ខេត្តសៀមរាប ៖ កម្លាំងការិយាល័យនគរបាលអន្តោប្រវេសន៍ខេត្តសៀមរាប បានចុះបង្ក្រាបទីតាំងភ្នាល់ល្បែងស៊ីសងខុសច្បាប់ និងរៀបចំដំឡើងម៉ាស៊ីនលេងល្បែងស៊ីសងខុសច្បាប់ នៅក្នុងក្រុងសៀមរាប ដោយអនុវត្តតាមបទបញ្ជាដ៏ម៉ឺងម៉ាត់របស់លោក បណ្ឌិត ឃឹម ប៊ុនសុង អភិបាលនៃគណៈអភិបាលខេត្តសៀមរាប និងលោកឧត្តមសេនីយ៍ត្រី ទិត្យ ណារ៉ុង ស្នងការនគរបាលខេត្តសៀមរាប ដឹកនាំកម្លាំង ដោយលោកវរសេនីយ៍ទោ តូច សុគន្ធ នាយការិយាល័យនគរបាលអន្តោប្រវេសន៍ខេត្ត និងដឹកនាំសម្របសម្រួលនីតិវិធីដោយលោក សំរិទ្ធ សុខុន ព្រះរាជអាជ្ញារងអមសាលាដំបូងខេត្តសៀមរាប បានចុះបង្ក្រាបទីតាំងបើកភ្នាល់ល្បែងស៊ីសងខុសច្បាប់(ហ្គែមបាញ់ត្រី) មួយកន្លែង និងបានឃាត់ខ្លួនមនុស្ស ប្រុស ស្រី ចំនួន ០៧នាក់ រួមនឹងវត្ថុតាងទូបាញ់ត្រីចំនួន ០៣ទូ រួចយកមកសួរនាំនៅការិយាល័យជំនាញ នៃស្នងការនគរបាលខេ ត្តដើម្បីរៀបចំកសាងសំណុំរឿងបញ្ជូនទៅតុលាការបន្តទៅតាមផ្លូវច្បាប់។
ហេតុការបង្ក្រាបល្បែងស៊ីសង(បាញ់ត្រី)ខុសច្បាប់បានធ្វើឡើង នៅវេលាម៉ោងប្រហែល១០ និង១៥នាទី ថ្ងៃទី១១ ធ្នូ ២០១៧ ដែលមានទីតាំងស្ថិតនៅភូមិតាវៀន សង្កាត់សាលាកំរើក ក្រុង/ខេត្តសៀមរាប។ លោកវរសេនីយ៍ទោ តូច សុគន្ធ នាយការិយាល័យនគរបាលអន្តោប្រវេសន៍ខេត្ត បានប្រាប់ថា ដោយអនុវត្តតាមបទបញ្ជាដ៏ម៉ឺងម៉ាត់របស់ លោក បណ្ឌិត ឃឹម ប៊ុនសុង អភិបាលនៃគណៈអភិបាលខេត្តសៀមរាប និងលោកឧត្តមសេនីយ៍ត្រី ទិត្យ ណារ៉ុង ស្នងការនគរបាលខេត្តសៀមរាប បានឱ្យលោកដឹកនាំកម្លាំង ចុះបង្ក្រាបទីតាំងបើកភ្នាល់ល្បែងស៊ីសងខុសច្បាប់ (ហ្គែមបាញ់ត្រី) មួយកន្លែង ដោយមានការចូលរួមដឹកនាំសម្របសម្រួលនីតិវិធីដោយលោក សំរិទ្ធ សុខុន ព្រះរាជអាជ្ញារងអមសាលាដំបូងខេត្តសៀមរាប ចុះបង្ក្រាបរហូតឈានដល់ធ្វើការឃាត់ខ្លួនមនុស្ស ប្រុសស្រី ចំនួន០៧នាក់ រួមនឹងវត្ថុតាងទូបាញ់ត្រីចំនួន០៣ទូ រួចយកមកសួរនាំនៅការិយាល័យជំនាញ នៃស្នងការនគរបាលខេត្ត ដើម្បីរៀបចំកសាងសំណុំរឿងបញ្ជូនទៅតុលាការបន្តទៅតាមផ្លូវច្បាប់។
លោកបានបន្តថា ជនសង្ស័យ ប្រុស ស្រីទាំង០៧នាក់ក្នុងនោះមាន៖ ទី១/ឈ្មោះ LIM CHEE WOOI ភេទប្រុស អាយុ៤៨ឆ្នាំ មុខរបរជាថៅកែ ជនជាតិម៉ាឡេស៊ី កាន់លិខិតឆ្លងដែនលេខ A៤០៤៩៦១៥៧ ទី២/ឈ្មោះ NG CHUAN FU ភេទប្រុស អាយុ៣១ឆ្នាំ មុខរបរជាថៅកែជនជាតិម៉ាឡេស៊ី កាន់លិខិតឆ្លងដែនលេខA៣៣៣៦៩៥៦៣ ទី៣/ឈ្មោះ ចាន់ រដ្ឋ ភេទប្រុស អាយុ២១ឆ្នាំ ជនជាតិខ្មែរ ជាបុគ្គលិក ទី៤/ឈ្មោះ យួន សាវុធ ភេទប្រុស អាយុ៣៧ឆ្នាំ ជនជាតិខ្មែរ ជាបុគ្គលិក ទី៥/ឈ្មោះ លី សៀម ភេទស្រី អាយុ២៦ឆ្នាំ ជនជាតិខ្មែរ ជាចុងភៅ ទី៦/ឈ្មោះ ហ៊ បូណា ភេទប្រុស អាយុ៤៤ ជនជាតិខ្មែរ ជាម្ចាស់ផ្ទះ និងទី៧/ឈ្មោះ យុន សំអុល ភេទប្រុស អាយុ៣៨ឆ្នាំ ជនជាតិខ្មែរ ជាអ្នកបកប្រែ និងជួយជួលផ្ទះឱ្យ។
ក្រោយការចុះបង្ក្រាបទីតាំងខាងលើ សមត្ថកិច្ចយើងបានបន្តចុះឆែកឆេរក្នុងទីតាំងផ្ទះមួយកន្លែងផ្សេងទៀត(ជាផ្ទះជនជាតិម៉ាឡេស៊ី ជួលស្នាក់នៅ) ស្ថិតនៅភូមិវាល សង្កាត់ គោកចក ក្រុង/ខេត្តសៀមរាប និងបានរកឃើញវត្ថុតាងឧបករណ៍សម្រាប់ដំឡើងទូបាញ់ត្រីចំនួន ២១ទូបន្ថែមទៀត។ លោកបានបញ្ជាក់បន្ថែមថា ជនសង្ស័យ ប្រុសស្រីទាំង០៧នាក់ ខាងលើត្រូវបានលោក សំរិទ្ធ សុខុន ព្រះរាជអាជ្ញារងអមសាលាដំបូងខេត្តសៀមរាបសម្រេចឱ្យ ឃាត់ខ្លួនបណ្តោះអាសន្ន នៅស្នងការដ្ឋាននគរបាលខេត្តសៀមរាប ដើម្បីរៀបចំកសាងសំណុំរឿងបញ្ជូនទៅសាលាដំបូងខេត្ត ចាត់ការបន្តទៅតាមនីតិវិធី៕
ចែករំលែកព័តមាននេះ