រាជធានីភ្នំពេញ ៖ លោកស្រី ប្រាក់ សម្ផស្ស អគ្គលេខាធិការសហព័ន្ធកីឡាទាញព្រ័ត្រកម្ពុជាបានមានប្រសាសន៍កាលពីពេលថ្មីៗកន្លងមកនេះថា សហព័ន្ធកីឡាទាញព្រ័ត្រកម្ពុជាត្រៀមបញ្ជូនអត្តពលិករបស់ខ្លួនចំនួន២ក្រុមដើម្បីទៅចូលរួមប្រកួតនៅក្នុងព្រឹត្តិការណ៍ធំ២នៅប្រទេសថៃគឺព្រឹត្តិការណ៍ប្រកួតជ្រើសរើសជើងឯកអាស៊ីលើកទី១១និងព្រឹត្តិការណ៍ប្រកួតជ្រើសរើសជើងឯកអាស៊ីអាគ្នេយ៍លើកទី២ ។ ២ក្រុមដែលត្រូវទៅចូលរួមប្រកួតគឺផ្នែកបុរសប្រភេទទម្ងន់៦០០គីឡូក្រាម និងផ្នែកនារីប្រភេទទម្ងន់៥០០គីឡូក្រាម ។
លោកស្រីបានឱ្យដឹងបន្ថែមថា ប្រតិភូកីឡាកម្ពុជានឹងធ្វើដំណើរតាមរថយន្តតាមច្រកទ្វារ
អន្តរជាតិប៉ោយប៉ែតនៅថ្ងៃទី១៧ ធ្នូ ខណៈការប្រកួតនឹងចាប់ផ្ដើមនៅថ្ងៃទី២០ ធ្នូ សម្រាប់ការប្រកួតជ្រើសរើសជើងឯកអាស៊ី និងថ្ងៃទី២១ធ្នូ សម្រាប់ការប្រកួតជ្រើសរើសជើងឯកអាស៊ីអាគ្នេយ៍ ។ លោកស្រីថា ដំបូងឡើយយើងមានគម្រោងបញ្ជូនតែមួយក្រុមប៉ុណ្ណោះទៅចូលរួមប្រកួតដោយសារតែយើងពុំមានថវិកាគ្រប់គ្រាន់ ។ ប៉ុន្តែក្រោយមកភាគីថៃដែលជាម្ចាស់ផ្ទះបានសម្រេចជួយរ៉ាប់រងទាំងអស់ទាំងការស្នាក់នៅ ហូបចុក ពីដើមដល់ចប់ ហេតុដូច្នេះហើយទើបយើងមានលទ្ធភាពទៅចូលរួមប្រកួតទាំង២ក្រុមតែម្ដង ។ មូលហេតុដែលសហព័ន្ធកីឡាទាញព្រ័ត្រថៃជួយដល់កម្ពុជាដោយសារតែគេមើលឃើញថា វិស័យកីឡាទាញព្រ័ត្រកម្ពុជាទើបតែមានការរីកចម្រើន ដូច្នេះហើយទើបគេសម្រេចចិត្តជួយដល់យើង ។
សហព័ន្ធកីឡាទាញព្រ័ត្រកម្ពុជាបង្កើតឡើងនៅក្នុងឆ្នាំ២០០៦ ។ ថ្វីដ្បិតតែសហព័ន្ធមួយនេះបង្កើតឡើងជាយូរមកហើយមែន ប៉ុន្តែការប្រកួតនៅពុំទាន់ទូលំទូលាយនៅឡើយទេ គឺបានត្រឹមតែប្រកួតជ្រើសរើសជើងឯកនៅតាមរោងចក្រសហគ្រាសប៉ុណ្ណោះ ។
ដោយឡែកនៅក្នុងឆ្នាំ២០១៧នេះ សហព័ន្ធបានរៀបចំឱ្យមានផែនការច្បាស់លាស់ និងទទួលបានការអនុញ្ញាតពីក្រសួងអប់រំ យុវជន និងកីឡា ប្រកួតជ្រើសរើសជើងឯកថ្នាក់ជាតិជាលើកដំបូង ហើយក៏ជាលើកទី១ផងដែរដែលកម្ពុជាយើងបានទៅចូលរួមប្រកួតនៅប្រទេសសិង្ហបុរីកាលពីប៉ុន្មានខែមុននេះ បើទោះជាយើងមិនទទួលបានលទ្ធផលល្អមែន តែយ៉ាងហោចណាស់ក៏យើងអាចទទួលបាននូវបទពិសោធន៍ល្អត្រឡប់មកវិញដែរ។ សព្វថ្ងៃនេះ ថ្វីដ្បិតតែយើងនៅមិនទាន់មានកីឡាករ-កីឡាការិនីជម្រើសជាតិមែន តែការហ្វឹកហាត់គឺធ្វើឡើងតាមបទបញ្ជានិងបច្ចេកទេសត្រឹមត្រូវរបស់សហព័ន្ធកីឡាទាញព្រ័ត្រអន្តរជាតិ ។ ដូច្នេះរហូតមកទល់នឹងពេលនេះ យើងមានធនធានកីឡាករ កីឡាការិនីគ្រប់គ្រាន់ហើយសម្រាប់បញ្ជូនទៅចូលរួមប្រកួតនៅក្រៅប្រទេស ៕
ចែករំលែកព័តមាននេះ