រាជធានីភ្នំពេញ ៖ រយៈពេល១២ថ្ងៃកន្លងមកហើយដែលកម្មករ កម្មការិនីរោងចក្រផលិតស្បែកជើង “ម៉េងដាហ្វូតវៀរអ៊ិនដាសស្ទ្រៀល ខូអិលធីឌី” ដែលមានទីតាំង ស្ថិតនៅក្នុងភូមិចោមចៅ សង្កាត់ចោមចៅ១ ខណ្ឌពោធិ៍សែនជ័យ។ បានធ្វើកូដកម្មមិនព្រមចូលធ្វើការ ដើម្បីទាមទារឲ្យថៅកែដោះស្រាយលក្ខខណ្ឌការងារមួយចំនួន និងអះអាងថា រោងចក្រដូថៅកែថ្មី។ ដែលការតវ៉ានោះកាលពីថ្ងៃផ្ទុះដំបូងកម្មករទាំងនោះ បានធ្វើការបិទផ្លូវវេងស្រេង បង្កឲ្យមានការកកស្ទះចរាចរណ៍រាប់ម៉ោងថែមទៀតផង។ហើយបើទោះបីជាខាងរោងចក្របានចេញសេចក្ដីប្រកាសថា មិនមានការដូថៅកែថ្មី និងឲ្យកម្មករចូលធ្វើការវិញក៏ដោយ ក៏កម្មករខាងលើនៅតែមិនជឿ និងមិនព្រមចូលធ្វើការវិញឡើយ។
តាមប្រភពព័ត៌មានបានឲ្យដឹងថា លុះដល់វេលាម៉ោង១០ និង៣០នាទីព្រឹក ថ្ងៃទី១២ ខែធ្នូ ឆ្នាំ២០១៧ គណៈកម្មការចម្រុះ១ក្រុមរួមមាន លោក យិន គា នាយករដ្ឋបាលសាលាខណ្ឌពោធិ៍សែនជ័យ លោក យឹម សារ៉ាន់ អធិការនគបាលខណ្ឌ លោក រស់ សារ៉ាឌី នាយប៉ុស្តិ៍នគរបាលចោមចៅ១ លោក ស៊ូ ខន តំណាងសាលាសង្កាត់ចោមចៅ១។ ក្រោមការដឹកនាំដោយលោក រៀល សុភិន ព្រះរាជអាជ្ញារងនៃអយ្យការអមសាលាដំបូងរាធានីភ្នំពេញ និងលោក ឡោ សហឺ ជាអាជ្ញាសាលានៃអយ្យការអមសាលាដំបូងរាធានីភ្នំពេញ។ បានចុះទៅអនុវត្តនូវដីការក្សាការពារ លេខ៥១១ “ធ ដ រ” ចុះថ្ងៃទី៨ ខែធ្នូ ឆ្នាំ២០១៧។
ដោយបានបង្គាប់ឲ្យកម្មករកម្មការិនីទាំងអស់បោះបង់ចោលកូដកម្ម និងចូលធ្វើការងារតាមតួនាទី និងទីកន្លែងរៀងៗខ្លួនវិញ ក្នុងរយៈពេល៤៨ម៉ោង ក្នុងករណីមិនចូលធ្វើការតាមការកំណត់សន្មត់ថាមានកំហុសធ្ងន់។ ប្រភពដដែលបានបន្តថា គណៈកម្មការចម្រុះខាងលើបានអានដីកាសម្រេចការពារនៅចំពោះមុខកម្មករកម្មការិនីជាង៥០០នាក់ ហើយពួកគេមិនបានធ្វើការជំទាស់តវ៉ា ឬបញ្ជូនតំណាងឲ្យធ្វើការតវ៉ា និងជំទាស់ទៅនឹងដីកានោះឡើយ។
ប៉ុន្តែពួកគេបានដាក់លិខិតស្នើសុំឲ្យក្រុមហ៊ុនផ្ដល់ប្រាក់ប្រចាំឆ្នាំដល់កម្មករទាំងអស់ ព្រោះចាប់តាំងពីរោងចក្រដំណើរមកទល់នឹងឆ្នាំ២០១៧នេះច្រើនឆ្នាំកន្លងមកហើយមិនដែលផ្ដល់ប្រាក់ប្រចាំឆ្នាំដល់ពួកគេឡើយ។ សូមបញ្ជាក់ផងដែរថា កម្មករកម្មការិនីចំនួនជាង៥០០នាក់ ដែលបម្រើការងារនៅរោងចក្រផលិតស្បែកជើង “ម៉េងដាហ្វូតវៀរអ៊ិនដាសស្ទ្រៀលកូអិលធីឌី” នោះបានផ្ទុះ បាតុកម្មដំបូង និងបានបិទផ្លូវវេងស្រង កាលពីវេលាម៉ោង៩ និង១០នាទីព្រឹក ថ្ងៃទី១ ខែធ្នូ ឆ្នាំ២០១៧ នៅត្រង់ចំណុចមុខរោងចក្រមួយនោះ ដែលមានទីតាំងស្ថិតនៅក្នុងភូមិចោមចៅ សង្កាត់ចោមចៅ១ ខណ្ឌពោធិ៍សែនជ័យ រាជធានីភ្នំពេញ។ ពួកកម្មករធ្វើការតវ៉ាទាមទារលក្ខខណ្ឌការងារមួយចំនួនជាពិសេសសុំឲ្យថៅកែជនជាតិចិនទូទាត់ប្រាក់បំណាច់ និងប្រាក់អតីតភាពការងារ បន្ទាប់ពីបានដឹងថារោងចក្រផ្លាស់ប្ដូរថៅកែថ្មី ដែលបានបង្កឲ្យមានការកកស្ទះចរាចរណ៍នៅលើកំណាត់ផ្លូវនោះ១ថ្ងៃតែម្ដង។
ដោយបិទពេលព្រឹកមានរយៈពេលជិត២ម៉ោង រហូតដល់អាជ្ញាធរខណ្ឌពោធិ៍ សែនជ័យរួមជាមួយលោក យឹម សារ៉ាន់ អធិការនគរបាលខណ្ឌចុះទៅជួបធ្វើការសម្របសម្រួលទើបកម្មករកម្មការិនីទាំងនោះ ព្រមបើកផ្លូវឡើងវិញនៅរង់ចាំតំណាងរបស់ពួកគាត់ដោះស្រាយជាមួយ ថៅកែរោងចក្រសិន។ លុះក្រោយមកការដោះស្រាយគ្នាអត់ត្រូវពួកកម្មករបានបន្តបិទផ្លូវនាវេលាម៉ោងជាង២រសៀលថ្ងៃដដែលនោះទៀត ហើយរហូតដល់វេលាយប់ទើបបើកឡើងវិញ ដោយឡែកនៅថ្ងៃបន្តបន្ទាប់មកទៀតមិនបានបិទផ្លូវទៀតទេ ប៉ុន្តែពួកគេមិនព្រមចូលធ្វើការឡើយ ដែលគិតមកដល់ថ្ងៃអនុវត្តដីកានេះមានរយៈពេល១២ថ្ងៃកន្លងមកហើយ៕
https://youtu.be/apWIdGMcR1s
ចែករំលែកព័តមាននេះ