ខេត្តកំពង់ធំ ៖ ប្តីប្រពន្ធ២នាក់ បន្ទាប់ពីបានដាំបាយហូបមិនបានពន្លត់ភ្លើងឲ្យអស់នាំគ្នាទៅច្រូតស្រូវត្រូវបានភ្លើងឆេះផ្ទះ ហេតុការណ៍នេះបានកើតឡើងកាលពីរសៀលថ្ងៃទី០៩ ខែធ្នូ ឆ្នាំ២០១៧ ស្ថិតនៅក្នុងភូមិបាក់ស្នាក្រោម ឃុំបាក់ស្នា ស្រុកបារាយណ៍ ខេត្តកំពង់ធំ ។
លោកវរសេនៅនីយ៍ត្រីសន តាល់ អធិការរងនគរបាលស្រុកបារាយណ៍បានប្រាប់ឲ្យដឹងនៅរសៀលថ្ងៃទី១០ ខែធ្នូនេះថា ជនរងគ្រោះនៅក្នុងឧប្បត្តិហេតុភ្លើងឆេះផ្ទះខាងលើ ដែលប្តីឈ្មោះម៉ៅ ចៀប អាយុ៣៨ឆ្នាំ ចំណែកប្រពន្ធឈ្មោះចូវ អ៊ីន អាយុ៣៦ឆ្នាំ រស់នៅភូមិឃុំកើតហេតុខាងលើ ។
យោងតាមការឲ្យដឹងពីជនរងគ្រោះនៅព្រឹកថ្ងៃកើតហេតុ ប្តីប្រពន្ធទាំង២នាក់ បន្ទាប់ពីបានចម្អិនអាហារ រួចបាននាំគ្នាហូបបាយ ហើយស្រកពោះបន្តិចក៏នាំគ្នាដើរទៅច្រូតស្រូវក្នុងស្រែដែលនៅមិនឆ្ងាយពីផ្ទះប៉ុន្មាននោះទេ ដោយពុំបានពន្លត់ភ្លើងចង្ក្រានឲ្យបានត្រឹមត្រូវ ក៏បណ្តាលឲ្យរងើកភ្លើងចង្ក្រានដែលនៅសេសសល់នោះប៉ើងទៅប៉ះផ្ទះធ្វើឲ្យឆាបឆេះយ៉ាងសន្ធោសន្ធៅ ប្រជាពលរដ្ឋជិតខាងនាំគ្នាជួយពន្លត់ដែរ តែមិនអាចចូលទៅជិតបានធ្វើឲ្យភ្លើងឆេះយ៉ាងខ្លាំង ទម្រាំតែរថយន្តពន្លត់អគ្គិសភ័យរបស់អធិការរដ្ឋានស្រុកទៅដល់ជួយអន្តរាគមន៍បាញ់ពន្លត់នោះ ផ្ទះទាំងមូលត្រូវឆេះអស់បាត់ទៅហើយ សម្ភារៈដែលត្រូវខូចខាតរួមមាន ផ្ទះ២ខ្នងធ្វើអំពីឈើប្រក់ក្បឿងជញ្ជាំងបាំងស្លឹក ម៉ូតូហុងដាម៉ាកវេវ០១គ្រឿង ស្រូវចំនួន១០បេ ឈើ២ម៉ែត្រគូប និងសម្ភារមួយចំនួនទៀត នៅក្នុងនោះផងដែរ ។
លោកសូមអំពាវនាវដល់បងប្អូនប្រជាពលរដ្ឋថា មុននឹងចេញពីផ្ទះទៅប្រកបរបរការងារផ្សេងៗនោះត្រូវបិតបារ៉ែតភ្លើង និងពន្លត់ភ្លើងចង្ក្រានឲ្យត្រឹមត្រូវជាមុនសិនចៀសវាងនូវកំហុសឆ្គងនាំឲ្យមានការបាត់បង់ និងស្តាយស្រណោះដូចជាករណីខាងលើនេះ៕
ចែករំលែកព័តមាននេះ