រាជធានីភ្នំពេញ ៖ អាជ្ញាធររាជធានីភ្នំពេញបានអះអាងថា មកដល់ពេលនេះមានរយៈពេល៤ខែហើយ ដែលអាជ្ញាធររាជធានី បានកំណត់យកអាទិភាពក្នុងផែនការរៀបចំសណ្ដាប់ធ្នាប់តាមចិញ្ចើមផ្លូវធំៗ ចំនួន១១ខ្សែ ប៉ុន្តែប្រជាពលរដ្ឋមួយចំនួនតូចនៅតែមិនចូលរួមសហការជាមួយអាជ្ញាធរ ដោយពួកគាត់នៅតែបន្តយករថយន្ត ឬម៉ូតូ…
រាជធានីភ្នំពេញ ៖ អាជ្ញាធររាជធានីភ្នំពេញបានអះអាងថា មកដល់ពេលនេះមានរយៈពេល៤ខែហើយ ដែលអាជ្ញាធររាជធានី បានកំណត់យកអាទិភាពក្នុងផែនការរៀបចំសណ្ដាប់ធ្នាប់តាមចិញ្ចើមផ្លូវធំៗ ចំនួន១១ខ្សែ ប៉ុន្តែប្រជាពលរដ្ឋមួយចំនួនតូចនៅតែមិនចូលរួមសហការជាមួយអាជ្ញាធរ ដោយពួកគាត់នៅតែបន្តយករថយន្ត ឬម៉ូតូ និងការតាំងលក់ទំនិញផ្សេងៗរំលោភលើចិញ្ចើម និងទ្រូងផ្លូវដដែល ទោះបីជាអាជ្ញាធរបានធ្វើការណែនាំច្រើនលើកច្រើនសារក្តី ប៉ុន្តែចាប់ពីពេលនេះតទៅពួកគាត់ នឹងត្រូវមានលក្ខខណ្ឌចុងក្រោយ និងឈានទៅដល់ការប្រឈមទៅនិងវិធានការរដ្ឋបាល ឬក៏ត្រូវបិទអាជីវកម្មនោះតែម្តង ។
លោក ម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញ បានឲ្យដឹងថា ជាគោលការដែលមានស្រាប់គឺរដ្ឋបាលរាជធានីភ្នំពេញ បានប្រគល់ការងារនេះទៅឲ្យថ្នាក់ខណ្ឌសង្កាត់ ដើម្បីឲ្យចុះអប់រំណែនាំប្រជាពលរដ្ឋមួយចំនួនតូចនោះ កុំឲ្យយករថយន្ត ឬម៉ូតូ និងការតាំងលក់ទំនិញផ្សេងៗរំលោភលើចិញ្ចើមផ្លូវ ឬលើទ្រូងផ្លូវ ឬក៏ការចតយានជំនិះលើចំណតរថយន្តក្រុងដឹកអ្នកដំណើរសាធារណៈជាដើម ។
លោកបន្តថា ក្នុងរយៈពេលកន្លងមក អាជ្ញាធរបានធ្វើការអប់រំណែនាំជាច្រើនលើកច្រើនសារមកហើយ រួមទាំងការព្រមានទៀតផង តែចាប់ពីពេលនេះតទៅពួកគាត់នឹងត្រូវមានលក្ខខណ្ឌចុងក្រោយ នឹងឈានទៅដល់ការប្រឈមវិធានការរដ្ឋបាល ឬក៏ត្រូវបិទអាជីវកម្មនោះតែម្តង ប្រសិនបើពួកគាត់នៅតែមិនព្រមស្តាប់តាមទៀតនោះ ។
លោក ម៉េត មាសភក្តី បានឲ្យដឹងទៀតថា ក្នុងរយៈពេល៤ខែកន្លងមក ការរៀបចំសណ្ដាប់ធ្នាប់ផ្លូវធំៗអាទិភាពទាំង១១ខ្សែរបស់រដ្ឋបាលរាជធានីភ្នំពេញ ព្រមទាំងមានការជូនដំណឹងអប់រំណែនាំដល់ប្រជាពលរដ្ឋ និងអាជីវករដែលរំលោភយកចិញ្ចើមផ្លូវទ្រូវផ្លូវយកធ្វើជាកម្មសិទ្ធិរបស់ខ្លួនច្រើនលើកច្រើនសារមកហើយនោះ មានប្រជាពលរដ្ឋប្រមាណ៨០%ទៅ៩០% បានសហការ និងមានការយល់ដឹង និងចូលរួមជាមួយអាជ្ញាធរ ប៉ុន្តែក៏នៅប្រជាពលរដ្ឋមួយចំនួនតូចក្នុងចន្លោះពី១០ទៅ២០%មិនទាន់មានការចូលរួម គឺនៅតែរំលោភ និងបំពានទៅនឹងបម្រាមរបស់អាជ្ញាធរដដែរ ។
លោកបន្តថា ប្រជាពលរដ្ឋអាចប្រើប្រាស់បានតែចិញ្ចើមផ្លូវត្រឹម១ភាគ៣ប៉ុណ្ណោះ ដោយទុក២ភាគ៣ទៀតសម្រាប់អ្នកថ្មើរជើង ប៉ុន្តែរហូតមកដល់ពេលនេះ អ្នករំលោភបំពាននៅតែមាន តែទោះជាយ៉ាងណាអាជ្ញាធរ និងធ្វើការកោះហៅប្រជាពលរដ្ឋ និងអាជីវករដែល នៅតែរំលោភផ្លូវ និងចិញ្វើមផ្លូវទាំងអស់នោះ ដើម្បីប្រជុំណែនាំ និងដាក់លក្ខខណ្ឌចុងក្រោយ ។
លោក ម៉េត មាសភ័ក្ដី បានឲ្យដឹងទៀតថា បើពួកគាត់នៅតែតាំងលក់ទំនិញ ឬចតរថយន្តលើចិញ្ចើមផ្លូវ និងទ្រូងផ្លូវសាធារណៈទៀត ដាច់ខាតត្រូវតែមានវិធានការរដ្ឋបាល ជាពិសេសត្រូវស្ទូចរថយន្តទាំងនោះយកទៅរក្សាទុក ដើម្បីមានវិធានការទៅតាមច្បាប់ ចំណែកការតាំងលក់ទំនិញផ្សេងៗដែលរំលោភនោះអាចនឹងឈានដល់ការបិទអាជីវកម្មទាំងស្រុងតែម្តង ៕
ចែករំលែកព័តមាននេះ