សហរដ្ឋអាមេរិក ៖ ម៉ាស៊ីនមានសមត្ថភាពខ្ពស់កំពុងតែផ្លាស់ប្តូរការផលិត ការសិក្សា និងការរស់នៅរបស់ពួកយើងនៅគ្រប់ទីកន្លែងលើពិភពលោក ។ ស្ទើរតែគ្រប់ផ្នែកនៃសេដ្ឋកិច្ចរបស់យើង នឹងមានការផ្លាស់ប្តូរយ៉ាងខ្លាំងក្លា ។ ក្រុមហ៊ុនភស្តុភារធំៗ…
សហរដ្ឋអាមេរិក ៖ ម៉ាស៊ីនមានសមត្ថភាពខ្ពស់កំពុងតែផ្លាស់ប្តូរការផលិត ការសិក្សា និងការរស់នៅរបស់ពួកយើងនៅគ្រប់ទីកន្លែងលើពិភពលោក ។ ស្ទើរតែគ្រប់ផ្នែកនៃសេដ្ឋកិច្ចរបស់យើង នឹងមានការផ្លាស់ប្តូរយ៉ាងខ្លាំងក្លា ។
ក្រុមហ៊ុនភស្តុភារធំៗ រួមជាមួយអ្នកបើកបរផ្សេងៗកំពុងតែប្រើប្រាស់បច្ចេកវិទ្យាសម្រាប់ការបើកបររបស់ខ្លួន ។ ក្រុមហ៊ុនដូចជា BMW និង Tesla បានចេញបច្ចេកវិទ្យាបើកបរដោយស្វ័យប្រវត្តិសម្រាប់យានយន្តទៅហើយ ។
ក្រុមហ៊ុន Associated Press ក៏បានប្រើប្រាស់បច្ចេកវិទ្យា Artificial Intelligence (AI) ដើម្បីសរសេរព័ត៌មានផងដែរ ។ ម៉ាស៊ីនព្រីន 3D ត្រូវបានប្រើប្រាស់ដើម្បីផលិតគ្រឿងម៉ាស៊ីនទៀតផង ។
បច្ចេកវិទ្យាថ្មីៗទាំងនេះធានាថា នឹងជំរុញដល់ផ្នែកផលិតកម្មឲ្យកាន់តែខ្លាំងឡើង ផ្តល់ប្រសិទ្ធភាពកាន់តែខ្ពស់ មានសុវត្ថិភាព អាចបត់បែន និងងាយស្រួលកាន់តែខ្ពស់ឡើង។ ប៉ុន្តែវាក៏ផ្តល់ភាពភ័យខ្លាចដល់ការប៉ះពាល់ទៅលើការងារ ជំនាញ និងប្រាក់បៀវត្សរ៍របស់មនុស្សផងដែរ ។
ការសិក្សារបស់លោក Carl Frey និង Michael Osborne មកពីសាកលវិទ្យាល័យ University of Oxford និងមួយទៀតរបស់វិទ្យាស្ថាន McKinsey Global Institute (MGI) ឲ្យដឹងថា ការងារភាគច្រើនក្នុងប្រទេសកំពុងអភិវឌ្ឍន៍ និងប្រទេសអភិវឌ្ឍន៍ អាចនឹងផ្លាស់ប្តូរពីការប្រើប្រាស់មនុស្សទៅប្រើប្រាស់បច្ចេកវិទ្យា និងម៉ាស៊ីនវិញ ។
តាមរយៈបទពិសោធន៍ដែលធ្លាប់កើតមានឡើងពីអតីតកាល ការសិក្សាបានប្រទះឃើញនាពេលអនាគត គឺការផ្លាស់ប្តូរបច្ចេកវិទ្យាអាចនឹងជំរុញដល់ការផលិត និងការលូតលាស់ប្រាក់ចំណូល ក៏ដូចជាជំរុញដល់តម្រូវការពលកម្ម ។ តម្រូវការផលិតផល និងសេវាកម្ម ក៏នឹងកើនឡើងផងដែរ ព្រោះតម្លៃនឹងធ្លាក់ចុះធ្វើឲ្យគុណភាពកើនឡើង ។ ជាមួយគ្នានេះ ការងារថ្មីៗនឹងត្រូវបានបង្កើតឡើង ។
ការសិក្សារបស់ MGI ឲ្យដឹងថា ប្រសិនបើល្បឿននៃការផ្លាស់ប្តូរទៅប្រើប្រាស់បច្ចេកវិទ្យា និងម៉ាស៊ីនអាចរក្សាក្នុងកម្រិតមធ្យមនោះ ១៥%នៃពលករទាំងអស់ក្នុងពិភពលោក ឬ៤០០លាននាក់ នឹងបាត់បង់ការងារក្នុងរយៈពេលពីបច្ចុប្បន្ន រហូតដល់ឆ្នាំ២០៣០ ។
ប៉ុន្តែដោយសារតម្រូវការផលិតផល និងសេវាកម្មកើនឡើង ការវិនិយោគលើហេដ្ឋារចនាសម្ព័ន្ធ ប្រសិទ្ធភាពនៃការប្រើប្រាស់ថាមពល និងថាមពលបៃតង គឺការងារថ្មីៗនឹងបង្កើតឡើងដើម្បីជំនួសការងារបាត់បង់ ។ ប៉ុន្តែការងារថ្មីៗនេះអាចនឹងខុសប្លែកពីការងារចាស់យ៉ាងខ្លាំង ដែលធ្វើឲ្យត្រូវការចំណាយច្រើនសម្រាប់ការផ្លាស់ប្តូរនេះ ។
ពលករប្រមាណពី៧៥ ទៅ៣៧៥លាននាក់ ឬ៣ទៅ១៤%នៃពលករសរុបលើពិភពលោក នឹងត្រូវផ្លាស់ប្តូរការងារនៅឆ្នាំ២០៣០ ។ ក្នុងប្រទេសអភិវឌ្ឍន៍ដូចជា សហរដ្ឋអាមេរិក ការងារក្នុងផ្នែកផលិតកម្ម និងការងារការិយាល័យអាចនឹងធ្លាក់ចុះ ខណៈការងារក្នុងផ្នែកសុខាភិបាល ការមើលថែ ការអប់រំ ការសាងសង់ និងគ្រប់គ្រង អាចនឹងកើនឡើងវិញ ។
ដូច្នេះ ដើម្បីកាត់បន្ថយចំណាយនៃការផ្លាស់ប្តូរនេះ គឺត្រូវការគោលនយោបាយហិរញ្ញវត្ថុ និងរូបិយប័ណ្ណដើម្បីរក្សាកម្រិតអ្នកមានការងារធ្វើ ។ គោលនយោបាយជំរុញការវិនិយោគលើហេដ្ឋារចនាសម្ព័ន្ធ លំនៅឋាន ថាមពលបៃតង ព្រមទាំងការមើលថែក្មេង និងមនុស្សចាស់ អាចជំរុញដល់ភាពប្រកួតប្រជែង និងការលូតលាស់បាន ហើយក៏អាចបង្កើតការងារបន្ថែមផងដែរ ។
ដំណោះស្រាយទី២ គឺការពង្រីក និងកែច្នៃកម្មវិធីហ្វឹកហាត់ពលករ ។ ការសិក្សារបស់ MGI ឲ្យដឹងទៀតថា ជំនាញគិតកម្រិតខ្ពស់ដូចជា ការគិតដោយសមហេតុសមផល ជំនាញទំនាក់ទំនង រួមទាំងជំនាញសង្គមនិងផ្លូវចិត្ត នឹងកាន់តែមានសារសំខាន់ ខណៈម៉ាស៊ីននឹងជំនួសផ្នែកដែលត្រូវការក្នុងការងារបច្ចុប្បន្ន រួមមាន ការប្រមូលទិន្នន័យ និងការគណនាទិន្នន័យជាដើម ។
រដ្ឋាភិបាលក៏គួរតែផ្តល់អត្ថប្រយោជន៍ពន្ធ និងអត្ថប្រយោជន៍ផ្សេងទៀត ដើម្បីជំរុញឲ្យអាជីវកម្មវិនិយោគបន្ថែមលើការហ្វឹកហាត់បុគ្គលិក ជាពិសេស ក្រុមហ៊ុនខ្នាតតូច និងមធ្យម។ រដ្ឋាភិបាលក៏ត្រូវផ្តល់អត្ថប្រយោជន៍សង្គមផ្សេងៗផងដែរដល់ពលករដែលត្រូវបានបង្ខំឲ្យផ្លាស់ប្តូរការងារ ដូចជា ការថែទាំសុខភាព ការថែទាំកុមារ សន្តិសុខពេលចូលនិវត្តន៍ និងជំនួយពេលផ្លាស់ប្តូរការងារជាដើម ។
ដូចនឹងបច្ចេកវិទ្យាពីអតីតកាល ការអភិវឌ្ឍនាពេលបច្ចុប្បន្ននេះសន្យាថា នឹងបង្កើនផ្នែកផលិតកម្ម ផ្តល់អត្ថប្រយោជន៍ដល់ពលរដ្ឋ សហគមន៍ និងសង្គម ។ ប៉ុន្តែសម្រាប់ពលកររាប់លាននាក់ទៀត ការអភិវឌ្ឍនេះអាចនឹងមានភាពលំបាក ៕
ដកស្រង់ពី Project-syndicate
ចែករំលែកព័តមាននេះ