រាជធានីភ្នំពេញ ៖ ចំណូលពន្ធ-អាករគ្រប់ប្រភេទដែលអគ្គនាយកដ្ឋានពន្ធដារប្រមូលបានសម្រាប់រយៈពេល១១ខែឆ្នាំ២០១៧នេះ គឺស្មើប្រមាណ១.៨២៧,៦៣លានដុល្លារសហរដ្ឋអាមេរិក ឬស្មើ១០៦,៥២% ។ នេះបើយោងតាមសេចក្តីប្រកាសព័ត៌មានរបស់អគ្គនាយកដ្ឋានពន្ធដារ ចុះថ្ងៃទី១១ ខែធ្នូ ឆ្នាំ២០១៧…
រាជធានីភ្នំពេញ ៖ ចំណូលពន្ធ-អាករគ្រប់ប្រភេទដែលអគ្គនាយកដ្ឋានពន្ធដារប្រមូលបានសម្រាប់រយៈពេល១១ខែឆ្នាំ២០១៧នេះ គឺស្មើប្រមាណ១.៨២៧,៦៣លានដុល្លារសហរដ្ឋអាមេរិក ឬស្មើ១០៦,៥២% ។ នេះបើយោងតាមសេចក្តីប្រកាសព័ត៌មានរបស់អគ្គនាយកដ្ឋានពន្ធដារ ចុះថ្ងៃទី១១ ខែធ្នូ ឆ្នាំ២០១៧ ។
នៅក្នុងកិច្ចប្រជុំបូកសរុបលទ្ធផលប្រមូលចំណូលពន្ធប្រចាំខែវិច្ឆិកា ឆ្នាំ២០១៧ កាលពីព្រឹកថ្ងៃទី១១ ធ្នូ ក្រោមអធិបតីភាពលោក គង់ វិបុល ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយកនៃអគ្គនាយកដ្ឋានពន្ធដារ បានឲ្យដឹងថា សម្រាប់រយៈពេល១១ខែ ឆ្នាំ២០១៧ ចំណូលពន្ធ-អាករគ្រប់ប្រភេទដែលអគ្គនាយកដ្ឋានពន្ធដារប្រមូលបានមានចំនួន៧.៣១០,៥១ពាន់លានរៀល (ប្រមាណ១.៨២៧,៦៣លានដុល្លារអាមេរិក) ស្មើនឹង១០៦,៥២% នៃគោលដៅកំណត់ក្នុងច្បាប់ហិរញ្ញវត្ថុសម្រាប់ការគ្រប់គ្រងឆ្នាំ២០១៧ ។
ប្រសិនបើធៀបនឹងរយៈពេលដូចគ្នានៃឆ្នាំ២០១៦ ឃើញថា ការប្រមូលចំណូលពន្ធអាករគ្រប់ប្រភេទសម្រាប់រយៈពេល១១ខែឆ្នាំ២០១៧នេះ កើនឡើងចំនួន១.៦៧៦,១៥ ពាន់លានរៀល (ប្រមាណ៤១៩,០៤លានដុល្លារ) ស្មើនឹង២៩,៧៥%។
ក្នុងរយៈពេល១១ខែឆ្នាំ២០១៧នេះ អគ្គនាយកដ្ឋានពន្ធដារសង្កេតឃើញថា មានការកើនឡើងនូវប្រាក់ពន្ធស្ទើរគ្រប់ប្រភេទពន្ធ ជាពិសេស ប្រភេទពន្ធ-អាករសំខាន់ៗដូចជា ពន្ធលើប្រាក់ចំណូល កើនឡើង៣១,១%, អាករលើតម្លៃបន្ថែម កើនឡើង២៩,៨% ខណៈអាករពិសេស កើនឡើង១៥,០% និងពន្ធលើប្រាក់បៀវត្ស កើនឡើង៨,៦% ។
ដោយឡែក នៅក្នុងខែវិច្ឆិកា ឆ្នាំ២០១៧នេះចំណូលពន្ធ-អាករគ្រប់ប្រភេទដែលប្រមូលបានមានចំនួន៥៧៤,៨៦លានរៀល (ប្រមាណជា ១៤៣,៧២លានដុល្លារអាមេរិក) ។
ឆ្លៀតក្នុងឱកាសនេះដែរ លោក គង់ វិបុល ប្រតិភូរាជរដ្ឋាភិបាល និងជាប្រធានអង្គប្រជុំ បានសម្តែងនូវការកោតសរសើរចំពោះកិច្ចខិតខំប្រឹងប្រែងរបស់នាយកដ្ឋានថ្នាក់កណ្តាល និងសាខាពន្ធដារខេត្ត-ខណ្ឌ ក្នុងន័យបង្កើនផលិតភាព ប្រសិទ្ធភាពនៃការប្រមូលចំណូលពន្ធ នាពេលកន្លងមក ។
ជាមួយគ្នានេះ លោក គង់ វិបុល បានផ្តល់អនុសាសន៍ណែនាំដល់អង្គភាពទាំងអស់ ដែលស្ថិតក្រោមឱវាទរបស់អគ្គនាយកដ្ឋានពន្ធដារ និងសមាជិកអង្គប្រជុំ ដូចខាងក្រោម៖
-បន្តការអប់រំផ្សព្វផ្សាយឱ្យបានកាន់តែទូលំទូលាយ និងកាន់តែជ្រួតជ្រាបថែមទៀត ក្នុងចំណោមមជ្ឈដ្ឋានអ្នកជាប់ពន្ធ ពាក់ព័ន្ធនឹងវិធាន និងនីតិវិធីនៃការបង់ពន្ធតាមប្រភេទពន្ធនីមួយៗ ។
-យកចិត្តទុកដាក់ខ្ពស់ក្នុងការពង្រឹងការគ្រប់គ្រងការស្នើសុំបង្វិលសងអាករលើតម្លៃបន្ថែម និងការដាក់លិខិតប្រកាស ។
-យកចិត្តទុកដាក់ខ្ពស់ក្នុងការពង្រឹងការគ្រប់គ្រងទារបំណុលពន្ធ ជាពិសេស បំណុលពន្ធរ៉ាំរ៉ៃជាយូរមកហើយ ។
-ពង្រឹងការគ្រប់គ្រងប្រមូលចំណូលពន្ធ ជាពិសេស ពន្ធសម្រាប់ជាប្រយោជន៍ដល់រដ្ឋបាលថ្នាក់ក្រោមជាតិ ធ្វើយ៉ាងណា ធានាបាននូវប្រសិទ្ធភាព តម្លាភាព និងគណនេយ្យភាពក្នុងការប្រមូលចំណូលពន្ធទាំងនេះ ។
-ពង្រឹងការផ្តល់សេវាជូនអ្នកជាប់ពន្ធឱ្យបានកាន់តែប្រសើរ តាមរយៈការពង្រឹងសមត្ថភាពមន្ត្រី និងបំពាក់សម្ភារបរិក្ខារបច្ចេកវិទ្យា ព្រមទាំងពង្រឹងកិច្ចសហការជាមួយគ្រប់ស្ថាប័នពាក់ព័ន្ធទាំងអស់ទៅតាមការចាំបាច់ ។
-បន្តធ្វើបច្ចុប្បន្នភាពអចលនទ្រព្យសម្រាប់ពន្ធលើអចលនទ្រព្យក្នុងក្របខ័ណ្ឌទូទាំងប្រទេស សំដៅធ្វើយ៉ាងណា ឱ្យការប្រមូលពន្ធប្រភេទនេះប្រព្រឹត្តទៅដោយរលូន ។
-ជំរុញការងារចុះបញ្ជីពន្ធដារឱ្យបានកាន់តែឆាប់រហ័សថែមទៀត តាមរយៈការពង្រឹងកិច្ចសហការជាមួយក្រសួង-ស្ថាប័នពាក់ព័ន្ធ ដើម្បីសម្របសម្រួល ការផ្តល់សេវាចុះបញ្ជីពន្ធដារជូនអ្នកជាប់ពន្ធ ។
-បន្តយកចិត្តទុកដាក់អប់រំមន្ត្រីក្រោមឱវាទ ឱ្យរក្សាបាននូវអាកប្បកិរិយារួសរាយរាក់ទាក់ និងប្រើពាក្យសម្តីទន់ភ្លន់ទៅកាន់អ្នកជាប់ពន្ធ ចៀសវាងមានការថ្នាំងថ្នាក់ និងមិនសប្បាយចិត្តពីសំណាក់អ្នកជាប់ពន្ធដោយប្រការណាមួយ ។
-រៀបចំសិក្ខាសាលាជូនមន្ត្រីពន្ធដារ និងអ្នកជាប់ពន្ធគ្រប់មជ្ឈដ្ឋានអំពីដំណើរការ និងនីតិវិធីនៃការដាក់លិខិតប្រកាស និងបង់ប្រាក់ពន្ធតាមអនឡាញ ដែលអគ្គនាយកដ្ឋានពន្ធដារបានដាក់ឱ្យដំណើរការក្នុងពេលថ្មីៗនេះ ។
-ខិតខំបន្តកិច្ចសហការជាមួយបណ្តាប្រទេសជាដៃគូនានា ដើម្បីជំរុញការងាររៀបចំកិច្ចព្រមព្រៀង ចៀសវាងការយកពន្ធត្រួត ឱ្យទទួលបានជោគជ័យ និងប្រសិទ្ធភាពខ្ពស់។
-បន្តរៀបចំលិខិតបទដ្ឋានគតិយុត្តពាក់ព័ន្ធនឹងវិស័យពន្ធដារ ដើម្បីឆ្លើយតប និងសម្រួលដល់ការងារគ្រប់គ្រងប្រមូលចំណូលពន្ធឱ្យទទួលបានប្រសិទ្ធភាពខ្ពស់ និងមានភាពងាយស្រួលច្បាស់លាស់សម្រាប់ការអនុវត្ត ។
នៅពេលបញ្ចប់កិច្ចប្រជុំ លោក គង់ វិបុល បានវាយតម្លៃខ្ពស់ និងថ្លែងអំណរគុណយ៉ាងជ្រាលជ្រៅចំពោះថ្នាក់ដឹកនាំគ្រប់អង្គភាពក្រោមឱវាទអគ្គនាយកដ្ឋានពន្ធដារ ដែលបាននិងកំពុងចូលរួមយ៉ាងសកម្ម ខិតខំប្រឹងប្រែងប្រមូលចំណូលរហូតទទួលបានលទ្ធផលយ៉ាងល្អប្រសើរ ។
ទន្ទឹមនឹងនេះ លោកក៏បានផ្តល់ការណែនាំបន្ថែមដល់គ្រប់អង្គភាពឱ្យបន្តខិតខំពង្រឹងការអនុវត្តច្បាប់ វិន័យការងារ និងត្រូវមានភាពទន់ភ្លន់ម៉ឺងម៉ាត់ក្នុងការឆ្លើយតបទៅកាន់អ្នកជាប់ពន្ធ ធ្វើយ៉ាងណា ឱ្យអ្នកជាប់ពន្ធសប្បាយចិត្ត មិនសម្តែងការរអ៊ូរទាំ និងផ្តល់កិច្ចសហការល្អក្នុងការបង់ពន្ធជូនរដ្ឋ ៕
ចែករំលែកព័តមាននេះ