បើនិយាយពីអាជីពក្នុងក្តីសុបិនរបស់ស្ត្រីជាច្រើននាក់ មានមួយក្នុងចំណោមនោះជាអាជីពបង្ហាញម៉ូដ ព្រោះបានស្លៀកពាក់ឈុតស្រស់ស្អាតគួរឱ្យគយគន់នៅលើវេទិកាបង្ហាញម៉ូដនៅទូទាំងប្រទេស រួមទាំងនៅបរទេសអាចបង្កើតកេរ្តិ៍ឈ្មោះដ៏ល្បីនៅលើពិភពលោក និងមានប្រាក់ចំណូលខ្ពស់ ។
ទស្សនាវដ្តី«Forbes» បានរៀបចំណាត់ថ្នាក់តារាបង្ហាញម៉ូដមានចំណូលខ្ពស់ប្រចាំឆ្នាំ២០១៧ ចំនួន១០ចំណាត់ថ្នាក់សុទ្ធសឹងជាតារាបង្ហាញម៉ូដកម្រិតពិភពលោកស្រស់ស្អាត ។
១-នាង Kendall Jenner អាយុ២២ឆ្នាំ ជាតារាមានប្រាក់ចំណូលខ្ពស់ក្នុងឆ្នាំ២០១៧ រកបាន២២លានដុល្លារ ភាគច្រើនបានពីការដើរបង្ហាញម៉ូដ និងចុះកិច្ចសន្យាជាមួយក្រុមហ៊ុនឧបត្ថម្ភនានា រួមមានក្រុមហ៊ុន Estee Lauder, La Perla និង Gisele ជាដើម ។
២-នាង Gisele Bundchen អាយុ៣៧ឆ្នាំ រកចំណូលបាន១៧,៥លានដុល្លារ ប្រចាំឆ្នាំ២០១៧ ដោយចុះកិច្ចសន្យាឱ្យក្រុមហ៊ុនឧបត្ថម្ភនានាដូចជា Carolina Herrera, Arezzo Shoes និង Vivara Jewelry ។
៣-នាងChrissy Teigen អាយុ៣១ឆ្នាំ ជាតារាបង្ហាញម៉ូដកូនកាត់ថៃ-ន័រវែស ចាប់ផ្តើមល្បីឈ្មោះពីការបង្ហាញម៉ូដឈុតហែលទឹកឱ្យទស្សនាវដ្តី Sports Illustrated ទទួលបានចំណូល១៣,៥លានដុល្លារ ។
៤-នាង Adriana Lima អាយុ៣៦ឆ្នាំ ជាតារាបង្ហាញម៉ូដអស់រយៈពេលយ៉ាងយូរ និងចុះកិច្ចសន្យាជាតារាបង្ហាញម៉ូដឱ្យក្រុមហ៊ុន Victoria’s Secret តាំងពីឆ្នាំ២០០០កន្លងមក រកចំណូលបាន១០,៥លានដុល្លារ ។
៥-នាង Gigi Hadid អាយុ២២ឆ្នាំ មានប្រាក់ចំណូល៩,៥លានដុល្លារ ។ ចំណូលភាគច្រើនបានពីការដើរបង្ហាញម៉ូដ រួមទាំងចុះកិច្ចសន្យាឲ្យក្រុមហ៊ុនឧបត្ថម្ភជាច្រើនរួមមាន Maybelline, Tommy Hifiger, BMW, Eviar និង Vrsace ។
៦-នាង Rosie Huntington Whiteley អាយុ៣០ឆ្នាំ បច្ចុប្បន្នមានកូនម្នាក់ ប៉ុន្តែរូបរាងនៅតែស្រស់ស្អាត និងជាតារាបង្ហាញម៉ូដអាជីពរកចំណូលបាន៩,៥លានដុល្លារ ។
៧-នាង Karlie Kloss អាយុ២៥ឆ្នាំ មានចំណូល៩លានដុល្លារ ពីការដើរបង្ហាញម៉ូដ និងបំពេញការងារនៅក្នុងមជ្ឈដ្ឋានបង្ហាញម៉ូដតាំងពីនៅអាយុ១៦ឆ្នាំ ។
៨-នាង Liu Wen អាយុ២៩ឆ្នាំ ជាតារាបង្ហាញម៉ូដជនជាតិអាស៊ីដំបូង បានដើរបង្ហាញម៉ូដជាមួយ Victoria’s Secret រកចំណូលបាន៦,៥លានដុល្លារ ។
៩-នាង Bella Hadid អាយុ២១ឆ្នាំមានស្នាដៃក្នុងមជ្ឈដ្ឋានម៉ូដច្រើន ។ នាងបង្ហាញម៉ូដឲ្យទស្សនាវដ្តីជាច្រើនមានចំណូល៦លានដុល្លារ ។
១០-នាង Ashley Graham អាយុ២៩ឆ្នាំ ធ្លាប់ដើរបង្ហាញម៉ូដឱ្យក្រុមហ៊ុនជាច្រើន ក្រៅពីនេះមានស្នាដៃដ៏លេចធ្លោជាច្រើនក្នុងមជ្ឈដ្ឋានម៉ូដ មានប្រាក់ចំណូល៥,៥លានដុល្លារ៕
ចែករំលែកព័តមាននេះ