ប្រទេសអ៊ីស្រាអែល-ប៉ាឡេស្ទីន ៖ មនុស្សជាច្រើនសិបពាន់នាក់កាលពីថ្ងៃទី១០ ធ្នូ បន្តធ្វើបាតុកម្មនៅមជ្ឈិមបូព៌ា និងនៅតាមកន្លែងផ្សេងៗទៀតនៃពិភពលោក ដើម្បីបញ្ចេញកំហឹងប្រឆាំងការសម្រេចដ៏ចម្រូងចម្រាស់របស់ប្រធានាធិបតីអាមេរិក លោកដូណាល់ ត្រាំ ទទួលស្គាល់ក្រុងហ្សេរុយសាឡឹមថាជារដ្ឋធានីអ៊ីស្រាអែល…
ប្រទេសអ៊ីស្រាអែល-ប៉ាឡេស្ទីន ៖ មនុស្សជាច្រើនសិបពាន់នាក់កាលពីថ្ងៃទី១០ ធ្នូ បន្តធ្វើបាតុកម្មនៅមជ្ឈិមបូព៌ា និងនៅតាមកន្លែងផ្សេងៗទៀតនៃពិភពលោក ដើម្បីបញ្ចេញកំហឹងប្រឆាំងការសម្រេចដ៏ចម្រូងចម្រាស់របស់ប្រធានាធិបតីអាមេរិក លោកដូណាល់ ត្រាំ ទទួលស្គាល់ក្រុងហ្សេរុយសាឡឹមថាជារដ្ឋធានីអ៊ីស្រាអែល ។
នៅតាមបណ្តាដែនដីប៉ាឡេស្ទីន ការប៉ះទង្គិចគ្នាកើតមាន៤ថ្ងៃជាប់ៗគ្នារវាងពួកប៉ាឡេស្ទីន និងកងកម្លាំងសន្តិសុខអ៊ីស្រាអែល ។ យោងតាមប្រភពមន្ទីរពេទ្យប៉ាឡេស្ទីន
ថា ចាប់តាំងពី៤ថ្ងៃមកហើយ អំពើហិង្សាបណ្តាលឱ្យស្លាប់ជនប៉ាឡេស្ទីន៤នាក់ ហើយជាង១.០០០នាក់រងរបួស ។ នៅតំបន់ហ្គាហ្សាដល់ទីក្រុងរ៉ាម៉ាល់ឡាហ៍កាត់តាមក្រុងបេត្លេហេម ពួកបាតុករប៉ាឡេស្ទីនភាគច្រើនជាពួកយុវជនបានគប់ដុំថ្ម និងដុតសម្បកកង់រថយន្តគប់ដាក់កងទាហានអ៊ីស្រាអែល ដែលតបតវិញដោយបាញ់ឧស្ម័នបង្ហូរទឹកភ្នែក និងបាញ់គ្រាប់ពិត ឬគ្រាប់កៅស៊ូ ។ ជនប៉ាឡេស្ទីនម្នាក់បានចាក់សមាជិកកងឆ្មាំសន្តិសុខអ៊ីស្រាអែលម្នាក់ឱ្យរបួសធ្ងន់នៅក្រុងហ្សេរុយសាឡឹម ហើយអ្នកចាក់ត្រូវចាប់ខ្លួន ។
នៅតួកគីដែលប្រធានាធិបតីប្រទេសនេះប្រកាសជួយដល់បុព្វហេតុប៉ាឡេស្ទីនមានបាតុ
កម្មយ៉ាងធំមួយនៅទីក្រុងអ៊ីស្តង់ប៊ុលសម្តែងការក្តៅក្រហាយចំពោះការទទួលស្គាល់ក្រុងហ្សេរុយសាឡឹមជារដ្ឋធានីអ៊ីស្រាអែល ។ នៅប្រទេសលីបង់ កងកម្លាំងសន្តិសុខបានប្រើឧស្ម័នបង្ហូរទឹកភ្នែក និងកាណុងបាញ់ទឹក ដើម្បីបំបែកបាតុកម្មមួយនៅជិតស្ថានទូតអាមេរិកនាភាគខាងជើងក្រុងបៃរូត ។ មនុស្សច្រើននាក់រងរបួសរួចនាថ្ងៃទី១១ ធ្នូ នឹងមានបាតុកម្មធំមួយទៀតតាមការអំពាវនាវរបស់ចលនាហេសប៊ុលឡាហ៍ ។ នៅទីក្រុងគែរ រដ្ឋធានីអេហ្ស៊ីបមនុស្សច្រើនរយនាក់ធ្វើបាតុកម្មក្នុងសាកលវិទ្យាល័យជាច្រើន ហើយមេធាវី២០០នាក់ ក៏ធ្វើបាតុកម្មប្រឆាងការសម្រេចរបស់លោកត្រាំ ដែរ ។
នៅក្រុងរ៉ាបាត រាជធានីម៉ារ៉ុកមនុស្សច្រើនសិបពាន់នាក់ធ្វើបាតុកម្មជាទាមទារប្រកាសក្រុងហ្សេរុយសាឡឹមជារដ្ឋធានីប៉ាឡេស្ទិន ៕
ចែករំលែកព័តមាននេះ