ខេត្តស្វាយរៀង ៖ រដូវប្រមូលផលស្រូវឆ្នាំនេះ ហាក់មានហាងឆេងល្អសម្រាប់ប្រជាពលរដ្ឋនៅភាគខាងកើតជាប់ព្រំដែនប្រទេសវៀតណាម ដោយសារតែឈ្មួញវៀតណាមបានសម្រុកចូលមកទិញស្រូវខ្មែរ ដូចទឹកបាក់ទំនប់នៅគ្រប់ច្រករបៀង និងច្រកតំបន់ ដែលក្នុង១ថ្ងៃ ជាមធ្យមចាប់ពី៨០០ ទៅ១ពាន់តោន…
ខេត្តស្វាយរៀង ៖ រដូវប្រមូលផលស្រូវឆ្នាំនេះ ហាក់មានហាងឆេងល្អសម្រាប់ប្រជាពលរដ្ឋនៅភាគខាងកើតជាប់ព្រំដែនប្រទេសវៀតណាម ដោយសារតែឈ្មួញវៀតណាមបានសម្រុកចូលមកទិញស្រូវខ្មែរ ដូចទឹកបាក់ទំនប់នៅគ្រប់ច្រករបៀង និងច្រកតំបន់ ដែលក្នុង១ថ្ងៃ ជាមធ្យមចាប់ពី៨០០ ទៅ១ពាន់តោន ។
ការមានហាងឆេងតម្លៃស្រូវល្អបែបនេះ បានធ្វើឲ្យប្រជាកសិករសប្បាយចិត្ត ដោយសារស្រូវក្នុងឆ្នាំ២០១៧ មានតម្លៃល្អជាងឆ្នាំ២០១៦។ ជាក់ស្តែង ស្រូវប្រភេទអ៊ីអ៊ែរខា៥៤ ដែលវៀតណាមហៅថា «ខាណាំបូង» ដឹកដល់ទូកភ្លាម គឺឈ្មួញវៀតណាមទិញក្នុង១គីឡូក្រាមតម្លៃ៥ពាន់ដុង (ប្រមាណ៩៣០រៀល) ។ ចំណែកប្រភេទស្រូវស្រែចម្រុះ ដូចជា ក្រសាំងទាប, នាងមិញ, ស្រូវស្រកីញឹក, ផ្កាអំពិល និងស្រូវម៉ុងម៉ាំង ក្នុង១គីឡូក្រាម តម្លៃ៥.៥០០ដុង (ប្រមាណ៩៥០ ទៅ៩៦០រៀល) ។
តាមបុរសម្នាក់ជាឈ្មួញប្រមូលទិញស្រូវពីប្រជាកសិករផ្ទាល់ឲ្យដឹងថា ស្រូវឆ្នាំនេះ មានហាងឆេងល្អប្រសើរ ដោយសារវៀតណាមមកទទួលទិញតាំងពីពាក់កណ្តាលខែវិច្ឆិកាមកម្ល៉េះ ហើយចាប់ប្រមូលទិញកាន់តែខ្លាំងក្លាឡើងនៅដើមខែធ្នូ រហូតមកដល់ថ្ងៃទី១២ ធ្នូ ។
ប្រភពដដែលបន្តថា ស្រូវស្រែចម្រុះ ឈ្មួញចុះទិញពីកសិករផ្ទាល់ គឺឱ្យតម្លៃ៨០០រៀលក្នុង១គីឡូក្រាម ។ បន្ទាប់មក យកទៅលក់ឲ្យឈ្មួញកណ្តាលនៅឃ្លាំងទិញស្រូវជាប់ព្រំដែន គឺ១គីឡូក្រាម តម្លៃ៨៧០រៀល ។ បើឈ្មួញកណ្តាលលក់ឲ្យឈ្មួញវៀតណាមផ្ទាល់ គឺ១គីឡូក្រាម តម្លៃ៩៥០រៀល ។
សម្រាប់ប្រភេទស្រូវអ៊ីអ៊ែរខា៥៤ ការទិញផ្ទាល់ពីកសិករ ក្នុង១គីឡូក្រាម តម្លៃ៧៩០រៀល។ បន្ទាប់មក លក់ឲ្យឈ្មួញកណ្តាលបានតម្លៃ ក្នុង១គីឡូក្រាម៨៣០រៀល ។ អីចឹង ឈ្មួញកណ្តាលពេលលក់បន្តឲ្យវៀតណាម គឺបានតម្លៃ៩៣០រៀលក្នុង១គីឡូក្រាម ។ រីឯឈ្មួញកណ្តាលម្នាក់ទៀតសុំមិនបញ្ចេញឈ្មោះបានបង្ហើបឲ្យដឹងថា នៅចំណុចប្រឡាយទាហាន ក្នុងភូមិព្រៃវ័ល្ល៍ ឃុំថ្មី ស្រុកកំពង់រោទ៍ គឺក្នុង១ថ្ងៃ មានទូកវៀតណាមចូលមកទិញស្រូវជាមធ្យមចាប់ពី៣០ ទៅ៤០ទូក ហើយក្នុង១ទូកចំណុះ៧០តោន ។
ឈ្មួញរូបនេះបន្តថា បើមើលតាមតម្លៃគាត់ទិញស្រូវឃើញថា ចំណេញច្រើន ក៏ប៉ុន្តែពួកគាត់ដែលជាឈ្មួញទិញផ្ទាល់ពីកសិករ ក៏ត្រូវចំណាយអស់ច្រើនដែរដូចជា បង់ថ្លៃបេន ឃ្លាំង ថ្លៃកម្មករ និងបង់ឲ្យសមត្ថកិច្ច៥ស្ថាប័ន ដែលការបង់នោះ គឺបង់តាមចំនួនក្បាលទូក មានន័យថា ក្នុង១ទូក តម្លៃ១ម៉ឺនរៀល ។ សរុបទៅ ត្រូវចំណាយ៥ម៉ឺនរៀលក្នុង១ទូកសម្រាប់៥ស្ថាប័ន ដូច្នេះ មិនចំណេញច្រើនប៉ុន្មានទេ ។
បើតាមលោក ថាច់ រតនា ប្រធានមន្ទីរកសិកម្ម រុក្ខាប្រមាញ់ និងនេសាទខេត្ត បានឲ្យដឹងថា នៅឆ្នាំនេះ វៀតណាមត្រូវការស្រូវច្រើន ដោយមានឈ្មួញមកប្រមូលទិញស្រូវពីកសិករផ្ទាល់ ក្នុង១គីឡូក្រាមតម្លៃ៨០០រៀល។ ការទិញស្រូវនេះ មិនមែនតែក្នុងទឹកដីខេត្តស្វាយរៀងទេ គឺឈ្មួញបានដើរប្រមូលទិញស្រូវពីខេត្តបាត់ដំបង, ពោធិ៍សាត់, ព្រៃវែង និងកំពង់ចាមផងដែរ ហើយដឹកស្រូវមកលក់នៅតាមព្រំដែនខេត្តស្វាយរៀង តាមច្រកមួយចំនួនដូចជា ច្រករបៀងក្រសាំងជ្រំ ក្នុងភូមិក្រសាំងជ្រំ ឃុំក្រួស ស្រុកស្វាយជ្រំ, ច្រកតំបន់បាត់ត្រាស់ ក្នុងឃុំដូង ស្រុករមាសហែក, ប្រឡាយទាហាន ជាប់ច្រកទ្វារព្រំដែនអន្តរជាតិព្រៃវ័ល្ល៍ ក្នុងភូមិព្រៃវ័ល្ល៍ ឃុំថ្មី ស្រុកកំពង់រោទ៍ ។
លោកបន្តថា បើគិតសរុបជាមធ្យម ការប្រមូលទិញស្រូវពីកម្ពុជាតាមច្រកនានាក្នុងខេត្តស្វាយរៀង គឺចាប់ពី៨០០ ទៅ១ពាន់តោនក្នុង១ថ្ងៃ ។ កសិករនៅខេត្តស្វាយរៀងភាគច្រើនបានដឹកស្រូវយកទៅលក់ឲ្យឈ្មួញវៀតណាមផ្ទាល់តែម្តង ៕
ចែករំលែកព័តមាននេះ