ប្រទេសអ៊ីស្រាអែល-ប៉ាឡេស្ទីន ៖ អំពើហិង្សានៅបន្តក្នុងបណ្តាដែនដីប៉ាឡេស្ទីន ។ នាព្រឹកព្រលឹមថ្ងៃទី៩ ធ្នូ ជនប៉ាឡេស្ទីន២នាក់ ម្នាក់អាយុ២៨ឆ្នាំ ហើយម្នាក់ទៀតអាយុ៣០ឆ្នាំត្រូវស្លាប់ដោយសារការវាយប្រហារតាមអាកាសមួយរបស់អ៊ីស្រាអែលដែលក្រុមហាម៉ាស់ថា ប្រឆាំងមូលដ្ឋានមួយរបស់សាខាប្រដាប់អាវុធរបស់ខ្លួនគឺកងពល EZZEDINE AL QASSAM នៅ NOUSSEIRAT ជ្រោយហ្គាហ្សា ។
កងទ័ពអ៊ីស្រាអែលអះអាងថា បានធ្វើការវាយប្រហារជាច្រើននៅជ្រោយហ្គាហ្សាជាការតបតចំពោះការបាញ់គ្រាប់រ៉ុក្កែតនាពេលមុននេះចេញពីទីនោះដាក់ដែនដីអ៊ីស្រាអែល ។ កងយន្តហោះអ៊ីស្រាអែលវាយប្រហារលើទីតាំង៤របស់ក្រុមហាម៉ាស់នៅជ្រោយហ្គាហ្សា ។ ទីតាំងទាំងនេះគឺរោងចក្រផលិតអាវុធ២ ឃ្លាំងស្តុកអាវុធមួយ ព្រមទាំងប្លុកយោធាមួយ ។
ការវាយប្រហារទាំងនេះកើតមាន៤ថ្ងៃ ក្រោយការប្រកាសរបស់លោកដូណាល់ ត្រាំ ទទួលស្គាល់ក្រុងហ្សេរុយសាឡឹមថាជារដ្ឋអ៊ីស្រាអែល ។ ការសម្រេចនេះកាត់ផ្តាច់ការខិតខំប្រឹងប្រែងការទូតរយៈពេលជាច្រើនទសវត្សរបស់អាមេរិក ហើយញ៉ាំងឱ្យមានការក្តៅក្រហាយក្នុងផ្ទៃសហគមន៍អន្តរជាតិ ។
ក្នុងទិវាចងកំហឹងមួយកាលពីថ្ងៃទី៨ ធ្នូ នៅក្រុងហ្សេរុយសាឡឹម តំបន់ស៊ីសហ្ស៊កដានី និងនៅជ្រោយហ្គាហ្សា ពួកប៉ាឡេស្ទីនជាច្រើនពាន់នាក់បានប៉ះទង្គិចគ្នាជាមួយកងទាហាន និងប៉ូលិសអ៊ីស្រាអែល បណ្តាលឱ្យជនប៉ាឡេស្ទីន២នាក់ស្លាប់ ហើយជាច្រើនសិបនាក់រងរបួស ។បាតុកម្មកើតមាននាថ្ងៃទី៩ ធ្នូ ទៀតនៅស៊ីសហ្ស៊កដានី ដោយពួកយុវជនប៉ាឡេស្ទីនបានគប់ដុំថ្មប្រឆាំងកងទាហានអ៊ីស្រាអែលដែលបាញ់ឧស្ម័នបង្ហូរទឹកភ្នែក ៕
ចែករំលែកព័តមាននេះ