ខេត្តកំពង់ឆ្នាំង ៖ សមត្ថកិច្ចកងរាជអាវុធហត្ថបានស្ទាក់ចាប់ចោរលួចសត្វគោឈ្មោលញីមួយក្រោលចំនួន៧ក្បាល ហើយបានប្រគល់ឲ្យម្ចាស់គោវិញនៅល្ងាចថ្ងៃទី០៩ ខែធ្នូ ឆ្នាំ២០១៧ ។ កិច្ចការបង្ក្រាបនេះធ្វើឡើងនៅម៉ោង១១និង២០នាទីយប់ថ្ងៃទី០៧ ខែធ្នូ ឆ្នាំ២០១៧ នៅលើផ្លូវជាតិលេខ៥ ភូមិត្រពាំងចាន់ ស្រុកបរិបូណ៌ ខេត្តកំពង់ឆ្នាំង ។
លោកវរសេនីយទោនិល ប៊ុនធឿន មេបញ្ជាការរងកងរាជអាវុធហត្តខេត្តកំពង់ឆ្នាំងដឹកនាំបញ្ជាការក្នុងការបង្ក្រាបករណីនេះបានឲ្យដឹងថា មុនពេលបង្ក្រាបករណីលោកបានទទួលបទបញ្ជាពីឯកឧត្តមឈួរ ចន្ទ័ឌឿន គណបញ្ជាការឯកភាពខេត្ត និងលោកឧត្តមសេនីយត្រីសាក់ សារ៉ាង មេបញ្ជាការកងរាជអាវុធហត្ថខេត្តឲ្យបញ្ចេញកម្លាំងសមត្ថកិច្ចកងរាអាវុធហត្ថខេត្តមួយក្រុមជាង១០នាក់ ដាក់ប៉ុស្តិ៍ត្រួតពិនិត្យឆែកឆេររកអាវុធជាតិផ្ទុះនៅក្នុងឃុំត្រពាំងចាន់ ស្រុកបរិបូណ៌ ស្រាប់តែនៅម៉ោង១១និង២០នាទីយប់ថ្ងៃទី០៧ ខែធ្នូ ឆ្នាំ២០១៧ សមត្ថកិច្ចកងរាជអាវុធហត្ថបានឃាត់រថយន្ត០១គ្រឿង ស្លាកលេខ តាកែវ៣A-១១៥១ក្បាលពណ៌ស ទ្រុងពណ៌ខៀវដែលបានដឹកគោ៧ក្បាល ។
អ្នកបើករថយន្តបានប្រាប់ថា សំបុត្រដឹកនាំគោនៅថៅកែគេ និងយកមកតាមក្រោយគេបានដកលុយ១០ម៉ឺនរៀល សុំសមត្ថកិច្ចទៅតែសមត្ថកិច្ចមិនយល់ព្រម គឺទាមទាររកលិខិតដឹកនាំគោត្រឹមត្រូវទើបអនុញ្ញាឲ្យទៅ ។ ពេលនោះអ្នកបើកររថយន្តដឹងខ្លួនក៏បានសុំទៅបត់ជើង ហើយរត់គេចខ្លួនបាត់នៅសល់តែព្រូរថយន្តម្នាក់និងរថយន្តត្រូវសមត្ថកិច្ចឃាត់ខ្លួនព្រូរថយន្ត និងរថយន្តទាំងគោមកកាន់ទីបញ្ជាការដ្ឋានកងរាជអាវុធហត្ថខេត្តតែម្តង ។
ដោយឡែកជនសង្ស័យដែលបានចាប់ខ្លួនសមត្ថកិច្ចសុំលាក់អត្តសណ្ណាញសិន ដើម្បីស្វែងរកចាប់បក្ខពួករបស់គេប្រគល់ឲ្យតុលាការផ្តន្ទាទោសតាមបញ្ញត្តិច្បាប់ ។
ក្រោយពីសមត្ថកិច្ចជំនាញស្រាវជ្រាវសួរនាំព្រូរថយន្តទើបដឹងថា គោមួយក្រោលត្រូវគេលួចមកពីខេត្តពោធិសាត់ទៅកាន់ខេត្តតាកែវ ទើបសមត្ថកិច្ចប្រកាសរកប្រជាពលរដ្ឋជាម្ចាស់គោខេត្ត្តពោធិសាត់ តាមរយៈសមត្ថកិច្ចខេត្តពោធិសាត់ឲ្យម្ចាស់គោធ្វើលិខិតស្នាមបញ្ជាក់ពីអាជ្ញាធរភូមិ-ឃុំ មកទទួលយកគោទៅផ្ទះវិញនៅល្ងាចថ្ងៃទី០៩ ខែធ្នូ ឆ្នាំ២០១៧ ។
ស្ត្រីឈ្មោះអ៊ុក សំអៀង អាយុ៦១ឆ្នាំ រស់នៅភូមិអូទោង សង្កាត់ចំរើនផល ក្រុងពោធិសាត់ ខេត្តពោធិសាត់ជាម្ចាស់គោ និងលោកពេជ សុភាព ជាមេភូមិអូទោង ក្នុងពេលមកទទួលយកគោទាំង៧ក្បាលបាននិយាយថា គោទាំង៧ក្បាលមានញី៥ក្បាលឈ្មោល២ក្បាល គាត់ជាម្ចាស់បានចងទុកនៅក្រោយផ្ទះក្នុងពេលយប់ដូចធម្មតា ។ លុះដល់ម៉ោងម៉ោង១រំលងអធ្រាត្រឈានចូលថ្ងៃទី០៨ ទើបគាត់ដឹងថា គោមួយក្រោលត្រូវចោរលួចយកបាត់ទាំងអស់ ហើយគាត់ក៏បានប្តឹងសមត្ថកិច្ច និងអាជ្ញាធរមូលដ្ឋានឲ្យជួយស្វែងរកហើយនៅព្រឹកថ្ងៃទី០៨ទើបដឹងថា សមត្ថកិច្ចកងរាជអាវុធហត្ថខេត្តកំពង់ឆ្នាំងចាប់ពីក្រុមចោរ និងគោបានហើយ គាត់មានក្តីរំភើបរីករាយយ៉ាងខ្លាំង ។
លោកមេភូមិ ទាំងស្ត្រីជាម្ចាស់គោ បានថ្លែងអំណរគុណយ៉ាងជ្រាវជ្រៅដល់លោកមេបញ្ជាការ លោកមេបញ្ជាកងរង និងសមត្ថកិច្ចកងរាជអាវុធហត្ថខេត្តទាំងអស់ សូមអស់មានជោគជ័យគ្រប់ភាកិច្ច ។ពិសេសពួកគាត់មិនទាមទារគុណស្រ័យអ្វីនោះឡើយ ដែលនេះពិតជាសមត្ថកិច្ចដ៏ល្អពិតប្រាកដសាកសម និងពាក្យថាសមត្ថកិច្ច គឺជាកូនចៅ ប្រជាជនរស់ដោយសារប្រជាជន និងធ្វើអ្វីៗទាំងអស់ដើម្បីប្រជាជន ៕
ចែករំលែកព័តមាននេះ