ខេត្តព្រះសីហនុ ៖ ស្របពេលដែលពិធីបុណ្យឆ្លងឆ្នាំសកលខិតជិតមកដល់គេសង្កេតឃើញថា អាជ្ញាធរពាក់ព័ន្ធក្នុងក្រុងខេត្តព្រះសីហនុ បានរៀបចំហេដ្ឋារចនាសម្ព័ន្ធនានា ជាពិសេសលើបញ្ហាអនាម័យបរិស្ថាន ក្នុងគោលបំណងរួមគ្នាប្រែក្លាយជាទីក្រុងបៃតង ស្របតាមគោលនយោបាយទេសចរណ៍តែមួយ មនុស្សជាតិតែមួយ ។
លោក អ៊ី សុខឡេង អភិបាលក្រុងព្រះសីហនុបានថ្លែងបញ្ជាក់ថា ការរួមគ្នាគិត រួមគ្នាធ្វើ រួមគ្នាទទួលខុស លើបញ្ហាសម្អាតអនាម័យនាពេលនេះ វាគឺសារមួយបង្ហាញទៅពិភពខាងក្រៅ ទៅប្រជាពលរដ្ឋគ្រប់ស្រទាប់វណ្ណៈជាពិសេសភ្ញៀវទេសច ដែលបានមកកម្សាន្តនៅខេត្តព្រះសីហនុ ឲ្យពួកគាត់បានយល់ដឹងបន្ថែមទៀតថា អ្វីៗគឺផ្តើមចេញពីយើងទាំងអស់គ្នា មិនថានៅទីកន្លែងណានោះទេ ការរួមគ្នាសម្អាតបរិស្ថាន វាហាក់បីដូចជាយើងកំពុងរួមគ្នាអភិវឌ្ឍន៍សង្គមជាតិឲ្យមានការរីកចម្រើនផងដែរ ។
ក្នុងឱកាសនោះផងដែរ លោកជំទាវ ម៉ាន់ ម៉ាណាវី ប្រធានក្រុមការងារចុះជួយក្រុងព្រះសីហនុ បានថ្លែងកោតសរសើរដល់អង្គភាពពាក់ព័ន្ធនានា ជាពិសេសមន្ទីសាធារណៈការនិងដឹកជញ្ជូនខេត្តព្រះសីហនុ ដែលមានលោក ណុប ហេង ជាប្រធានមន្ទីរតែងតែបានរួមយ៉ាងសកម្មនៅគ្រប់សកម្មភាពសង្គម ជាក់ស្តែងនៅថ្ងៃនេះជាដើមអង្គភាព មន្ទីសាធារណៈការ និងដឹកជញ្ជូនខេត្ត បានបង្កើតនូវព្រឹត្តិការណ៍រួមគ្នាសម្អាតអនាម័យនៅតាមតំបន់ឆ្នេរនានា ក្នុងក្រុងព្រះសីហនុ ដែលសកម្មភាពវាបានឆ្លុះបញ្ចាំងឲ្យឃើញពីការខិតខំយកអស់ពីកម្លាំងកាយចិត្ត បម្រើប្រជាពលរដ្ឋទាំងការងារជំនាញ និងការងារសម្អាតអនាម័យ ។ ការរួមគ្នាសម្អាតអនាម័យនាពេលនេះ ថ្វីត្បិតតែវាពុំបានលទ្ធផល១០០ភាគរយយ៉ាងណាក្តី តែវាជាសារមួយដាស់តឿន និងពញ្ញាក់អារម្មណ៍ដល់បងប្អូនប្រជាពលរដ្ឋ និងភ្ញៀវទេសចរឲ្យងាកមករួមគ្នាការពារបរិស្ថានគ្រប់ពេលវេលាគ្រប់ទីកន្លែង ៕
ចែករំលែកព័តមាននេះ