រាជធានីភ្នំពេញ ៖ សហភាពអឺរ៉ុបនៅថ្ងៃអង្គារ៍ បានប្រកាសជាផ្លូវការសម្រេច «ផ្អាកជំនួយ» ដល់គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប ដោយផ្អែកលើទិដ្ឋភាពនៃការសម្រេចចិត្តដោយតុលាការកំពូលចុះថ្ងៃទី ១៦ វិច្ឆិកា បញ្ជាឱ្យរំលាយចោលគណបក្សសង្គ្រោះជាតិ ។ នេះបើយោងតាមសេចក្តីប្រកាសព័ត៌មានរបស់ សហភាពអឺរ៉ុប។
សហភាពអឺរ៉ុបលើកឡើងថា ខ្លួនពេញចិត្តគាំទ្រនូវដំណើរការបោះឆ្នោតក្រុមប្រឹក្សាឃុំ-សង្កាត់ដែលប្រារព្ធធ្វើកាលពីថ្ងៃទី ៤ មិថុនា ឆ្នាំ២០១៧ កន្លងទៅ ដែលការបោះឆ្នោតមួយនេះ ត្រូវបានទទួលស្គាល់យ៉ាងទូលំទូលាយថា គ.ជ.ប បានធ្វើឡើងប្រកបដោយវិជ្ជាជីវៈ និងមានស្តង់ដា ប្រកបដោយតម្លាភាព និងភាពជឿជាក់ខ្ពស់។ ជាពិសេសគឺមានអ្នកបោះឆ្នោតបានអញ្ជើញទៅបោះឆ្នោតចំនួនយ៉ាងច្រើន ដែលបង្ហាញពីជំនឿចិត្តលើប្រព័ន្ធបោះឆ្នោត។
តែក្រោយៗមកទៀត វាមានព្រឹត្តិការណ៍ជាច្រើនបានកើតមានដែលអាជ្ញាធរបានចាត់វិធានការប្រឆាំងនឹងបក្សប្រឆាំង ដែលបានឈ្នះអាសន្នៈដល់ទៅ ៤៤,៥% កាលពីបោះឆ្នោតជាតិ២០១៣ និងទទួលបានសម្លេងឆ្នោត ៤៣,៨% នៃការបោះឆ្នោតក្រុមប្រឹក្សាឃុំ-សង្កាត់ឆ្នាំ២០១៧។
សេចក្តីប្រកាសព័ត៌មានរបស់ EU បញ្ជាក់ថា៖ ការសម្រេចចិត្តរំលាយគណបក្ស CNRP និងការយកអាសន្នៈ នៅរដ្ឋសភា និងអាសន្នៈឃុំ-សង្កាត់របស់គណបក្សប្រឆាំង អនុវត្តបែងចែកទៅឱ្យគណបក្សនយោបាយផ្សេងៗទៀត គឺជាការប្រឆាំងនឹងសិទ្ធិអ្នកបោះឆ្នោត២០១៣ និង ២០១៧។
EU សង្កត់ធ្ងន់ថា៖ «ការរំលាយគណបក្ស CNRP ក៏មានន័យថា វាមិនអាចមានលទ្ធភាពរៀបចំការបោះឆ្នោតរដ្ឋសភាឆ្នាំ២០១៨បានទេ»។ ដំណើរការបោះឆ្នោតមួយ ដែលគណបក្សប្រឆាំងដ៏សំខាន់មួយត្រូវបានដកចេញតាមអំពើចិត្ត មិនអាចត្រូវបានគេមើលឃើញថា ស្របច្បាប់នោះទេ។
យ៉ាងណាមិញ អ្នកនាំពាក្យ គ.ជ.ប បានសម្តែងការសោកស្តាយដែល EU យកបញ្ហានយោបាយមកភ្ជាប់ជាមួយនឹងស្ថាប័ន គ.ជ.ប៕
ចែករំលែកព័តមាននេះ