រាជធានីភ្នំពេញ ៖ ពីរនាក់ប្តីប្រពន្ធជិះម៉ូតូម្នាក់មួយគ្រឿងបណ្តើរគ្នាមកពីក្រុងតាខ្មៅ លុះមកដល់ខាងមុខស្ថានទូតជប៉ុនបុរសជាប្តីគេចពីរថយន្តទៅប៉ះដៃចង្កូតម៉ូតូស្ត្រីជាប្រពន្ធ បណ្តាលឱ្យខ្ទាតដួលទៅលើចិញ្ចើមផ្លូវបែកមុខមាត់ហូរឈាម ។ ហេតុការណ៍នេះដែរបានកើតឡើងកាលពីវេលាម៉ោង១០នឹង៣០នាទីព្រឹក ថ្ងៃទី១២ ខែធ្នូ ឆ្នាំ២០១៧…
រាជធានីភ្នំពេញ ៖ ពីរនាក់ប្តីប្រពន្ធជិះម៉ូតូម្នាក់មួយគ្រឿងបណ្តើរគ្នាមកពីក្រុងតាខ្មៅ លុះមកដល់ខាងមុខស្ថានទូតជប៉ុនបុរសជាប្តីគេចពីរថយន្តទៅប៉ះដៃចង្កូតម៉ូតូស្ត្រីជាប្រពន្ធ បណ្តាលឱ្យខ្ទាតដួលទៅលើចិញ្ចើមផ្លូវបែកមុខមាត់ហូរឈាម ។ ហេតុការណ៍នេះដែរបានកើតឡើងកាលពីវេលាម៉ោង១០នឹង៣០នាទីព្រឹក ថ្ងៃទី១២ ខែធ្នូ ឆ្នាំ២០១៧ នៅចំណុចខាងមុខស្ថានទូតជប៉ុន ផ្លូវព្រះនរោត្តម ក្នុងសង្កាត់ទន្លេបាសាក់ ខណ្ឌចំការមន ។
ស្ត្រីរងគ្រោះមានឈ្មោះ លាង ចាន់ថា អាយុ៥៧ឆ្នាំ មុខរបរលក់ដូរ និងបុរសជាប្តីឈ្មោះ អ៊ុន ស៊ីណារ៉ូ អាយុ៥៨ឆ្នាំ មុខរបរអ្នកភ្លេង មានទីលំនៅម្តុំគីឡូលេខ៧ ខណ្ឌឬស្សីកែវ ។ មុនពេលកើតហេតុពីរនាក់ប្តីប្រពន្ធខាងលើបានជិះម៉ូតូចំនួនពីរគ្រឿងដោយស្ត្រីជាប្រពន្ធជិះម៉ាកហុងដាC125 ពណ៌ខ្មៅ ពាក់ស្លាកលេខ ភ្នំពេញ ១AK-០៤០៤ មួយគ្រឿង ហើយបុរសជាប្តីជិះម៉ូតូម៉ាកវ៉េវ ពណ៌ខ្មៅ ពាក់ស្លាកលេខ ភ្នំពេញ ១CM-០៤៣៦ មួយគ្រឿងទៀត បណ្តើរគ្នាមកពីក្រុងតាខ្មៅក្នុងបំណងទៅផ្ទះរបស់ពួកគាត់នៅឯគីឡូលេខ៧ ។
លុះពួកគាត់ទាំងពីរនាក់ជិះម៉ូតូទន្ទឹមគ្នាមកដល់ចំណុចកើតហេតុខាងលើ ក៏ស្រាប់តែមានរថយន្តមិនស្គាល់ម៉ាកមួយគ្រឿងបើកបរយ៉ាងលឿនមកពីក្រោយ ហើយបុរសជាប្តីក៏បានព្យាយាមកាច់ចង្កូតគេចចេញទៅប៉ះដៃចង្កូតម៉ូតូរបស់ស្ត្រីជាប្រពន្ធបណ្តាលឱ្យដួលខ្ទាតទៅលើចិញ្ចើមផ្លូវបណ្តាលឱ្យបែកមុខបែកមាត់ហូរឈាមស្រោចពេញខ្លួនរងរបួសយ៉ាងធ្ងន់ធ្ងរ ហើយក៏បានទៅប៉ះនឹងម៉ូតូម៉ាកហុងដា C125 ពណ៌ខ្មៅ ស៊េរីឆ្នាំ២០១៧ មួយគ្រឿងដែលជារបស់មន្ត្រីនគរបាលយាមស្ថានទូតម្នាក់រងកាខូចខាតផងដែរ ។
ក្រោយពេលកើតហេតុកម្លាំងមានសម្ថកិច្ចមូលដ្ឋានក៏បានចុះទៅដល់ និងហៅរថយន្តសាមុយរបស់មន្ទីរពេទ្យបង្អែកមានជ័យមកដឹកយកទៅសង្គ្រោះ ចំណែកឯម៉ូតូរបស់ជនរងគ្រោះទាំងពីរគ្រឿងត្រូវបានកូនប្រុសម្នាក់របស់ជនរងគ្រោះទាំងពីរនាក់មកទទួលយកទៅផ្ទះវិញ និងធ្វើការសងថ្លៃខូចខាតចំនួន១៥ដុល្លារទៅដល់ម៉ូតូដែលរងការខូចខាតជារបស់មន្ត្រីនគរបាលយាមស្ថានទូតបញ្ចប់រឿងផងដែរ ៕
ចែករំលែកព័តមាននេះ