ខេត្តត្បូងឃ្មុំ ៖ សំលេងរថយន្តពីរគ្រឿងបានបុកគ្នានៅលើផ្លូវជាតិលេខ៧លាន់ដូចរន្ទះដោយរថយន្តចំណុះ៥តោនបានរងការខូចខាតរហូតដល់ទៅដាច់កង់តែសំណាងមិនមានអ្នករងគ្រោះថ្នាក់ដល់អាយុជីវិតនោះទេ ។ ដែលហេតុការណ៏នេះកើតឡើងនៅព្រលប់ថ្ងៃទី១១ ខែធ្នូ ឆ្នាំ២០១៧ ត្រង់ចំណុចភូមិជីប៉េះ ឃុំមេមត់ ស្រុកមេមត់ រហូតដល់លោកអភិបាលនគរបាលស្រុកបានដឹកនាំកម្លាំងចុះមកពិនិត្យដោយផ្ទាល់ និងជួយសំរួលចរាចរណ៏តាមដងផ្លូវផងដែរ ។
លោក ម៉េង គា អាយុ៣៨ឆ្នាំ នៅភូមិអំពុក ឃុំក្រែក ស្រុកពញាក្រែក ប្រាប់ឲ្យដឹងថា នៅពេលមុនកើតហេតុរូបលោកបានឲ្យកម្មករបើករថយន្តឈ្មោះ ណូ អាយុ២៥ឆ្នាំ ដឹកដើមកៅស៊ូចេញពីក្រែកដើម្បីយកទៅដាក់នៅស្រុកមេមត់ លុះពេលដែលដាក់រួចរាល់ក៏បានបើករថយន្តត្រឡប់មកផ្ទះវិញតែគាត់បានបើករថយន្ត១គ្រឿងផ្សេងទៀតនាំមុខ ។
ម្ចាស់រថយន្តរូបនេះបានប្រាប់បន្តថា ស្របពេលដែលរថយន្តបានបើកប្រឡប់មកដល់ត្រង់ភូមិជីប៉េះក្នុងទិសដៅពីកើតមកលិចក៏ស្រាប់តែមានរថយន្ត១គ្រឿងធុនធំបានបើកបញ្ច្រាសទិសគ្នា សង្ស័យដោយសារចាំងភ្លើងរថយន្តទៅវិញទៅមកហើយកន្លែងគ្រោះថ្នាក់ក៏ងងឹតទៀត ។ ទើបបង្កឲ្យមានគ្រោះថ្នាក់ចរាចរណ៏កើតឡើងរថយន្តរបស់គាត់ដែលកម្មករបើកនោះបានរងការខូចខាតរហូតរបូតកង់ និងស្នាមអូសថ្នល់ជាច្រើនម៉ែត្រអ្នកបើកបររងរបួសត្រូវ.កដោយសារតែអំបែងកញ្ចក់រថយន្តខ្ទាតត្រូវ ។ រូបលោកសំណូមពរដល់ភាគីរថយន្តធំសូមឲ្យជួយចេញសំណងខ្លះ ដើម្បីជួសជុលរថយន្ត ។
លោកអនុសេនីយ៏ឯក ថាញ់ សុវ៉ាត អធិការរងនគរបាលស្រុកមេមត់ទទួលផែនសណ្តាប់ធ្នាប់ប្រាប់ឲ្យដឹងដែរថា ក្រោយពីមានករណីគ្រោះថ្នាក់ចរាចរណ៏កើតឡើងនោះលោកវរសេនីយ៏ទោ ហុង គឹមហឿន អធិការនគរបាលស្រុកមេមត់បានដឹកនាំកម្លាំងចុះមកដោយផ្ទាល់ ។ ដោយសារតែភាគីសងខាងបានធ្វើការសំរបសំរួលគ្នានោះគឺខាងរថយន្តធំព្រមចេញសំណងខ្លះមកឲ្យរថយន្តដែលរងការខូចខាតចំនួន៣៥០ដុល្លារដើម្បីជួសជុលរថយន្តដើម្បីបញ្ចប់រឿង ៕
ចែករំលែកព័តមាននេះ