រាជធានីភ្នំពេញ ៖ អង្គភាពប្រឆាំងអំពើពុករលួយ ហៅកាត់ថា ACU នៅរសៀលថ្ងៃទី១២ខែធ្នូ នេះបានរៀបចំទិវាជាតិប្រឆាំងអំពើពុករលួយប្រឆាំងឆ្នាំ៩ធ្នូ ក្រោមប្រធានបទ «បេះដូងគ្រូពេទ្យ បេះដូងប្រជាជន» ប្រព្រឹត្តទៅនៅវិទ្យាស្ថានបច្ចេកទេសកម្ពុជា ដែលមានការចូលរួមពីមន្ត្រីរដ្ឋាភិបាល មន្ត្រីអង្គភាពប្រឆាំងំពើពុករលួយ គ្រូពេទ្យ ព្រះសង្ឃ សិស្ស និស្សិត ប្រមាណ៤០០០នាក់។
លោកទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយបានថ្លែងក្នុងពិធីថា គ្រូពេទ្យជាង៥០០០នាក់ គ្រូពេទ្យស្ម័គ្រចិត្ត គ្រូពេទ្យស្ថិតក្រោមក្រសួងសុខាភិបាលត្រូវបានអង្គភាពប្រឆាំងអពើពុករលួយត្រួតពិនិត្យយ៉ាងម៉ត់ចត់។
លោកឱម យ៉ិន ទៀង បានបន្តថា៖ «គ្រូពេទ្យបានធ្វើឲ្យសង្គមយើងមានសុខដុមរមនា គ្រប់និន្ននាការ គ្រប់សមាសភាពទាំងអស់»។ លោកទេសរដ្ឋមន្ត្រីប្រធានACUបានបញ្ជាក់ថា ការជួបជុំគ្នានេះដើម្បីប្រារព្ធទិវាជាតិ និងអន្តរជាតិប្រយុទ្ធប្រឆាំងនឹងអំពើពុករលួយថ្ងៃទី៩ធ្នូ ដើម្បីបង្កើននូវផលវិជ្ជមាន និងការទប់ស្កាត់ ការបង្ការជាមុននូវការប្រឆាំងអំពើពុករលួយ។
លោកបន្តថា សមិទ្ធផលទាំងនេះបានមកពីការចូលរួមទាំងអស់គ្នា ជាក់ស្តែងក្រសួងអប់រំបានចូលរួមជាមួយរដ្ឋាភិបាលបានដាក់ចេញវិធានការមួយសម្រាប់វិស័យអប់រំ គឺ «អ្នកចេះជាប់»។ លោកទេសរដ្ឋមន្ត្រីបន្តថា ៖ ចំណុចសំខាន់របស់ក្រសួងអប់រំ គឺការដាក់បញ្ជូនសៀវភៅស្តីពីការប្រឆាំងអំពើពុករលួយ ក្នុងរយៈពេល៣ឆ្នាំជាប់គ្នានេះតាំងពីថ្នាក់ទី៤ដល់ទី១២។ នេះជាចំណុចបង្ហាញថា រដ្ឋាភិបាលមិនបានធ្វេសប្រហេស មិនបានព្រងើយកន្តើយ បញ្ជូនភាពស្អាតស្អំដល់ទំពាំងស្នងឫស្សីរបស់ជាតិនៅថ្ងៃមុខផង។
ចែករំលែកព័តមាននេះ