ខេត្តស្វាយរៀង ៖ សោកនាដកម្មមួយប៉ប្រិចភ្នែកធ្វើឲ្យបុរស់វ័យ២៨ឆ្នាំម្នាក់ក្លាយខ្លួនជាជនពិការក្នុងហេតុការគ្រោះថ្នាក់ចរាចរណ៍ញាក់សាច់មួយបង្កដោយរថយន្តមួយគ្រឿងមិនស្គាល់អត្តសញ្ញាណបើកបញ្ច្រាសទិសគ្នាបុកចំពីមុខពេញទំហឹងចំភ្លៅខាងស្តាំបណ្តាលឱ្យដាច់ជើងចេញពីដងខ្លួន និងបាក់ដៃស្តាំម្ខាងដួលបោកទៅលើថ្នល់សន្លប់នៅនឹងកន្លែងហើយអ្នកបើកបររថយន្តបានបើករត់គេចខ្លួនបាត់ស្រមោល ។ ករណីដ៏រន្ធត់នេះបានកើតឡើងកាលពីវេលាម៉ោង៤នឹង៣៥នាទីល្ងាចថ្ងៃទី១០ ខែធ្នូ ឆ្នាំ២០១៧ នៅលើកំណាត់ផ្លូវជាតិលេខ១ ត្រង់ចំណុចចន្លោះគីឡូម៉ែត្រលេខ១៥៣-១៥៤ ស្ថិតក្នុងភូមិអង្គសាលា សង្កាត់ព្រៃអង្គុញ ក្រុងបាវិត ខេត្តស្វាយរៀង ។
ជនរងគ្រោះមានឈ្មោះ រ័ត្ន ភក្តី ភេទប្រុស អាយុ២៨ឆ្នាំ មុខរបរកម្មកររោងចក្ររស់នៅភូមិពោធិវង្ស ឃុំប្រសូតិ ស្រុកស្វាយទាប ។ បើតាមប្រភពពីកន្លែងកើតហេតុបានឲ្យដឹងថា មុនកើតហេតុគេឃើញបុរសរងគ្រោះជិះម៉ូតូមួយគ្រឿងម៉ាកហុងដាសេ១២៥ ស៊េរីឆ្នាំ២០១៥ ពណ៌ខ្មៅ ពាក់ស្លាកលេខ ស្វាយរៀង ១G-០៤៧២ ធ្វើដំណើរពីលិចទៅកើតពាក់មួកសុវត្ថិភាពលុះមកដល់កន្លែងកើតហេតុខាលើស្រាប់តែមានរថយន្តមួយគ្រឿងមិនស្គាល់អត្តសញ្ញាណបើកបញ្ច្រាសទិសគ្នាពីទិសខាងកើតទៅលិចយ៉ាងលឿនបានរេចង្កូតមកឆ្វេងបុកជនរងគ្រោះពេញទំហឹងចំជើងស្តាំខាងដាច់ចេញពីខ្លួន និងបាក់ដៃស្តាំម្ខាងតែម្តងមើលទៅគួរន្ធត់ណាស់ ។ ក្រោយពេលកើតហេតុរថយន្តបង្កបានបើករត់គេចខ្លួនបាត់ស្រមោលពីកន្លែងកើតហេតុសំដៅទៅទិសខាងលិច ។ បច្ចុប្បន្នជនរងគ្រោះត្រូវក្រុមគ្រួសារបានបញ្ជួនទៅព្យាបាលនៅពេទ្យប្រទេសវៀតណាម ។
មូលហេតុបណ្ដាលមកពីអ្នកបើកបររថយន្តមិនប្រកាន់ស្តាំ ចំណែកជនរងគ្រោះពេលឃើញរថយន្តបើកមកចំម៉ូតូខ្លួនភ័យក៏គេចឆ្វេងដែរមិនផុតក៏បុកចំជើងស្តាំដាច់ចេញពីដងខ្លួនតែម្តង ។ រីឯវត្ថុតាងម៉ូតូ១គ្រឿងសមត្ថកិច្ចបានយកមករក្សាទុកនៅអធិការដ្ឋាននគរបាលក្រុងបាវិត ចំណែករថយន្តបង្កសមត្ថកិច្ចកំពុងស្រាវជ្រាវរកដើម្បីបំពេញសំណុំរឿងទៅតាមនីតិវិធីច្បាប់ ៕
ចែករំលែកព័តមាននេះ