រាជធានីភ្នំពេញ ៖ មកទល់ម៉ោងនេះ សមាជិកក្រុមជម្រើសជាតិកម្ពុជាល្បីឈ្មោះ កីឡាករ ចាន់ វឌ្ឍនាកា នៅតែបន្តបិទបាំងទាំងស្រុងពីឈ្មោះក្លិប និងប្រទេសដែលលោកត្រូវទៅលេងនៅដើមឆ្នាំ២០១៨ ដោយលោកគ្រាន់តែបង្ហើបថាគឺជាប្រទេសក្នុងតំបន់…
រាជធានីភ្នំពេញ ៖ មកទល់ម៉ោងនេះ សមាជិកក្រុមជម្រើសជាតិកម្ពុជាល្បីឈ្មោះ កីឡាករ ចាន់ វឌ្ឍនាកា នៅតែបន្តបិទបាំងទាំងស្រុងពីឈ្មោះក្លិប និងប្រទេសដែលលោកត្រូវទៅលេងនៅដើមឆ្នាំ២០១៨ ដោយលោកគ្រាន់តែបង្ហើបថាគឺជាប្រទេសក្នុងតំបន់ ប៉ុន្តែមិនព្រមទម្លាយឱ្យដឹងពីឈ្មោះប្រទេសណាមួយពិតប្រាកដ ។ ទោះបីយ៉ាងណាលោកប្រកាសថា កិច្ចសន្យាដែលលោកត្រៀមចុះហត្ថលេខាជាមួយក្លិបបរទេសនោះនឹងតម្រូវឱ្យលោកបានចូលលេងខុសពីពេលដែលលោកទៅលេងជាលក្ខណៈខ្ចីជើងនៅក្នុងប្រទេសជប៉ុន ទើបលោកជឿជាក់យ៉ាងខ្លាំងថា ឱកាសទៅលេងនៅក្រៅប្រទេសក្នុងឆ្នាំទី២ នឹងជួយឱ្យលោកទទួលបានបទពិសោធន៍ ក៏ដូចជាភាពលេចធ្លោជាងមុន។
លោក ចាន់ វឌ្ឍនាកា និយាយថា លោកមិនទាន់អាចទម្លាយពីឈ្មោះក្រុម និងឈ្មោះប្រទេសនៅក្នុងពេលនេះបានទេ ដោយសារតែលក្ខខណ្ឌរបស់ក្លិបថ្មីមិនតម្រូវឱ្យលោកទម្លាយ។ លោកថា ការប្រកាសពីការចូលទៅលេងក្លិបថ្មីគ្រោងធ្វើឡើងនៅដំណាច់ឆ្នាំនេះ ឬដើមឆ្នាំ២០១៨ ដែលតាមគម្រោងលោកនឹងចុះកិច្ចសន្យាលេងរយៈពេល១ឆ្នាំ ហើយចំពោះលក្ខខណ្ឌក៏ល្អជាងមុនផងដែរ ។ លោកបានបន្តថា នៅក្នុងក្លិបថ្មីនោះ គេបានព្រមព្រៀងឱ្យលោកចូលលេងក្នុងអំឡុងកិច្ចសន្យាបន្ថែមពីការបង្វឹកដូចគ្នានៅក្នុងក្រុមចាស់ ដែលលោកបានលេងនៅជប៉ុន ។ លោកថា ផែនការចុះកិច្ចសន្យាត្រូវបានធ្វើឡើងដោយការឯកភាព១០០ភាគរយជាមួយគ្នារួចហើយ ដោយរង់ចាំតែដល់កំណត់ប្រកាសបើកចំហនិងធ្វើសន្និសីទសារព័ត៌មានប៉ុណ្ណោះ ។ តាមការអះអាងលោកមានជំនឿចិត្តយ៉ាងខ្លាំងថា វត្តមានលោកនៅក្រុមថ្មីនឹងធ្វើឱ្យលោកសប្បាយ ហើយអាចឱ្យលោកកាន់តែទទួលបានបទពិសោធន៍ច្រើនជាងមុន ។ ការលើកឡើងរបស់លោកធ្វើឱ្យម្នាក់ៗអន្ទះសារ ជាពិសេសអ្នកដែលចង់ដឹងថាលោកទទួលលេងឱ្យក្លិបណា ក្រោយពីលោកទើបតែមកដល់កម្ពុជា ហើយប្រកាសថាបានព្រមព្រៀង១០០ភាគរយរួចហើយ នៅក្នុងក្លិបថ្មីបែបនេះ ។ មានការប៉ាន់ស្មានថា លោកទទួលលេងឱ្យក្លិបមួយរបស់ប្រទេសម៉ាឡេស៊ី ខ្លះថារបស់ប្រទេសសិង្ហបុរី និងខ្លះទៀតថា ឥណ្ឌូណេស៊ី ស្របគ្នាដែលខ្លះក៏ប៉ាន់ស្មានថាលោកទំនងបន្តលេងក្នុងប្រទេសជប៉ុនដដែល ដោយគ្រាន់តែប្ដូរក្លិប។
ចាន់ វឌ្ឍនាកា បានបង្ហើបឱ្យដឹងថា ក្លិបថ្មីដែលលោកទៅលេង គឺស្ថិតនៅប្រទេសក្នុងតំបន់ ហើយលោកនឹងត្រូវបានលើកស្ទួយខុសពីពេលដែលលោកនៅលេងឱ្យជប៉ុន ។
យ៉ាងណាមិញលោកនៅតែអះអាងថា ការសម្រេចចិត្តទៅលេងនៅក្នុងក្រុមជប៉ុនរយៈពេល១០ខែកន្លងមក គឺជាការសម្រេចចិត្តត្រឹមត្រូវ បើទោះជាលោកមិនបានដាក់ឱ្យលេងក្នុងក្រុមតាមការចង់បាន ក្នុងអំឡុងដែលលោកនៅលេងឱ្យក្រុមជប៉ុននោះ ។
លោកបានថ្លែងប្រាប់សារព័ត៌មានក្នុងស្រុកថា ការប្រកបអាជីពមួយរដូវកាលជាមួយក្លិប Fujieda MYFC ក្នុងលីគទី៣របស់ប្រទេសជប៉ុន បើទោះជាលោកមិនបង្ហាញខ្លួនលេងលើទីលានក៏ដោយ តែលោកយល់ថាជារឿងដ៏ល្អសម្រាប់លោក ។ លោកបានពន្យល់ថា ទោះជាក្នុងរយៈពេល១០ខែនៅជប៉ុន លោកមិនបានលេង ក៏ជាការសម្រេចចិត្តដ៏ត្រឹមត្រូវមួយនោះដែរ ដោយសារតែជប៉ុនជាប្រទេសដែលវិស័យបាល់ទាត់មានការរីក
ចម្រើន ។ លោកលើកជាឧទាហរណ៍ថា បើរៀន រៀនជាមួយអ្នកពូកែ នោះលោកក៏នឹងពូកែតាមដែរ ។ គ្រាន់តែថា មានកម្រិតពូកែខ្លាំង ឬពូកែតិចប៉ុណ្ណោះ ។ សម្រាប់លោកអត់អន់ចិត្តនូវអ្វីដែលលោកមិនត្រូវគេដាក់ឱ្យលេងនោះទេ ផ្ទុយទៅវិញ គឺលោកកាន់តែសប្បាយចិត្តដែលបានទៅលេងនៅជប៉ុន ដោយបានរៀនសូត្រពីគេ និងអភិវឌ្ឍខ្លួនលោកឱ្យកាន់តែប្រសើរ។
លោកបានបន្តអះអាងពីចំណុចខ្វះខាតរបស់ខ្លួនថា ក្នុងពេលប្រកួតការចុះជួយតំបន់ការពាររបស់លោកនៅក្នុងក្រុមជប៉ុន ហាក់ធ្វើឲ្យកម្លាំងរបស់លោកមិនគ្រប់គ្រាន់ដូចលេងនៅទឹកដីកម្ពុជា ព្រោះតែរបបអាហារ និងអាកាសធាតុ។ វឌ្ឍនាកាបានប្រៀបធៀបសមត្ថភាពរបស់ខ្លួន និងសមត្ថភាពរបស់ខ្សែប្រយុទ្ធក្រុម Fujieda MYFC គឺខុសគ្នាត្រង់ទម្លាប់លេង ។ លោកថាធ្លាប់តែលេងក្នុងរបៀបនៅកម្ពុជា ដល់ពេលទៅលេងនៅជប៉ុន លោកត្រូវផ្លាស់ប្តូរតាមទម្លាប់របៀបលេងរបស់ជប៉ុន ដូច្នេះហើយដែលធ្វើឲ្យលោកជួបការលំបាកខ្លាំង ។ ជាពិសេសបញ្ហាភាសាដែលធ្វើឲ្យលោកពិបាកក្នុងការទំនាក់ទំនងពេលលេងលើទីលាន ។
ចាន់ វឌ្ឍនាកា បានអះអាងថា លោកនឹងបង្ហាញខ្លួននៅក្នុងក្រុមថ្មីនៅក្រៅប្រទេសក្នុងពេលឆាប់ៗនេះ ។ តែលោកក៏នឹងជួយក្រុមបឹងកេត រហូតដល់ដំណាច់ឆ្នាំផងដែរ មុនពេលលោកចាកចេញពីកម្ពុជា ទៅលេងឱ្យក្រុមថ្មី ដែលលោកបង្ហើបថា ជាក្រុមខ្លាំងមួយដែរនៅក្នុងតំបន់ ។ លោកថា ជុំវិញព័ត៌មានបង្ហាញខ្លួននៅក្នុងក្លិបថ្មី គឺលោកច្បាស់លាស់១០០% ដោយអ្វីដែលច្បាស់ទៅទៀតគឺលោកនឹងមានឱកាសបានចូលប្រកួតច្រើនជាងក្លិបចាស់ ហើយងាយនឹងធ្វើឱ្យលោកលេចធ្លោជាងមុននោះផង។ អ៊ីចឹងហើយទើបអ្នកគាំទ្រលោក អន្ទះសាររង់ចាំការប្រកាសរបស់លោក ក្រោយពីមានការបិទយ៉ាងជិតមិនទាន់ចង់បង្ហើបបែបនេះ ៕
ចែករំលែកព័តមាននេះ