ខេត្តកំពង់ឆ្នាំង ៖ ការដាក់លក់ដូររបស់បងប្អូនអាជីវករមុខផ្សារលើខេត្តកំពង់ឆ្នាំងនៅពេលទាបភ្លឺគ្មានសណ្តាប់ធ្នាប់ និងបង្កធ្វើឲ្យស្ទះចរាចរណ៍ជារៀងរាល់ថ្ងៃទើបរយៈពេល៣-៤ថ្ងៃកន្លងទៅនេះ សមត្ថកិច្ចចម្រុះសហការជាមួយអាជ្ញាធរក្រុងកំពង់ឆ្នាំងរួម និងគណៈកម្មការផ្សារលើចុះរៀបចំសណ្តាប់ធ្នាប់នៅវេលាទាបភ្លឺជារៀងរាល់ថ្ងៃ ។ ជាក់ស្តែងនៅវេលាទាបភ្លឺថ្ងៃទី១១ ខែធ្នូ ឆ្នាំ២០១៧ សមត្ថកិច្ចសណ្តាប់ធ្នាប់ទាំងនោះបានរើលើកយក តុ កៅអី និងគ្រែលក់ដូររបស់អាជីវករមួយចំនួនយកទៅទុកនៅសាលាក្រុងកំពង់ឆ្នាំង ។
អាជ្ញាធរក្រុងកំពង់ឆ្នាំងសូមសំណូមពរដល់ក្រុមអាជីវករទាំងនោះ សូមចូលរួមគោរពការណែនាំរបស់សាលាក្រុងផង ។
លោកមាស ម៉េងហួត ប្រធានការិយាល័យនគរបាលសណ្តាប់នៃស្នងការដ្ឋាននគរបាលខេត្តបានឲ្យដឹងថា បងប្អូនអាជីវករលក់ដូរនៅពេលទាបភ្លឺគាត់បានយកផ្លូវថ្នល់ធ្វើកន្លែងលក់ដូរ ហើយកន្លងមក ខាងសាលាក្រុង បានណែនាំពួកគាត់ច្រើនដងណាស់មកហើយ មានទាំងកិច្ចសន្យាទៀត ប៉ុន្តែពួកគាត់មិនព្រមចូលរួមគោរពកិច្ចសន្យារបស់ខ្លួន ។ លោកបានបញ្ជាក់ថា ការងាររៀបចំសណ្តាប់ធ្នាប់ធ្វើឡើងជារៀងរាល់ថ្ងៃ ព្រោះបើពុំនោះទេពួកគាត់នៅបន្តលក់លើផ្លូវរហូត ដល់ភ្លឺធ្វើឲ្យប៉ះពាល់សណ្តាប់ធ្នាប់ និងចរាចរណ៌ជាមិនខាន ។
លោកសារុំ អភិបាលរងក្រុងកំពង់ឆ្នាំងមានប្រសាសថា ដោយទទួលបានការណែនាំពីឯកឧត្តមអភិបាលខេត្តក៍ដូចជាអភិបាលរងខេត្តឲ្យរៀបចំមុខផ្សារលើនេះឲ្យបានស្អាត មិនឲ្យមានការទុកសម្ភារលក់ដូរមុខផ្សាររញ៉េរញ៉ៃខ្វះឡើយ ហេតុនេះហើយសាលាក្រុងកំពង់ឆ្នាំងបានជូនដំណឹង និងបានណែនាំដល់បងប្អូនដែលអាជីវករលក់ដូរមុខផ្សារលើនៅពេលយប់ គឺចាប់ពីម៉ោង៤ល្ងាច រហូតដល់យប់ពេលលក់ដូរចប់បងប្អូនត្រូវដឹកសម្ភារនោះចេញឲ្យអស់មិនអនុញ្ញាត្តិទុកនៅឡើយ ហើយបានធ្វើលើកិច្ចសន្យាទៀតតែបងប្អូនមិនគោរពកិច្ចសន្យាបានទុក តុ កៅអី គ្រែលក់ដូរ ដោយចាក់សោរទុកចោលរហូតពេញមួយថ្ងៃ ធ្វើឲ្យបាត់បង់សណ្តាប់ធ្នាប់ មុខផ្សារជារៀងរាល់ថ្ងៃ ។
លោកអាជ្ញាធរក្រុងកំពង់ឆ្នាំង សំណូមពរដល់បងប្អូនអាជីវករសូមចូលរួមគោរពតាមការណែនរបស់សាលាក្រុងផង បើមិនដូច្នេះទេ សាលាក្រុងនឹងដឹកយកសម្ភាររបស់បងប្អូន ទៅទុកនៅសាលាក្រុងជាពុំខានឡើយ ។
សូមបញ្ជាក់ អាជីរមុខមុខផ្សារលើនៅពេលយប់មានពីរប្រភេទ គឺមានអ្នកលក់ដូរចំណីអាហារចាប់ពីម៉ោង៤ល្ងាចដល់យប់ជ្រៅ និងមានអ្នកលក់បន្លែផ្លែឈើនៅវេលាទាបភ្លឺ ចាប់ពីម៉ោងជាង៣រហូតដល់ម៉ោង៥កន្លះព្រឹក ៕
ចែករំលែកព័តមាននេះ