ខេត្តកំពត ៖ បុរសម្នាក់ដែលបានជិះម៉ូតូម៉ាកវេវតែម្នាក់ឯង ក្នុងទិសដៅពីលិចទៅកើត ហើយជ្រុលទៅបុកគូទរថយន្តពីក្រោយ បណ្ដាលឱ្យស្លាប់ភ្លាមៗនៅនឹងកន្លែង កាលពីវេលាម៉ោង៨យប់ថ្ងៃទី១០ ធ្នូ នៅលើកំណាត់ផ្លូវលេខ៣៣ ត្រង់ចំណុចភូមិត្រពាំងធំ ឃុំត្រពាំងសង្កែ ស្រុកទឹកឈូ ។ ទោះបីមានគ្រោះថ្នាក់រហូតដល់បាត់បង់ជីវិតយ៉ាងនេះក្តី នគរបាលសណ្ដាប់ធ្នាប់ស្រុកទឹកឈូ បានត្រឹមតែមកជួយយាមសព ព្រោះរថយន្តដែលបុរសរូបនេះជិះម៉ូតូបុកពីក្រោយបានបើកទៅបាត់ រីឯសពភ្លាមៗក៏មិនទាន់ស្គាល់អត្តសញ្ញាណនៅឡើយដែរ ។
ទោះជាបែបនេះក្តីនៅព្រឹកថ្ងៃទី១១ ធ្នូ ទើបដំណឹងនេះបានទៅដល់ស្ត្រីជាប្រពន្ធជនរងគ្រោះហើយក៏បានមកដល់ ទើបត្រូវបានស្គាល់អត្តសញ្ញាណ ។ នគរបាលស្រុកទឹកឈូបាននិយាយថា បុរសរងគ្រោះឈ្មោះ ពុត សំអឿន អាយុ៣៦ឆ្នាំ នៅភូមិថ្មីសង្គាត់ព្រៃធំ ក្រុងកែប។ នគរបាលបានប្រាប់ឱ្យដឹងទៀតថា ជនរងគ្រោះបានជិះម៉ូតូបុកគូទរថយន្តពីក្រោយ តាមការអះអាងពីពលរដ្ឋថា អ្នកបើកឡានបានបើកពីលិចទៅកើត ហើយរថយន្តបានឈប់បត់ជើងតូចវេលាយប់ស្រាប់តែអ្នកជិះម៉ូតូពីក្រោយបានជ្រុលទៅបុកគូទរថយន្តពេញទំហឹងបណ្ដាលឱ្យបែកក្បាលស្លាប់នៅនឹងកន្លែង ។មន្ត្រីនគបាលបានឱ្យដឹងថា ក្នុងនាមជាសមត្ថកិច្ច បានហៅរថយន្តសង្គ្រោះដឹកសពទៅធ្វើបុណ្យនៅឯផ្ទះ តែប្រពន្ធសពថាចាំដឹកគោយន្តទៅផ្ទះវិញ ព្រោះគ្មានលុយឱ្យថ្លៃរថយន្តទេ ម្ល៉ោះហើយនៅអង្គុយអែបចិញ្ចើមផ្លូវមើលសពប្តីយ៉ាងអាណោចអាធ័មបំផុត ។
ស្ត្រីជាប្រពន្ធជនរងគ្រោះបាននិយាយប្រាប់ថា គាត់អត់មានលុយជួលឡានពេទ្យដឹកសពប្ដីយកទៅធ្វើបុណ្យទេ ចាំគោយន្តបងប្អូននៅឯស្រុកមកដឹក ។ លុះម៉ោង១១ថ្ងៃត្រង់ថ្ងៃទី១១ ធ្នូ ទើបគោយន្តមកដល់ ។ ស្ត្រីជាប្រពន្ធនិយាយថា បុរសជាប្ដីនេះគឺជាប្ដីក្រោយទេ និងបានកូនមួយ ហើយនៅថ្ងៃទី៩ ធ្នូ កន្លងមកគាត់២នាក់ប្ដីប្រពន្ធបានជិះម៉ូតូទៅបុណ្យសពបងប្អូនជីដូនមួយនៅឯស្រុកទឹកឈូ ។ ប្រពន្ធរៀបរាប់ទៀតថា ពេលនោះទាស់មាត់គ្នាជាមួយប្ដី គាត់ខឹងក៏ជិះរឺុម៉កមកផ្ទះមុន ឯប្ដីជិះម៉ូតូតាមក្រោយក៏ជួបរឿងអាក្រក់បែបនេះទៅ ៕
ចែករំលែកព័តមាននេះ