រាជធានីភ្នំពេញ ៖ បុរសវ័យចំណាស់២នាក់មានទំនាស់វាយតប់គ្នា ដោយផ្ដើមចេញពីការមានផឹកមានស៊ីអត់ហៅដៃគូផឹកផង ដោយមិនធ្វើតាមទម្លាប់រាល់ថ្ងៃ ក៏ផ្ទុះកំហឹងដាល់ទៅលើបុរសម្នាក់២-៣ដៃតែម្ដង ហេតុការណ៍នោះ បង្កឲ្យមានការភ្ញាក់ផ្អើលកាលពីវេលាម៉ោង៩និង២០នាទីព្រឹក ថ្ងៃទី១០ ធ្នូ…
រាជធានីភ្នំពេញ ៖ បុរសវ័យចំណាស់២នាក់មានទំនាស់វាយតប់គ្នា ដោយផ្ដើមចេញពីការមានផឹកមានស៊ីអត់ហៅដៃគូផឹកផង ដោយមិនធ្វើតាមទម្លាប់រាល់ថ្ងៃ ក៏ផ្ទុះកំហឹងដាល់ទៅលើបុរសម្នាក់២-៣ដៃតែម្ដង ហេតុការណ៍នោះ បង្កឲ្យមានការភ្ញាក់ផ្អើលកាលពីវេលាម៉ោង៩និង២០នាទីព្រឹក ថ្ងៃទី១០ ធ្នូ ស្ថិតនៅភូមិអន្លូងគងថ្មី សង្កាត់ព្រៃស ខណ្ឌដង្កោ ។
តាមប្រភពព័ត៌មានឲ្យដឹងថា បុរសដៃដល់ដែលខឹងគេអត់ហៅផឹកនោះឈ្មោះ រស់ សុខណៃ អាយុ៥៦ឆ្នាំ មុខរបរកសិករ ស្នាក់នៅក្នុងភូមិ-កើតហេតុខាងលើ ចំណែកបុរសរងគ្រោះឈ្មោះ វណ្ណា អាយុ៤០ឆ្នាំ មុខរបរជាសន្តិសុខឯកជន ស្នាក់នៅក្បែរគ្នាក្នុងភូមិនោះដែរ។
ប្រភពដដែលបន្តទៀតថា អ្នកទាំងពីរនាក់នោះមិនត្រឹមតែជាអ្នករស់នៅជិតខាងគ្នានោះទេ គឺជាដៃគូផឹកស៊ីដោយមិនអាចមានម្នាក់អត់ម្នាក់ណាបានឡើយ។ កន្លងមក ពួកគាត់តែងតែផឹកស៊ីជាមួយគ្នាជានិច្ច ថ្វីដ្បិតតែមានវ័យចាស់ៗទៅហើយក្ដី លុះដល់ថ្ងៃកើតហេតុបុរសរងគ្រោះដែលក្មេងជាងបានផឹកស៊ីទាំងព្រឹកជាមួយអ្នកភូមិផ្សេងទៀត ដោយមិនបានហៅជនដៃដល់ជាដៃគូនោះទេ។ខណៈនោះបានធ្វើឲ្យបុរសនោះអាក់អន់ស្រពន់ចិត្តយ៉ាងខ្លាំង ក៏ផ្ទុះកំហឹងនិយាយឌឺដងដាក់គ្នារហូតដល់វាយតប់គ្នាកើតឡើង ហើយជនដៃដល់បានប្រើកណ្ដាប់ដៃដាល់ទៅលើជនរងគ្រោះ២-៣ដៃ បណ្ដាលឲ្យប៉ោងមុខ។
ប្រភពដដែលបញ្ជាក់ទៀតថា ពេលនោះបង្កឲ្យមានការភ្ញាក់ផ្អើលយ៉ាងខ្លាំង ហើយមានអ្នករាយការណ៍ទៅនគរបាលថា ក្មេងស្ទាវកំពុងវាយកាប់ចាក់គ្នាខ្លាំងណាស់ សូមឲ្យជួយអន្តរាគមន៍បន្ទាន់។ ក្រោយពេលទទួលបានព័ត៌មាននោះភ្លាមកម្លាំងនគរបាលប៉ុស្តិ៍ព្រៃ.ស បានចុះទៅកាន់ទីនោះភ្លាមៗ ប៉ុន្តែពេលទៅដល់ស្រាប់តែមានការហួសចិត្តយ៉ាងខ្លាំង ដោយអ្នកវាយតប់គ្នានោះមិនមែនជាក្មេងស្ទាវទេ គឺសុទ្ធតែចាស់ស្ទាវទៅវិញ។
បន្ទាប់មកនគរបាលបានចាប់បុរសដៃដល់ទៅសាកសួរ ទើបដឹងថា ទំនាស់វាយតប់គ្នានោះដោយសារតែមានផឹកមានស៊ីក្បត់ដៃគូសោះ ហើយនគរបាលបានកសាងសំណុំរឿងចាត់ការតាមច្បាប់។ ដោយឡែកបុរសដៃដល់និយាយថា គាត់មិនបានវាយទៅលើបុរសរងគ្រោះនោះឡើយ គាត់គ្រាន់តែច្រានឲ្យដួលបោកផ្ទប់រទេះលក់នំបុ័ងប៉ុណ្ណោះ។ ចំណែកមូលហេតុដែលនាំឲ្យមានទំនាស់កើតឡើងដោយសារតែគាត់ខឹងជនរងគ្រោះស្រែកជេរគាត់ ហើយពេលគាត់ក្រោកពីដេកឮជននោះ គាត់សួរថា «តើឯងជេរម្រ៉ាយនរណា?» ជននោះឆ្លើយថា «អញជេរឯងនឹង ហើយយ៉ាងម៉េចបើអញជេរម្រ៉ាយឯង តើធ្វើអីអញ?»។ ដោយខឹងខ្លាំងពេក ទើបគាត់ច្រានបណ្ដាលឲ្យដួលរងរបួសតែម្ដងទៅ៕
ចែករំលែកព័តមាននេះ