រាជធានីភ្នំពេញ ៖ ជាមួយគោលដៅលើកកម្ពស់ការធ្វើពាណិជ្ជកម្មតាមប្រព័ន្ធអេឡិចត្រូនិកនៅកម្ពុជា វិទ្យាស្ថានសេដ្ឋកិច្ចប្រទេសចិន សហការជាមួយអង្គការសហប្រជាជាតិដើម្បីអភិវឌ្ឍន៍ឧស្សាហកម្ម (UNIDO) បានរួមគ្នាអភិវឌ្ឍន៍ការធ្វើពាណិជ្ជកម្មអេឡិចត្រូនិកសម្រាប់វិស័យសហគ្រាសធុនតូច និងមធ្យមនៅកម្ពុជា ខណៈអ្នកជំនាញយល់ថា វិស័យនេះមិនទាន់មានហេដ្ឋារចនាសម្ព័ន្ធតភ្ជាប់បានល្អប្រសើរនៅឡើយ ។
នាយកវិទ្យាស្ថានសេដ្ឋកិច្ចប្រទេសចិន លោកស្រី SHEN Kaiyan បានថ្លែងក្នុងជំនួបពិភាក្សាការងារជាមួយលោកទេសរដ្ឋមន្ត្រី ចម ប្រសិទ្ធ រដ្ឋមន្ត្រីក្រសួងឧស្សាហកម្ម និងសិប្បកម្មថា គោលដៅនៃជំនួបពិភាក្សា គឺចង់សិក្សាឈ្វេងយល់ពីទំនាក់ទំនងរវាងប្រទេសទាំងពីរលើវិស័យសេដ្ឋកិច្ច និងហេដ្ឋារចនាសម្ព័ន្ធឧស្សាហកម្មនៅកម្ពុជា ជាពិសេស កិច្ចសហការជាមួយអង្គការ UNIDO ក្នុងការចូលរួមអភិវឌ្ឍន៍ការធ្វើពាណិជ្ជកម្មអេឡិចត្រូនិកសម្រាប់វិស័យសហគ្រាសធុនតូច និងមធ្យមនៅកម្ពុជា (E-Commerce Development for SMEs) ដោយឈរលើគោលនយោបាយខ្សែក្រវាត់១ ផ្លូវ១ របស់រដ្ឋចិន ។
លោក ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម និងសិប្បកម្ម បានថ្លែងថា កាលពីថ្ងៃទី២៨ ខែវិច្ឆិកា ឆ្នាំ២០១៧ កន្លងទៅ នៅមជ្ឈមណ្ឌលអន្តរជាតិទីក្រុងវីយេន ប្រទេសអូទ្រីស ដោយបានទទួលសិទ្ធិពីរាជរដ្ឋាភិបាលកម្ពុជា លោកផ្ទាល់ និងលោក លី យ៉ុង អគ្គនាយកអង្គការសហប្រជាជាតិដើម្បីអភិវឌ្ឍន៍ឧស្សាហកម្ម (UNIDO) បានចុះហត្ថលេខាលើសេចក្តីប្រកាសរួមសម្រាប់អនុវត្តកម្មវិធីភាពជាដៃគូប្រចាំប្រទេស (PCP) ជាមួយកម្ពុជា ។ លោកបន្តថា ប្រទេសចិននឹងចូលរួមចំណែកក្នុងនាមជាដៃគូអភិវឌ្ឍន៍ ឬជាម្ចាស់ជំនួយក្នុងកម្មវិធី PCP ឆ្នាំ២០១៨-២០២៣ សម្រាប់ការចូលរួមអភិវឌ្ឍន៍វិស័យឧស្សាហកម្មប្រកបដោយចីរភាពនៅកម្ពុជា ។
លោក ចម ប្រសិទ្ធ បានថ្លែងថា ៖« ការធ្វើពាណិជ្ជកម្មតាមប្រព័ន្ធអេឡិចត្រូនិកមានសារសំខាន់ណាស់សម្រាប់ការធ្វើជំនួញតាមប្រព័ន្ធ Online ដែលកំពុងមានការវិវឌ្ឍខ្លាំងនៅលើសកលលោក ប៉ុន្តែច្បាប់ស្តីពីការធ្វើពាណិជ្ជកម្មអេឡិចត្រូនិក (E-Commerce) នៅកម្ពុជា មិនទាន់លេចចេញជារូបរាងទេ » ។
លោកបន្តថា ៖« វិស័យ SME នៅកម្ពុជាក៏នៅមានការលំបាកខ្លះដែរ ដូចជា ទាក់ទងនឹងការចុះបញ្ជី ការកំណត់និយមន័យ និងការរៀបចំគោលនយោបាយលើកទឹកចិត្តជាដើម ដែលសង្ឃឹមថា ភាគីចិននឹងជួយបានច្រើននូវចំណុចខ្វះខាតទាំងនេះ » ។
ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុន Emerging Market Consulting លោក ង៉ែត ជូ បានមានប្រសាសន៍ថា នៅមានរឿង និងការងារជាច្រើនទៀតដើម្បីជំរុញឲ្យការធ្វើពាណិជ្ជកម្មតាមប្រព័ន្ធអេឡិចត្រូនិកដំណើរការដោយរលូន បើទោះជាបច្ចុប្បន្ន នៅកម្ពុជាមានធនាគារ និងក្រុមហ៊ុនមួយចំនួនបានអនុវត្តការងារនេះក្តី ប៉ុន្តែហេដ្ឋារចនាសម្ព័ន្ធតភ្ជាប់ប្រព័ន្ធទាំងនេះបញ្ចូលគ្នានៅមានកម្រិតនៅឡើយ ហើយប្រព័ន្ធនៃការជឿទុកចិត្តទៅលើការធ្វើពាណិជ្ជកម្មបែបនេះ ក៏នៅមានកម្រិតផងដែរ ។
លោកបន្តថា ៖« ខ្ញុំគិតថា វាជារឿងថ្មី និងទើបចាប់ផ្តើមនៅកម្ពុជា ហើយការចាប់ផ្តើមពាណិជ្ជកម្មបែបនេះមិនទាន់ផ្តល់ភាពងាយស្រួលដល់អ្នកប្រើប្រាស់ទេ ខណៈប្រព័ន្ធច្បាប់ និងបទដ្ឋានគតិយុត្តនានាមិនទាន់រួចរាល់ » ។
លោកបន្ថែមថា ៖« ការធ្វើពាណិជ្ជកម្មតាមប្រព័ន្ធអេឡិចត្រូនិក ក៏មានហានិភ័យខ្ពស់ផងដែរ ទាក់ទងនឹងការលួចចូលយកទិន្នន័យអ្វីមួយ។ ហេតុនេះ ក្រុមហ៊ុនដែលធ្វើពាណិជ្ជកម្មបែបនេះ ត្រូវវិនិយោគលើប្រព័ន្ធសុវត្ថិភាព និងធនធានមនុស្សចាំបាច់ណាស់ » ៕
ចែករំលែកព័តមាននេះ