ប្រទេសកាតា-ប្រទេសអង់គ្លេស ៖ ក្រុមហ៊ុន BAE SYSTEMS ប្រកាសកាលពីថ្ងៃទី១០ ធ្នូ ពីកុងត្រាមួយមានទឹកប្រាក់ប្រមាណជា៥ពាន់លានផោន (៥,៧ពាន់លានអឺរ៉ូ) ជាមួយប្រទេសកាតាដែលទិញយន្តហោះប្រយុទ្ធអង់គ្លេសធុន TYPHOON ចំនួន២៤គ្រឿង ។
ក្រុមហ៊ុនការពារអង់គ្លេសនេះបន្តថា ការផ្តល់យន្តហោះនេះគ្រោងនាដំណាច់ឆ្នាំ២០២២ ក្រោមលក្ខខណ្ឌដែលការបង់ប្រាក់ដំបូងត្រូវធ្វើឡើងយ៉ាងយូរនាដំណាច់ឆ្នាំ២០១៨ ។
រដ្ឋមន្ត្រីការពារប្រទេសអង់គ្លេស លោក GAVIN WILLIAMSON និងសមភាគីកាតា
លោក KHALED BEN MOHAMMED AL ATTIYAH បានចូលរួមក្នុងពិធីចុះហត្ថលេខាលើកិច្ចព្រមព្រៀងដែលលោក WILLIAMSON ប្រៀបប្រដូចទៅនឹងការបោះឆ្នោតផ្តល់ទំនុកចិត្តមួយដែលត្រួសត្រាយសម្រាប់បង្កើតការងារជាច្រើនពាន់សម្រាប់ពលរដ្ឋអង់គ្លេស ព្រមទាំងជាការបញ្ចូលទឹកប្រាក់ច្រើនពាន់លានទៅក្នុងសេដ្ឋកិច្ចរបស់យើង ។
ទីភ្នាក់ងារព័ត៌មានកាតា QNA ធ្លាប់រាយការណ៍កាលពីខែកញ្ញាថា កាតាធ្លាប់បានចុះ
ហត្ថលេខាលើឯកសារមួយពីចេតនាចង់ទិញយន្តហោះធុន TYPHOON ចំនួន២៤គ្រឿង ជាសេចក្តីសម្រេចមួយដែលត្រូវគេមើលឃើញថា ដើម្បីអាចប្រឈមមុខជាមួយបណ្តាប្រទេសអារ៉ាប់ដែលធ្វើពហិការដល់កាតាចាប់តាំងពីជាង៣ខែមកហើយ ។ វាក៏ជាកុងត្រាការពារធំដំបូងមួយរបស់អង់គ្លេសជាមួយកាតាផងដែរ ខណៈប្រទេសនេះជាដៃគូយុទ្ធសាស្ត្រមួយរបស់ចក្រភពអង់គ្លេស ។ ការចរចាតាមពិតទៅមានចាប់តាំងពីច្រើនឆ្នាំមកហើយ ។
យន្តហោះ EUROFIGHTER TYPHOON ផលិតដោយសាជីវកម្មមួយដែលមានក្រុមហ៊ុន BAE ក្រុមហ៊ុន AIRBUS និងក្រុមហ៊ុនអ៊ីតាលី LEONARDO ហើយតំណាងឱ្យការបង្កើតការងារដល់៤០.០០០នៅអង់គ្លេស ៕
ចែករំលែកព័តមាននេះ