ព័ត៌មានអាស៊ាន ដែលផ្តោតលើ៦វិញ្ញាសាផ្សេងគ្នានិងមានក្រុមហ៊ុនឬស្ថាប័នចំនួន១១៣ មកពីប្រទេសជាសមាជិកអាស៊ានទាំង១០ចូលរួមប្រកួតគ្នានាពេលថ្មីៗនេះ កម្ពុជាទទួលបានមេដាយមាស៣ ខណៈក្រុមហ៊ុនមកពីប្រទេសជាសមាជិកអាស៊ាន៤ មិនទទួលបានពានរង្វាន់។ នេះបើយោងតាមព័ត៌មានលើគេហទំព័ររបស់ក្រសួងប្រៃសណីយ៍ និងទូរគមនាគមន៍ ។ ប្រភពដដែលបញ្ជាក់ថា…
ព័ត៌មានអាស៊ាន ដែលផ្តោតលើ៦វិញ្ញាសាផ្សេងគ្នានិងមានក្រុមហ៊ុនឬស្ថាប័នចំនួន១១៣ មកពីប្រទេសជាសមាជិកអាស៊ានទាំង១០ចូលរួមប្រកួតគ្នានាពេលថ្មីៗនេះ កម្ពុជាទទួលបានមេដាយមាស៣ ខណៈក្រុមហ៊ុនមកពីប្រទេសជាសមាជិកអាស៊ាន៤ មិនទទួលបានពានរង្វាន់។ នេះបើយោងតាមព័ត៌មានលើគេហទំព័ររបស់ក្រសួងប្រៃសណីយ៍ និងទូរគមនាគមន៍ ។
ប្រភពដដែលបញ្ជាក់ថា ការប្រកួតប្រជែងពានរង្វាន់បច្ចេកវិទ្យាទូរគមនាគមន៍ និងព័ត៌មានអាស៊ានឆ្នាំ២០១៧នេះ ផ្តោតលើវិញ្ញាសា៦គឺ៖ ១-វិស័យសាធារណៈ, ២-វិស័យឯកជន, ៣-ទំនួលខុសត្រូវសង្គមរបស់សហគ្រាស, ៤-មាតិកាឌីជីថល, ៥-ការចាប់ផ្តើមធុរកិច្ចថ្មី និង៦-ការស្រាវជ្រាវ និងអភិវឌ្ឍន៍ ។ ជាលទ្ធផល មានតែប្រទេស៦ប៉ុណ្ណោះបានទទួលមេដាយគឺ ៖
១-កម្ពុជា ទទួលបានមេដាយមាស៣
២-ថៃ បានមេដាយមាស១, មេដាយប្រាក់ ២ និងមេដាយសំរឹទ្ធ៤
៣-សិង្ហបុរី មេដាយមាស១ និងមេដាយប្រាក់១
៤-ឥណ្ឌូណេស៊ី មេដាយមាស១
៥-វៀតណាម មេដាយប្រាក់២ និងមេដាយសំរឹទ្ធ១
៦-ឡាវ មេដាយប្រាក់១ និងមេដាយសំរឹទ្ធ១ ។
ពិធីប្រកួតដណ្តើមពានរង្វាន់នេះ បានរៀបចំឡើងនៅទីក្រុងសៀមរាប នាថ្ងៃទី២៩-៣០ ខែវិច្ឆិកា ឆ្នាំ២០១៧ ដែលកម្ពុជាជាម្ចាស់ផ្ទះ ។ ការប្រកួតនេះមាន២ដំណាក់កាលគឺ ៖ វគ្គជម្រុះ និងវគ្គផ្តាច់ព្រ័ត្រ ។ ក្នុងវគ្គជម្រុះមានក្រុមហ៊ុន/ស្ថាប័នចំនួន១១៣ មកពីប្រទេសអាស៊ានទាំង១០ បានចូលរួមប្រកួតប្រជែង ដែលនេះជាចំនួនច្រើនបំផុតមិនធ្លាប់មាន ចាប់តាំងពីឆ្នាំ២០១២មក ។
ទាក់ទងនឹងការប្រកួតប្រជែងពានរង្វាន់បច្ចេកវិទ្យាទូរគមនាគមន៍ និងព័ត៌មាន តាមមន្ត្រីអ្នកនាំពាក្យក្រសួងប្រៃសណីយ៍ និងទូរគមនាគមន៍ មានប្រសាសន៍កាលពីថ្ងៃទី១៣ ធ្នូ ម្សិលមិញថា កម្ពុជាបានចាប់ផ្តើមចូលរួមប្រកួតប្រជែងជាមួយប្រទេសអាស៊ានផ្សេងទៀតនៅឆ្នាំ២០១៤ ពេលនោះ ទទួលបានមេដាយមាស១, ឆ្នាំ២០១៥ បានមេដាយមាស១, ឆ្នាំ២០១៦ បានមេដាយប្រាក់១ និងសំរឹទ្ធ១ និងនៅឆ្នាំ២០១៧នេះ បានមេដាយមាស៣ ឈរនៅលំដាប់លេខរៀងទី១ ក្នុងចំណោមប្រទេសអាស៊ានទាំង១០ ។
លោក ខូវ មករា មន្ត្រីអ្នកនាំពាក្យក្រសួងប្រៃសណីយ៍ និងទូរគមនាគមន៍ មានប្រសាសន៍ថា ៖« នៅឆ្នាំ២០១៤ ពេលយើងចាប់ផ្តើមចូលរួមប្រកួតជាមួយគេ ដើម្បីលើកមុខមាត់របស់ខ្លួនថា យ៉ាងហោចណាស់ យើងក៏មានកូនខ្មែរបានបង្កើតអង្គការ ក្រុមហ៊ុន ឬផលិតផលថ្មីៗក្នុងបច្ចេកវិទ្យា និងព័ត៌មាន មានស្នាដៃល្អ គួរបានការទទួលស្គាល់នៅថ្នាក់តំបន់ដែរ ។ យើងចង់បង្ហាញថា ការលូតលាស់វិស័យបច្ចេកវិទ្យាទូរគមនាគមន៍ និងព័ត៌មានរបស់យើងចាប់ផ្តើមចេញមកពីទីណា ហើយទៅដល់ទីណា ខណៈពីមុន នៅក្នុងក្របខ័ណ្ឌអាស៊ានទាំងមូលគេមិនសូវចាប់អារម្មណ៍លើកម្ពុជាទេ »។
អ្នកនាំពាក្យរូបនេះបន្តថា ៖« ចាប់តាំងពីឆ្នាំ២០១១មក យើងព្យាយាម ធ្វើយ៉ាងម៉េចឱ្យវិស័យទាំងមូលវិវត្តន៍ទៅមុខលឿន ហើយផ្តោតសំខាន់ គឺលើកទឹកចិត្តយុវជននិងបច្ចេកវិទ្យា ធ្វើយ៉ាងម៉េច ឱ្យយុវជនប្រើបច្ចេកវិទ្យាស្ថិតនៅលើផ្លូវត្រូវដើម្បីជាប្រយោជន៍សម្រាប់សង្គមនិងសេដ្ឋកិច្ច ឬអភិវឌ្ឍន៍ធនធានមនុស្ស។ ជាលទ្ធផល ចាប់ពីឆ្នាំ២០១៤ ដល់២០១៧នេះ យើងឃើញការបោះជំហានរបស់យើងទៅលើផ្លូវត្រូវ ហើយលទ្ធផលបានបោះឱ្យយើងជាបន្តបន្ទាប់ តាមរយៈការវាយតម្លៃពីប្រទេសនៅក្នុងតំបន់ថា កម្ពុជាកំពុងបោះជំហានលើផ្លូវត្រូវ និងអភិវឌ្ឍន៍ពិតប្រាកដនៅលើវិស័យបច្ចេកវិទ្យានិងព័ត៌មាន ហើយយើងក៏មានយុវជនក្មេងៗមានសក្តានុពលខ្ពស់ ក្នុងការចាប់យកបច្ចេកវិទ្យាដើម្បីអភិវឌ្ឍន៍សេដ្ឋកិច្ចសង្គមផងដែរ » ។
លោកគូសបញ្ជាក់ថា ៖« ជារួម តាមរយៈលទ្ធផលដែលកម្ពុជាបានមេដាយមាស៣នៅឆ្នាំ២០១៧នេះ បានធ្វើឱ្យប្រទេសអាស៊ានទាំង១០ ទទួលស្គាល់ការរីកចម្រើនក្នុងវិស័យទូរគមនាគមន៍ និងព័ត៌មានរបស់កម្ពុជាហើយ » ។
គួរកត់សម្គាល់ថា យោងតាមគេហទំព័រក្រសួងប្រៃសណីយ៍ ការប្រកួតប្រជែងដណ្តើមពានរង្វាន់បច្ចេកវិទ្យាទូរគមនាគមន៍ និងព័ត៌មានអាស៊ាន គឺជាព្រឹត្តិការណ៍ប្រចាំឆ្នាំរបស់អាស៊ាន ដែលកម្ពុជាធ្វើជាម្ចាស់ផ្ទះស្របពេលកិច្ចប្រជុំថ្នាក់ឧត្តមមន្ត្រី និងថ្នាក់រដ្ឋមន្ត្រីទូរគមនាគមន៍អាស៊ាន ក្នុងគោលបំណងលើកកម្ពស់ការអភិវឌ្ឍបច្ចេកវិទ្យាទូរគមនាគមន៍ និងព័ត៌មាន ជំរុញការច្នៃប្រឌិតនិងនវានុវត្តន៍ លើកកម្ពស់ទំនាក់ទំនងពាណិជ្ជកម្ម និងផ្តល់កាលានុវត្តភាពសម្រាប់ធុរកិច្ច ព្រមទាំងជំរុញការធ្វើឱ្យប្រសើរឡើងនូវសេវាសាធារណៈ តាមរយៈការទទួលស្គាល់នូវសមិទ្ធផលបច្ចេកវិទ្យាទូរគមនាគមន៍ និងព័ត៌មានដែលល្អបំផុតក្នុងចំណោមស្ថាប័ន អង្គការ ក្រុមហ៊ុន ឬសហគ្រាសនៅទូទាំងតំបន់អាស៊ាន ៕
ចែករំលែកព័តមាននេះ