្យដឹងពីអ្នកស្គាល់ជនរងគ្រោះថា ស្រណោះកាលពីប៉ុន្មានថ្ងៃមុន គាត់ (ជនរងគ្រោះ)បាននិយាយប្រាប់គេឯងថា «គាត់មានអារម្មណ៍អត់ស្រួលសោះ ខ្លាចតែមានឡានមកបុកគាត់ ពេលដេកទីនេះ ព្រោះមើលផ្លូវនោះកោងណាស់ ។
ករណីនេះ បានធ្វើឱ្យគេគ្រប់គ្នានិយាយថា ហាក់ដូចជាឱ្យប្រផ្នូលទៅដល់ជនរងគ្រោះបែបនោះ
ដែរ ។ ជាងនេះទៅទៀត ជនរងគ្រោះដែលស្លាប់ គឺជាជំហរគ្រួសារដ៏ធំម្នាក់ ហើយពេលនេះ គាត់បានបាត់បង់ជីវិត តើឱ្យគ្រួសារគាត់រំពឹងអ្នកណា?
ចែករំលែកព័តមាននេះ