ខេត្តសៀមរាប ៖ តាមសេចក្តីរាយការណ៍ពីប្រជាពលរដ្ឋ និងមានការអនុញ្ញាតពីលោកស្នងការដ្ឋានខេត្ត លោកឧត្តមសេនីយ៍ត្រី ហួត សុធី ស្នងការរងទទួលផែនសន្តិសុខបានដឹកនាំកម្លាំងផែនសន្តិសុខ ចុះសហការជាមួយកម្លាំងប៉ុស្តិ៍មូលដ្ឋាន ដោយមានការចូលរួមពីព្រះអនុគណក្រុងសៀមរាប ព្រះវិន័យធរក្រុង មន្ត្រីធម្មការក្រុង បានឈានដល់ធ្វើការឃាត់ខ្លួនជនក្លែងបន្លំជាសង្ឃ២នាក់ នាំយកមកវត្តគោកចក ដើម្បីធ្វើការផ្សឹកទាំងយប់ រួចប្រគល់ឱ្យសមត្ថកិច្ចចាត់ការតាមផ្លូវច្បាប់ ។ បានជានាំខ្លួនមកវត្តដើម្បីចាប់ផ្សឹកនោះ ដំបូងស្មានថា ជាសង្ឃ តែក្រោយពេលនាំមកសាកសួរទើបដឹងថា ជាជនក្លែងបន្លំប៉ុណ្ណោះ ។
ការឃាត់ខ្លួននេះបានធ្វើឡើងនៅវេលាម៉ោង៩និង៣០នាទីយប់ថ្ងៃទី១១ ធ្នូ ខណៈដែលជនទាំង២ ស្នាក់នៅក្នុងបន្ទប់ជួលមួយនៅភូមិសាលាកន្សែង សង្កាត់ស្វាយដង្គំ ក្រុងសៀមរាប ។ តាមសេចក្តីរាយការណ៍ថា ដោយសារតែពលរដ្ឋឃើញសង្ឃគួរឱ្យសង្ស័យ ស្នាក់នៅបន្ទប់ជួលគ្មានវត្តអារាម និងដើរបិណ្ឌបាតតាមភូមិ ទើបរាយការណ៍ ។ លុះពេលឆែកឆេរទើបដឹងថាសង្ឃក្លែងក្លាយមានទាំងសារធាតុញៀនក្នុងខ្លួនផងដែរ ។
ជនទាំង២ម្នាក់ឈ្មោះ វិន សំណាង អាយុ២៧ឆ្នាំ ទីលំនៅភូមិអញ្ចាញសំរោង ស្រុកអូរជ្រៅ ខេត្តបន្ទាយ មានជ័យ និងម្នាក់ទៀតឈ្មោះ អឿន អ៊ត់ អាយុ១៧ឆ្នាំ ទីលំនៅភូមិសឿ សង្កាត់ល្វា ក្រុងសិរីសោភ័ណ ខេត្តបន្ទាយមានជ័យ ។
លោកបានបន្តថា ក្រោយពីបានធ្វើការឃាត់ខ្លួន និងនាំទៅផ្សឹកតាមវិន័យព្រះពុទ្ធសាសនារួច ត្រូវបានកម្លាំងការិយាល័យប្រឆាំងគ្រឿងញៀនយកទៅធ្វើតេស្ដទឹកនោម លទ្ធផលឃើញវិជ្ជមានលើឈ្មោះ វិន សំណាង ព្រមទាំងបានសារភាពនៅចំពោះមុខសមត្ថកិច្ចថា ខ្លួនពិតជាបានប្រើប្រាស់់គ្រឿងញៀនប្រាកដមែន ។ ជនសង្ស័យទាំង២នាក់ ត្រូវបានប្រគល់ឱ្យជំនាញការិយាល័យប្រឆាំងគ្រឿងញៀនខេត្ត យកទៅសួរនាំបន្ត រួចកសាងសំណុំរឿងបញ្ជូនទៅតុលាការខេត្តដើម្បីចាត់ការតាមផ្លូវច្បាប់ ៕
ចែករំលែកព័តមាននេះ