ខេត្តកែប ៖ បើតាមមន្ត្រីនៃមន្ទីរទេសចរណ៍ខេត្តកែបបានអះអាងថា រហូតមកដល់ពេលនេះ បងប្អូនអាជីវករ ពាណិជ្ជករ នៅតែមកទាក់ទងដើម្បីសុំដាក់ស្ដង់តាំងលក់ និងបង្ហាញផលិតផលរបស់ខ្លួននៅក្នុងពិធីបុណ្យសមុទ្រ ដែលនឹងឈានមកដល់នាពេលដ៏ខ្លីខាងមុខនេះ ។
តាមការឲ្យដឹងពីប្រធានមន្ទីរទេសចរណ៍ខេត្ត កាលពីថ្ងៃទី៨ ធ្នូ បានបញ្ជាក់ថា រហូតមកដល់ថ្ងៃនេះ ស្តង់ដែលបានរៀបចំជាស្រេចមានចំនួន៤៨០ ដែលកន្លងមក រំពឹងថា មានត្រឹមតែ៤០០ស្តង់ប៉ុណ្ណោះ ហើយក៏នៅតែមានបងប្អូនមកទាក់ទងជាហូរហែ ។ នេះក៏ដោយសារតែពិធីបុណ្យសមុទ្រ ជុំទី២ឆ្នាំនេះ នឹងកាន់តែសប្បាយរីករាយ ដោយសារក្រសួងទេសចរណ៍ ក៏ដូចជាអាជ្ញាធរបានរៀបចំកែលម្អហេដ្ឋារចនាសម្ព័ន្ធនានារួចជាស្រេច ដើម្បីត្រៀមស្វាគមន៍ការមកដល់នៃភ្ញៀវទេសចរជាតិ និងអន្តរជាតិ ដែលតាមការរំពឹងទុកប្រមាណជាង១លាននាក់។ ជាមួយគ្នានេះ ក៏មានការរៀបចំល្បែងកម្សាន្ដយ៉ាងសម្បូរបែប ព្រមទាំងកីឡាជាច្រើនប្រភេទដើម្បីទស្សនាកម្សាន្ដផងដែរ ។ ដោយមើលឃើញពីការរៀបចំបែបនេះហើយ ទើបបងប្អូនអាជីវករ ពាណិជ្ជករ នៅតែសម្រុកមកទាក់ទងសុំកន្លែងដាក់ស្ដង់ដើម្បីលក់ ក៏ដូចជាមានឱកាសបង្ហាញផលិតផលរបស់ខ្លួននៅលើទីផ្សារ ។
លោក ប៉ុក ទាំង អនុប្រធានទេសចរណ៍ ក៏បានឲ្យដឹងដែរថា ពេលនេះ ស្តង់មានរហូតជិតដល់៥០០ស្ដង់ឯណោះ ហើយក៏នៅមានបងប្អូនអាជីវករជាច្រើននាក់មកទាក់ទងទៀតដែរ ប៉ុន្តែយើងមិនអាចទទួលបានទៀតទេ ។ លោកថា ៖ « រហូតមកដល់ថ្ងៃនេះ ក៏នៅមានប្រជាពលរដ្ឋ និងអាជីវករជាច្រើននាក់បានទាក់ទងសម្រាប់ជួលស្តង់ ប៉ុន្តែខាងយើងមិនអាចទទួលបានទៀតទេ សុំអធ្យាស្រ័យផង ព្រោះនេះជាចំនួនដែលខាងពិព័រណ៍ពាណិជ្ជកម្មកំណត់ឈប់ទទួល មិនមែនយើងខ្វះកន្លែងទេ » ។
លោកបានបញ្ជាក់ថា សម្រាប់ស្តង់ពិព័រណ៍ពាណិជ្ជកម្ម គឺកំណត់យកត្រឹមតែ២០០ស្តង់ទេ និងសល់ប៉ុន្មាន គឺសម្រាប់ស្ដង់តាំងផលិតផលក្នុងស្រុក ។
ក្នុងឱកាសដ៏វិសេសវិសាលនៃព្រឹត្តិការណ៍បុណ្យសមុទ្រដែលខិតជិតមកដល់នេះ សម្តេចតេជោ ហ៊ុន សែន បានអំពាវនាវដល់ក្រសួង-ស្ថាប័នពាក់ព័ន្ធ អាជ្ញាធរគ្រប់លំដាប់ថ្នាក់ កងកម្លាំងប្រដាប់អាវុធគ្រប់ប្រភេទ បងប្អូនជនរួមជាតិទាំងអស់ និងវិស័យឯកជន ចូលរួមឲ្យបានផុសផុលប្រកបដោយស្មារតីទទួលខុសត្រូវខ្ពស់ធ្វើឲ្យពិធីបុណ្យសមុទ្រនៅឆ្នាំនេះប្រកបដោយភាពជោគជ័យ ។ លើសពីនេះទៀត សម្ដេចបានអំពាវនាវដល់ប្រតិបត្តិករទេសចរជាតិ និងអន្តរជាតិ អាជ្ញាធរមូលដ្ឋាន និងបងប្អូនប្រជាពលរដ្ឋចូលរួមឲ្យបានសកម្មក្នុងចលនាប្រឡងប្រណាំង «ទីក្រុងស្អាត រមណីយដ្ឋានស្អាត សេវាល្អ បដិសណ្ឋារកិច្ចល្អ» និងសហការថែរក្សា សោភ័ណភាព អនាម័យ បរិស្ថាន ដែលជាកត្តាចម្បងមិនអាចខ្វះបានក្នុងការថែរក្សាតំបន់ឆ្នេរសមុទ្រឲ្យស្រស់ស្អាតយូរអង្វែង ដើម្បីបន្តជាមរតកដល់កូនចៅជំនាន់ក្រោយ ។
សូមរំឭកថា ព្រឹត្តិការណ៍បុណ្យសមុទ្រលើកទី៥ នៅខេត្តព្រះសីហនុ រយៈពេល៣ថ្ងៃ កាលពីឆ្នាំ២០១៦ មានភ្ញៀវទេសចរជាតិ-អន្តរជាតិចូលរួមទស្សនាជាង៥០ម៉ឺននាក់ និងទទួលបានជោគជ័យយ៉ាងធំធេង ហើយនៅឆ្នាំ២០១៧នេះ រាជរដ្ឋាភិបាលកម្ពុជា បានកំណត់យកថ្ងៃទី២២-២៣-២៤ ខែធ្នូ ឆ្នាំ២០១៧ ជាកាលបរិច្ឆេទប្រារព្ធពិធីបុណ្យសមុទ្រលើកទី៦ ជុំទី២ នៅខេត្តកែប ។ ព្រឹត្តិការណ៍ទេសចរណ៍ដ៏ធំនេះ នឹងបើកជាផ្លូវការក្រោមអធិបតីភាពដ៏ខ្ពង់ខ្ពស់របស់សម្ដេចតេជោនាយករដ្ឋមន្ត្រី ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន នាថ្ងៃទី២៣ ធ្នូ នៅមុខសាលាខេត្តកែប ក្រោមប្រធានបទ «ឆ្នេរសមុទ្របៃតង ៖ អនាគត គឺបច្ចុប្បន្ន» និរន្តរភាពទេសចរណ៍ ដើម្បីអភិវឌ្ឍន៍ ក្រោមការសម្រេចពីរាជ រដ្ឋាភិបាលកម្ពុជា ៕
ចែករំលែកព័តមាននេះ