ខេត្តបន្ទាយមានជ័យ ៖ ក្មេងប្រុសសិស្សសាលាម្នាក់បានស្លាប់ពេលដឹកសង្គ្រោះទៅមន្ទីពេទ្យ ខណៈពេលរថយន្ត និង រថយន្តបើកកៀរគ្នាបោកកន្ទុយទៅប៉ះក្មេងកំពុងធ្វើដំណើរដោយជិះកង់ ។ ហេតុការណ៍បង្កឲ្យមានការភ្ញាក់ផ្អើលនេះបានកើតឡើងនៅវេលាម៉ោង៦និង៣០នាទីព្រឹកព្រលឹមថ្ងៃទី១១ ខែធ្នូ ឆ្នាំ២០១៧ នៅទីប្រជុំជន ផ្លូវជាតិលេខ៥ ស្ថិតក្នុងភូមិយាងថ្មី ឃុំកូប ស្រុកអូរជ្រៅ បន្ទាយមានជ័យ ។
លោកវរសេនីយ៍ត្រីសែស វិបុល អធិការនគរបាលស្រុកអូរជ្រៅបានឲ្យដឹងថា អ្នកបើករថយន្តម៉ាកកាម៉ារី ពណ៌ទឹកមាស ផ្លាកលេខ បាត់ដំបង២A-៦៨០៧ ឈ្មោះឆាយ ចាន់ណាវី អាយុ៣២ឆ្នាំ ភេទស្រី មានទីលំនៅភូមិក្បាលស្ពាន សង្កាតប៉ោយប៉ែត បន្ទាយមានជ័យ និងអ្នកបើកបររថយន្ត ពណ៌សំបកឪឡឹក ផ្លាកលេខ ក្រុងប៉ៃលិន២A-០១២២ មិនត្រូវបានស្គាល់អត្តសញ្ញាណទេ អ្នកបើកគេចខ្លួនដោយបន្សល់ទុក តែរថយន្តនៅកន្លែងកើតហេតុ ។
លោកអធិការបានបញ្ជាក់ថា នៅមុនពេលកើតហេតុរថយន្ត ពណ៌សំបកឪឡឹក ស្លាកលេខក្រុងប៉ៃលិន ធ្វើដំណើរពីលិចទៅកើត ពេលដល់កន្លែងកើតហេតុ ស្រាប់តែមានរថយន្ត ពណ៌ទឹកមាស ស្លាកលេខ បាត់ដំបង២A- ៦៨០៧ បានបើកវ៉ាជែងគ្នា ស្របពេលនោះក៏មានរថយន្ត២គ្រឿងទៀតមកពីទិសខាងកើតទៅលិចបើកវ៉ាជែងគ្នាផងដែរ ។ ពេលនោះអ្នកបើកបររថយន្ត ឃើញដូច្នោះក៏វេរចង្កូតបត់ចូលកៀរនឹងរថយន្តមួយទៀតបោកកន្ទុយរថយន្តទៅប៉ះក្មេងសិស្សសាលាកំពុងជិះកង់ទៅសាលារៀន បណ្តាលឲ្យស្លាប់ខណៈពេលដឹកទៅមន្ទីរពេទ្យ ។ ចំណែករថយន្តក្រឡាប់ផ្ងាជើងឡើងលើ រថយន្តមួយកៀរក្មេងធ្លាប់ពីលើផ្លូវជាតិ ។
ជនរងគ្រោះឈ្មោះផល វិសិដ្ឋ អាយុ១៣ឆ្នាំ ភេទប្រុស រស់នៅភូមិយាងថ្មី ឃុំកូប ស្រុកអូរជ្រៅ ខេត្តបន្ទាយមានជ័យ ។ សពជនរងគ្រោះត្រូវបានប្រគល់ជូនក្រុមគ្រួសារយកទៅចាត់ចែងធ្វើបុណ្យតាមប្រពៃណី ។ រថយន្តទាំង២គ្រឿងត្រូវបានយកមករក្សាទុក នៅអធិការដ្ឋាននគរបាលស្រុកអូរជ្រៅ ដើម្បីរង់ចាំធ្វើការដោះស្រាយតាមនីតិវិធីច្បាប់ចរាចរណ៍ផ្លូវគោក ៕
ចែករំលែកព័តមាននេះ