ប្រទេសរុស្ស៊ី ៖ រដ្ឋមន្ត្រីការបរទេសរុស្ស៊ីលោកស័រហ្គេយឡាវរ៉ូវ អះអាងនាពេលថ្មីៗនេះថា រុស្ស៊ីប្រឆាំងយ៉ាងមឺុងម៉ាត់បំណងរបស់កូរ៉េខាងជើងបំពាក់អាវុធនុយក្លេអ៊ែរ ហើយគោរពរាល់ទណ្ឌកម្មរបស់អង្គការសហប្រជាជាតិប្រឆាំងប្រទេសនេះ ក៏ប៉ុន្តែក្រុងវ៉ាស៊ីនតោនបានលេងជាមួយភ្លើងដោយអូសទាញប្រទេសជប៉ុន និងកូរ៉េខាងត្បូងឲ្យចូលក្នុងការបង្កហេតុទាំងឡាយរបស់ខ្លួន។
លោកឡាវរ៉ូវ អះអាងថា ជប៉ុន និងកូរ៉េខាងត្បូងដែលសហរដ្ឋអាមេរិកអូសទាញឲ្យចូលក្នុងគន្លងនៃការបង្កហេតុជុំវិញកូរ៉េខាងជើងនឹងជាអ្នករងគ្រោះដំបូងគេក្នុងករណីផ្ទុះសង្គ្រាមនៅឧបទ្វីបកូរ៉េ ។ ក្នុងបទសម្ភាសន៍មួយជាមួយទូរទស្សន៍បេឡារុស STV លោកឡាវរ៉ូវ គូសបញ្ជាក់ថា ដោយថ្កោលទោសការផ្សងព្រេងនុយក្លេអ៊ែរ និងបាលីស្ទិករបស់ក្រុងព្យុងយ៉ាង យើងក៏ត្រូវថ្កោលទោសដែរឥរិយាបថបង្កហេតុរបស់អាមេរិក ។ យើងព្រួយបារម្ភបំផុតដែលអាមេរិកជម្រុញប្រជាជនជប៉ុននិងប្រជាជនកូរ៉េខាងត្បូងឲ្យក្លាយជាអ្នករងគ្រោះដំបូងគេក្នុងកេណីផ្ទុះសង្គ្រាមនៅឧបទ្វីបកូរ៉េ។
ក្នុងន័យនេះលោកលើកឡើងជាថ្មីពីជំហររបស់រុស្ស៊ីដែលយល់ថាមិនអាចទទួលយកបានបំណងប្រាថ្នារបស់កូរ៉េខាងជើងដណ្ដើមយកលក្ខន្តិកៈជាមហាអំណាចនុយក្លេអ៊ែរមួយ។
លោកឡាវរ៉ូវ បន្តថា យើងចង់ឲ្យបោះបង់ចោលបណ្ដាវោហាសាស្ត្រ ការគំរាមកំហែង និងការវាយលុកហើយត្រាយផ្លូវឆ្ពោះទៅជំរុញការចរចា ។ លោកក៏លើកដែរពីបញ្ហា
ទណ្ឌកម្មប្រឆាំងកូរ៉េខាងជើងរបស់ក្រុមប្រឹក្សាសន្តិសុខអង្គការសហប្រជាជាតិ គឺយើងគោរពបណ្ដាទណ្ឌកម្មដែលបានដាក់៕
ចែករំលែកព័តមាននេះ