បុរសម្នាក់ត្រូវពស់ពភ្លាក់ចឹក បណ្ដាលឲ្យរងរបួសធ្ងន់
- កំពង់ធំ
ខេត្តកំពង់ធំ ៖ ជនរងគ្រោះឈ្មោះ អុក សំអន ភេទប្រុស អាយុ៥២ឆ្នាំ រស់នៅភូមិជីឱក ឃុំរមណីយ ស្រុករវាង…
ខេត្តកំពង់ធំ ៖ ជនរងគ្រោះឈ្មោះ អុក សំអន ភេទប្រុស អាយុ៥២ឆ្នាំ រស់នៅភូមិជីឱក ឃុំរមណីយ ស្រុករវាង ខេត្តព្រះវិហារ បានប្រាប់ឲ្យកោះសន្តិភាពដឹងនៅព្រឹកថ្ងៃទី១៤ ខែធ្នូ ឆ្នាំ២០១៧នេះថា កាលពីយប់ថ្ងៃកើតហេតុខលើរូបគាត់ និងប្អូនប្រុសគាត់ម្នាក់ទៀតឈ្មោះ ហិត រស់ អាយុ៣៧ឆ្នាំ បានដើរតាមផ្លូវនៅខាងមុខផ្ទះ ខណៈកំពុងតែដើរតាមផ្លូវក៏ត្រូវបានពស់ពភ្លាក់ដំរីចឹកចំកែងជើងខាងស្តាំរបស់គាត់ ធ្វើឲ្យរូបគាត់ភ្ញាក់ព្រើតរួចក៏រលាស់ជើងរបូតពស់ចេញទៅ ហើយពស់ដដែលនេះក៏បានទៅខាំជើងប្អូនប្រុសគាត់ទៀត តែវាដឹងខ្លួនទាន់ ខាំភ្លាមក៏រលាស់ជើងរបូតពស់ភ្លាម ហើយក៏មិនធ្វើឲ្យវាមានរបួសធ្ងន់ធ្ងរនោះទេ។ ចំណែករូបគាត់បន្ទាប់ពីត្រូវពស់ខាំមកមានការឈឺចុកចាប់យ៉ាងខ្លាំង និងមានចេញឈាមតាមរោម តាមធ្មេញ តាមមាត់ហូរជោគខ្លួន ត្រូវបានសាច់ញាតិនាំទៅរកគ្រូខ្មែរមើលទាំងយប់ ដោយសារតែអាការៈមិនមានអន់ថយ ឈាមនៅតែហូរមិនឈប់ រំលង១ថ្ងៃក៏ត្រូវបានប្រពន្ធកូនដឹកមកសង្គ្រោះនៅមន្ទីរពេទ្យខេត្តកំពង់ធំ ពីព្រោះតែពីផ្ទះគាត់មកពេទ្យកំពង់ធំមានចម្ងាយជិតជាងទៅពេទ្យនៅឯខេត្តព្រះវិហារ ហើយអាការៈជំងឺរបស់លោកក៏បានធូរបន្តិច បន្ទាប់ពីមានការជួយសង្គ្រោះ និងដាក់ថ្នាំបន្សាបពិសពស់ពីក្រុមគ្រូពេទ្យមួយរយៈពេលមកនេះ។
ពាក់ព័ន្ធនឹងករណីខាងលើ លោកវេជ្ជបណ្ឌិត នួន វិជិត្រ អនុប្រធានមន្ទីរពេទ្យខេត្តកំពង់ធំ និងជាប្រធានផ្នែកវះកាត់ នៃសាលសង្គ្រោះបន្ទាន់ បានប្រាប់ កោះសន្តិភាព ឲ្យដឹងនៅថ្ងៃដដែលនេះថា ចំពោះអាការៈអ្នកជំងឺពស់ខាំដែលមានសភាពធ្ងន់ធ្ងរនេះ ដោយសារតែមូលហេតុថា នៅពេលដែលពស់ខាំភ្លាមៗសាច់ញាត់មិនបាននាំជនរងគ្រោះមកឲ្យជួយសង្គ្រោះនៅមន្ទីរពេទ្យភ្លាមៗនោះទេ រវល់តែទៅរកគ្រូខ្មែរ ទំរាំតែមកដល់ពេទ្យអ្នកជំងឺ មានសភាពធ្ងន់ធ្ងរទៅហើយ។ តែទោះជាយ៉ាងណាក្តីក៏លោកកំពុងតែតាមដានជំងឺនេះយ៉ាងយកចិត្តទុកដាក់ជានិច្ច។ លោកវេជ្ជបណ្ឌិតមានប្រសាសន៍បញ្ជាក់ថា ចំពោះបញ្ហាពិសពស់នេះវាចែកចេញជា២ប្រភេទដាច់ពីគ្នា ហើយនៅក្នុងចង្កូមរបស់ពស់វាអាចបញ្ចេញពិសឲ្យជ្រាបចូលទៅក្នុងសាច់របស់មនុស្សយើងបាន ប្រភេទទី១.គឺនៅពេលដែលពស់ចឹកឬខាំទៅលើមនុស្សយើង ឬក៏សត្វនោះ វាធ្វើឲ្យឈាមនៅក្នុងខ្លួនឡើងរាវ រួចហើយហូរចេញមកក្រៅគ្រប់កន្លែង និងធ្វើឲ្យបុខរបួសមានសភាពឈឺចាប់ខ្លាំង។
ជាក់ស្តែងដូចជាករណីបុរសឈ្មោះ អុក សំអន ខាងលើនេះជាដើម ប្រសិនណាជាក្រុមគ្រួសារមិនបានយកអ្នកជំងឺមកកាន់មន្ទីរពេទ្យឲ្យបានទាន់ពេលវេលាទេនោះ ជនរងគ្រោះអាចបណ្តាលឲ្យស្លាប់បាន និងប្រភេទទី២.នៅពេលដែលជនរងគ្រោះត្រូវពស់មានពិសចឹកឬខាំនោះ គឺពិសរបស់វាធ្វើឲ្យប៉ះពាល់ដល់ប្រព័ន្ធសរសៃរប្រសាទអាចបណ្តាលឲ្យអ្នកជំងឺគាំងបេះដូងស្លាប់បានដូចគ្នា។ ជាមួយគ្នានេះផងដែរ លោកវេជ្ជបណ្ឌិតក៏បានសំណូមពរដល់បងប្អូនប្រជាពលរដ្ឋថា នៅពេលដែលបងប្អូនជួបប្រទះនូវសត្វមានពិសទិច ឬក៏ខាំ ឬក៏វាចឹកក្តី សូមមេត្តាបញ្ជូនជនរងគ្រោះមកកាន់មន្ទីរពេទ្យឲ្យបានលឿនបំផុត ដើម្បីឲ្យក្រុមគ្រូពេទ្យជួយសង្គ្រោះអាយុជីវិតបានទាន់ពេលវេលា ពីព្រោះពេទ្យឥឡូវនេះវិទ្យាសាស្ត្រជឿនលឿនណាស់ និងមានសេរ៉ូម និងថ្នាំសម្រាប់បន្សាបជាតិពិសបានយ៉ាងពូកែស័ក្តិសិទ្ធណាស់។ សូមកុំពន្យាពេលទៅរកគ្រូខ្មែរឲ្យសោះ អាចបណ្តាលឲ្យជនរងគ្រោះមានគ្រោះថ្នាកដលជីវិតបាន៕
ចែករំលែកព័តមាននេះ