ខេត្តស្វាយរៀង ៖ យុវជនម្នាក់បានស្លាប់បាត់បង់ជីវិត ខណៈបញ្ជួនទៅដល់មន្ទីរពេទ្យខេត្ត និង៤នាក់ផ្សេងទៀតរងរបួសធ្ងន់ស្រាល ដោយសារគ្រោះថ្នាក់ចរាចររវាងម៉ូតូ និងម៉ូតូ បានបុកគ្នាយ៉ាងពេញទំហឹងលាន់ដូចរន្ទះខ្ទាតប៉ើងមនុស្សចេញពីម៉ូតូដេកសន្លប់រដូករណែលពេញថ្នល់នៅត្រង់ចំណុចភ្លើងស្តុប ផ្លូវបំបែកជាបួនកែងស្នងការដ្ឋាននគបាលខេត្ត ស្ថិតនៅភូមិស្រះវង្ស សង្កាត់ស្វាយរៀង ក្រុងស្វាយរៀង ។
ករណីគ្រោះថ្នាក់ចរាចរនេះបានកើតឡើងកាលពីវេលាម៉ោង០១និង១៥នាទី ថ្ងៃទី១០ ខែឆ្នូ ឆ្នាំ២០១៧ ។ ប្រភពពីប្រជាពលរដ្ឋបានឃើញហេតុការណ៍បានឲ្យដឹងថា នៅមុនពេលកើតហេតុ មានម៉ូតូពីរគ្រឿងមួយគ្រឿងម៉ាកស្មាក់វី ធ្វើដំណើរពីទិសខាងជើងមកត្បូង លុះមកដល់ចំណុចកើតហេតុខាងលើ ជាកន្លែងភ្លើងស្តុបគឺភ្លើងក្រហម ហើយមិនបានឈប់ (មិនគោរពភ្លើងស្តុបក្រហម) បានបើកបន្តយ៉ាងលឿនស្របពេលនោះក៏មានម៉ូតូមួយគ្រឿងទៀតម៉ាកហុងដាសេ១២៥ ឆ្នាំ២០១៣ ធ្វើដំណើរទៅពីទិសខាងលិចទៅកើតឆ្លងចង់ផុតថ្នល់ទៅហើយ ក៏ត្រូវខាងម៉ូតូស្មាក់វីបុកចំពីចំហៀងខាងក្រោយ បណ្ដាលឲ្យដួលម៉ូតូបោកទៅលើថ្នល់ខ្ទាតមនុស្សចេញពីម៉ូតូបីបួនត្រលប់ដេកសន្លប់រដូករណែលពេញផ្លូវតែម្តង ។
បើតាមសមត្ថកិច្ចបានឲ្យដឹងថា ជនរងគ្រោះឈ្មោះ ឆូយ រតនា ភេទប្រុស អាយុ១៨ឆ្នាំ មានទីលំនៅភូមិគយត្របែក សង្កាត់ស្វាយរៀង ក្រុងស្វាយរៀង ជាអ្នកបើកបរមូតូម៉ាកហុងដាសេ១២៥ ពាក់ស្លាកលេខ ១D-២៧១១ គ្មានមួកសុវត្ថិភាពរបួសធ្ងន់ និងអ្នករួមដំណើឈ្មោះ ខែន តុលី អាយុ១៦ឆ្នាំ មុខរបរសិស្សសាលារស់នៅភូមិវាលយន្ត សង្កាត់ស្វាយរៀង ក្រុងស្វាយរៀង (គ្នានមួកសុវត្ថិភាព) រងរបួសធ្ងន់បែកក្បាលហូរឈាមតាមត្រចៀកសន្លប់នៅនឹងកន្លែង ។ ឬឯខាងម៉ូតូបង្កម៉ាកស្មាក់វី ពាក់ស្លាកលេខ ភ្នំពេញ ១BB-៥៧៥៧ បើកបរដោយឈ្មោះ សី ចាន់វឌ្ឍនៈ ភេទប្រុស អាយុ១៨ឆ្នាំ រស់នៅភូមិអណ្តូងតាសី សង្កាត់ព្រៃឆ្លាក់ ក្រុងស្វាយរៀង របួសក្បាល និងបែកផ្លោកនោមធ្ងន់ធ្ងរ បានស្លាប់នៅមន្ទីរពេទ្យខេត្ត និងអ្នករួមដំណើមានឈ្មោះ វេង វិច្ចាមករា ភេទប្រុស អាយុ១៧ឆ្នាំ រស់នៅភូមិអណ្តូងតាសី រងរបួសធ្ងន់ និងម្នាក់ទៀតភេទប្រុស មិនស្គាល់អត្តសញ្ញាណ របួសស្រាលបានរត់គេចខ្លួនពីកន្លែងកើតហេតុបាត់ទៅ ។
ក្រោយពេលកើតហេតុ សមត្ថកិច្ចបានបញ្ជូនជនរងគ្រោះទៅមន្ទីពេទ្យបង្អែកខេត្តស្វាយរៀង ដើម្បីសង្គ្រោះអាយុជីវិត ។ ប៉ុន្តែអកុសលយុវជនម្នាក់មានឈ្មោះ សី ចាន់វឌ្ឍនៈ បានស្លាប់បាត់បង់ជីវិតនៅមន្ទីរពេទ្យខេត្តស្វាយរៀង ជាកូនកំព្រាឪពុកម្តាយ និងយុវជនឈ្មោះ ខែន តុលី ត្រូវបានក្រុមគ្រួសារដឹកបញ្ជួនបន្តទៅពេទ្យប្រទេសវៀតណាម ដោយសភាពធ្ងន់ធ្ងរពេក ។ ឬឯមធ្យោបាយម៉ូតូទាំង២គ្រឿង សមត្ថកិច្ចយកទៅរក្សាទុកនៅស្នងការដ្ឋាននគរបាលខេត្តស្វាយរៀង រងចាំការដោះស្រាយតាមនីតិវិធីច្បាប់ ។ មូលហេតុ អ្នកបើកម៉ូតូស្មាក់វីបើកបរល្បឿនលឿនហើយមិនគោរពភ្លើងស្តុប ៕
ចែករំលែកព័តមាននេះ