រាជធានីភ្នំពេញ ៖ ជនសង្ស័យជាមេគំនិតម្នាក់ និងបក្សពួកចំនួន២នាក់ រួមទាំងអ្នករត់ម៉ូតូរ៉ឺម៉កម៉ូតូកង់បីម្នាក់ទៀតផង(សរុប៤នាក់) ត្រូវកម្លាំងនគរបាលប៉ុស្តិ៍ទន្លេបាសាក់ធ្វើការចាប់ក្របួចជាប់ទាំងអស់ ការចាប់ឃាត់ខ្លួនធ្វើឡើងកាលពីវេលាម៉ោង១១និង៣០នាទីព្រឹកថ្ងៃទី១២ ខែធ្នូ ឆ្នាំ ២០១៧…
រាជធានីភ្នំពេញ ៖ ជនសង្ស័យជាមេគំនិតម្នាក់ និងបក្សពួកចំនួន២នាក់ រួមទាំងអ្នករត់ម៉ូតូរ៉ឺម៉កម៉ូតូកង់បីម្នាក់ទៀតផង(សរុប៤នាក់) ត្រូវកម្លាំងនគរបាលប៉ុស្តិ៍ទន្លេបាសាក់ធ្វើការចាប់ក្របួចជាប់ទាំងអស់ ការចាប់ឃាត់ខ្លួនធ្វើឡើងកាលពីវេលាម៉ោង១១និង៣០នាទីព្រឹកថ្ងៃទី១២ ខែធ្នូ ឆ្នាំ ២០១៧ នៅផ្ទះលេខ៧Eo ផ្លូវលេខ២៩៤ ក្នុងសង្កាត់ទន្លេបាសាក់ ខណ្ឌចំការមន ។
នគរបាលបានប្រាប់ឱ្យដឹងថា បុរសជាជនសង្ស័យទាំង៤នាក់ ឃាត់ខ្លួនទី១-ឈ្មោះជុំ ពិសាល អាយុ២៦ឆ្នាំ មុខរបរជាងកញ្ចក់(ជាមេគំនិត) ស្នាក់នៅក្នុងសង្កាត់ចាក់អង្រែក្រោម ខណ្ឌមានជ័យ មានស្រុកកំណើតនៅភូមិព្រៃផ្តៅ ឃុំស្តៅកោង ស្រុកបាភ្នំ ខេត្តព្រៃវែង ទី២-ឈ្មោះត្រឺ ខេមរិ អាយុ២៦ឆ្នាំ មុខរបរត់ម៉ូតូឌុប ទីលំនៅក្នុងសង្កាត់បឹងទំពុន ខណ្ឌមានជ័យ ទី៣-ឈ្មោះរង ទិត្យ អាយុ២៦ឆ្នាំ មុខរបរកម្មករ ទីលំនៅក្នុងក្រុងតាខ្មៅ ខេត្តកណ្តាល និងទី៤-ឈ្មោះប៉ា សារិទ្ធ អាយុ៣៦ឆ្នាំ មុខរបររត់ម៉ូតូរ៉ឺម៉កកង់បី មានទីលំនៅក្នុងសង្កាត់ទួលសង្កែ ខណ្ឌឬស្សីកែវ ។
មុនពេលកើតហេតុបុរសជាជនសង្ស័យជាមេគំនិតខាងលើ បានទៅបបួលបុរសជាបក្សពួកចំនួនពីរនាក់ និងថែមទាំងហៅម៉ូតូរ៉ឺម៉កកង់បីចំនួន១គ្រឿងផងដែរ ពីម្តុំបឹងទំពុននាំគ្នាមកលើក និងដឹកគ្រែឈើចំនួន១ ពីផ្ទះខាងលើ ពេលនោះដោយក្រុមកម្មករធ្វើការជួសជុលផ្ទះខាងលើបានចំណាំ និងស្គាល់បុរសម្នាក់ជាជនសង្ស័យខាងលើក៏ប្តឹងកម្លាំងសម្ថកិច្ចចាប់ឃាត់ខ្លួនទាំង៤នាក់តែម្តង ។ ប្រភពប្រាប់បន្តទៀតថា កាលពីថ្ងៃទី០២ ខែធ្នូ កន្លងមកនេះ បុរសជាម្ចាស់ផ្ទះខាងលើបានធ្វើការរើផ្ទះរបស់គាត់នៅម្តុំសន្សំកុសល និងបានជួលរថយន្ត បុរសជាជនសង្ស័យឈ្មោះ ជុំ ពិសាល ឱ្យមកដឹក តុ ទូ កៅអី រួមទាំងគ្រឿងសង្ហារឹមមួយចំនួនទៀត ដែលសុទ្ធតែធ្វើអំពីបេង គ្រញូង និងមានតម្លៃជាង៣ពាន់ដុល្លារ យកមកទុកនៅផ្ទះរបស់គាត់មួយកន្លែងទៀតខាងលើ ។ លុះដល់ថ្ងៃទី០៤ ខែធ្នូ ខណៈដែលរូបគាត់ចេញទៅខេត្តបាត់មិននៅផ្ទះ បុរសជាជនសង្ស័យយករថយន្តកូរ៉េមួយគ្រឿងមកដឹកយកចេញទៅបាត់ ដោយបានប្រាប់ក្រុមជាងនៅទីនោះថា «អ៊ុំប្រុសម្ចាស់ផ្ទះឲ្យមកដឹកយកទៅផ្ទះរបស់គាត់» ។ លុះក្នុងថ្ងៃទី០៧ ខែធ្នូ បុរសជាម្ចាស់ផ្ទះក៏បានមកដាក់ពាក្យបណ្តឹងនៅនគរបាលប៉ុស្តិ៍ទន្លេបាសាក់ លុះមកដល់ថ្ងៃ រូបគេបានហៅបក្សពួកចំនួន២នាក់ និងម៉ូតូរ៉ឺម៉កកង់បីចំនួនមួយគ្រឿងទៀតផងដែរ និងប្រើល្បិចដដែលក្នុងបំណងមកលើកយកគ្រែមួយទៀត ដោយក្រុមជាងៗធ្វើការនៅទីនោះចំណាំមុខ និងប្តឹងនគរបាលឲ្យចាប់ឃាត់ខ្លួនភ្លាមៗតែម្តង ។
ក្រោយពេលកើតហេតុ បុរសជាជនសង្ស័យជាមេគំនិត និងបុរស២នាក់ដែលគេហៅឲ្យមកជួយលើក និងបុរសជាម្ចាស់ម៉ូតូរ៉ឺម៉កកង់៣ម្នាក់ទៀត(សរុប៤នាក់) នាំមកធ្វើការសាកសួរ និងកំណត់ហេតុនៅនគរបាលប៉ុស្តិ៍ទន្លេបាសាក់ ដើម្បីបញ្ជូនទៅកាន់អធិការដ្ឋាននគរបាលខណ្ឌចំការមនចាត់ការទៅតាមផ្លូវច្បាប់ជាបន្តទៅទៀត ៕
ចែករំលែកព័តមាននេះ