ប្រទេសកូរ៉េខាងជើង ៖ ទីភ្នាក់ងារសារព័ត៌មានកូរ៉េខាងជើង KCNA រាយការណ៍កាលពីថ្ងៃទី៩ ធ្នូ ថា ប្រទេសកូរ៉េខាងជើងបានចោទសហរដ្ឋអាមេរិកថា ធ្វើការគំរាមកំហែងខាងនុយក្លេអ៊ែរពេលពិភាក្សាជាមួយអ្នកទទួលខុសត្រូវជាន់ខ្ពស់នៃ អ.ស.ប ក៏ប៉ុន្តែបានយល់ព្រមធ្វើការទាក់ទងដោយទៀងទាត់ជាមួយ អ.ស.ប ។
អ្នកការទូតអាមេរិក លោក JEFFREY FELTMAN អគ្គលេខាធិការរង អ.ស.ប ទទួលបន្ទុកកិច្ចការនយោបាយបានមកដល់ក្រុងប៉េកាំងនាថ្ងៃទី៩ ធ្នូ ក្រោយពីទស្សនកិច្ចរបស់
លោករយៈពេល៥ថ្ងៃនៅក្រុងព្យុងយ៉ាងសំដៅស្វែងរកច្រកចេញពីវិបត្តិនៅឧបទ្វីបកូរ៉េ ។
ទស្សនកិច្ចវិសាមញ្ញនេះចាប់ផ្តើម១សប្តាហ៍ក្រោយពីក្រុងព្យុងយ៉ាងបាញ់សាកមីស៊ីលបាលីស្ទិករំលងទ្វីបមួយដែលតាមពួកអ្នកជំនាញការថា អាចបាញ់ដល់ដែនដីសហរដ្ឋអាមេរិក ។
នាឱកាសនៃទស្សនកិច្ចពិសេសនេះលោក FELTMAN បានជួបជាមួយរដ្ឋមន្ត្រីការ
បរទេសកូរ៉េខាងជើងលោក RI YONG HO និងអនុរដ្ឋមន្ត្រីការបរទេសលោក PAK MYON KUK ។
KCNA រៀបរាប់ថា ពេលជួបពិភាក្សាគ្នាភាគីរបស់យើងថ្លែងថា នយោបាយប្រទូស្តរ៉ាយរបស់សហរដ្ឋអាមេរិកចំបោះកូរ៉េខាងជើង និងការគំរាមកំហែងនុយក្លេអ៊ែររបស់គេជាមូលហេតុនៃសភាពការណ៍តានតឹងបច្ចុប្បន្ននៅឧបទ្វីបកូរ៉េ ។ ម្យ៉ាងទៀតកូរ៉េខាងជើងបានព្រមព្រៀងជាមួយ អ.ស.ប ដើម្បីធ្វើការប្រាស្រ័យទាក់ទងគ្នាដោយទៀងទាត់តាមរយៈទស្សនកិច្ចក្នុងកម្រិតផ្សេងៗ ។
ក្នុងសេចក្តីប្រកាសមួយចេញផ្សាយនាថ្ងៃទី៩ ធ្នូ នៅក្រុងញូវយ៉ក អ.ស.ប គូសបញ្ជាក់ថា ភាគីទាំង២បានព្រមព្រៀងគ្នាចាត់ទុកសភាពការណ៍បច្ចុប្បន្នថាជាបញ្ហានៃសន្តិភាព និងសន្តិសុខដែលតានតឹងបំផុត និងគ្រោះថ្នាក់បំផុតលើពិភពលោកនាពេលនេះ ។
យោងតាមសេចក្តីប្រកាសនេះថា លោក FELTMAN គូសបញ្ជាក់ពីភាពចាំបាច់អនុវត្តទាំងស្រុងបណ្តាដំណោះស្រាយរបស់ក្រុមប្រឹក្សាសន្តិសុខ អ.ស.ប ។ លោកក៏និយាយដែរថា ដំណោះស្រាយនៃវិបត្តិនៅឧបទ្វីបកូរ៉េអាចដោះស្រាយតែតាមផ្លូវការទូតតាមរយៈដំណើរការនៃការចរចាប៉ុណ្ណោះ ។
KCNA ពុំនិយាយពីការជួបគ្នាណាមួយរបស់លោក FELTMAN ជាមួយលោកគីម ជុងអ៊ុន ឡើយ តែលោកបានជួបជាមួយលោក RI SU YONG អនុប្រធានគណៈកម្មាធិការកណ្តាលបក្សពលករកូរ៉េ ៕
ចែករំលែកព័តមាននេះ