ខេត្តស្វាយរៀង ៖ បុគ្គលិកកាស៊ីណូម្នាក់បានស្លាប់ ខណៈមិត្តភក្តិបញ្ជូនដល់មន្ទីរពេទ្យ មូលហេតុគ្រោះថ្នាក់ចរាចរណ៍ពេលដើរទៅរកទិញអាហារ ហើយត្រូវជនប្រមឹកបើករថយន្តកាមរីឆ្លាមបុករះប៉ើងជិត១០ម៉ែត្រ បណ្តាលឲ្យរងរបួសធ្ងន់ធ្ងរ ហើយបានស្លាប់ពេលបញ្ជូនទៅដល់មន្ទីរពេទ្យ រីឯ២នាក់ផ្សេងទៀតរបួសស្រាល។ ករណីគ្រោះថ្នាក់ចរាចរណ៍នេះបានកើតឡើងកាលពីវេលាម៉ោង១១…
ខេត្តស្វាយរៀង ៖ បុគ្គលិកកាស៊ីណូម្នាក់បានស្លាប់ ខណៈមិត្តភក្តិបញ្ជូនដល់មន្ទីរពេទ្យ មូលហេតុគ្រោះថ្នាក់ចរាចរណ៍ពេលដើរទៅរកទិញអាហារ ហើយត្រូវជនប្រមឹកបើករថយន្តកាមរីឆ្លាមបុករះប៉ើងជិត១០ម៉ែត្រ បណ្តាលឲ្យរងរបួសធ្ងន់ធ្ងរ ហើយបានស្លាប់ពេលបញ្ជូនទៅដល់មន្ទីរពេទ្យ រីឯ២នាក់ផ្សេងទៀតរបួសស្រាល។ ករណីគ្រោះថ្នាក់ចរាចរណ៍នេះបានកើតឡើងកាលពីវេលាម៉ោង១១ និង៤៥នាទី យប់ថ្ងៃទី១២ ខែធ្នូ ឆ្នាំ២០១៧ នៅលើកំណាត់ផ្លូវជាតិលេខ១ ត្រង់ចំណុចគីឡូម៉ែត្រលេខ១៦៦-១៦៧ ស្ថិតក្នុងភូមិ បាវិតកណ្ដាល សង្កាត់បាវិត ក្រុងបាវិត។
បើតាមប្រភពពីកន្លែងកើតហេតុបានឲ្យដឹងថា នៅមុនពេលកើតហេតុគេឃើញរថយន្ដ១គ្រឿងម៉ាកកាមរីឆ្លាម ពណ៌ទឹកមាស ពាក់ស្លាកលេខ បាត់ដំបង 2A-0588 បើកបរពីលិចទៅកើតយ៉ាងលឿនក្នុងស្ថានភាពស្រវឹងស្រាជោគជាំ បើករេពេញផ្លូវ លុះមកដល់ចំណុចកើតហេតុខាងលើ បានបុកអ្នកថ្មើរជើងម្នាក់ពេញទំហឹង ចំពាក់កណ្តាលរថយន្តប៉ើងទៅមុខចម្ងាយប្រមាណ១០ម៉ែត្រ បែកក្បាលបាក់ចង្កេះ សន្លប់នៅនឹងកន្លែង ហើយបានជ្រុលទៅបុក និងម៉ូតូមួយគ្រឿងទៀតម៉ាកអ៊ែរប្លែក ពណ៌ខៀវ ពាក់ស្លាកលេខ 06.B6.250.92 (ស្លាកលេខវៀតណាម) ធ្វើដំណើរស្របទិសគ្នាបានបុកពីក្រោយពេញទំហឹងដួលបោកទៅលើថ្នល់បណ្តាលឲ្យជនជាតិវៀតណាមស្រីប្រុស២នាក់ រងរបួសរលាត់ដៃជើងស្រាល។
ខណៈនោះជនបង្កបានបើកទ្វាររថយន្តរត់គេចខ្លួនបាត់ស្រមោលបន្សល់ទុករថយន្តនៅនឹងកន្លែងកើតហេតុ។ រីឯសមត្ថកិច្ចនគរបាលក្រុងបាវិតបានឲ្យដឹងថា ជនរងគ្រោះឈ្មោះ ជា តារា ភេទប្រុស អាយុ២៧ឆ្នាំ មុខរបរបុគ្កលិក កាស៊ីណូ ពិភពថ្មី មានទីលំនៅភូមិត្រពាំងខ្នា ឃុំអង្គតាសោម ស្រុកត្រាំកក់ ខេត្តតាកែវ រងរបួសធ្ងន់ធ្ងរ ហើយបានស្លាប់នៅពេលបញ្ជូនទៅដល់មន្ទីរពន្លឺបូព៌ា ស្ថិតនៅក្នុងភូមិតាពៅ សង្កាត់បាវិត ក្រុងបាវិត រីឯជនជាតិវៀតណាម០២នាក់ទៀត សមត្ថកិច្ចមិនបានប្រាប់អត្តសញ្ញាណនោះទេ។ ប្រភពដដែលបានបន្តទៀតថា អ្នកបើកបររថយន្តបង្កឈ្មោះ ផេ ពន្លក ភេទប្រុស អាយុ៣១ឆ្នាំ មុខរបរយោធា មានទីលំនៅភូមិចុងព្រែក សង្កាត់ស្វាយរៀង ក្រុងស្វាយរៀង។
បច្ចុប្បន្នសពជនរងគ្រោះ បានតម្កល់ទុកនៅវត្តពោធិ៍ថ្មី (ហៅវត្តបាវិត) រង់ចាំក្រុមគ្រួសារមកទទួលយកទៅធ្វើបុណ្យតាមប្រពៃណី។ ចំណែកជនរងគ្រោះជនជាតិវៀតណាម ត្រូវបានសមត្ថកិច្ចបញ្ជូនទៅមន្ទីរពេទ្យបូព៌ា ដើម្បីលាងរបួស និងព្យាបាល។ ក្រោយពីធ្វើការវាស់វែងសមត្ថកិច្ចបានវត្ថុតាងទាំងពីរគ្រឿងយកទៅរក្សាទុកនៅនគរបាលប៉ុស្តិ៍រដ្ឋបាលសង្កាត់បាវិត ដើម្បីកសាងសំណុំរឿងបញ្ជូនទៅការិយាល័យនគរបាលចរាចរណ៍ខេត្តចាត់ការបន្តតាមនីតិវិធី៕
ចែករំលែកព័តមាននេះ