រាជធានីភ្នំពេញ ៖ កម្លាំងអាជ្ញាធរចម្រុះខណ្ឌមានជ័យ ដឹកនាំលោកពេជ្រ កែវមុនី អភិបាលខណ្ឌមានជ័យ បានចុះពិនិត្យទីតាំងផលិតទឹកសៀង និងទឹកម្ទេសមួយកន្លែង ផ្លូវប៉េតុង ក្នុងភូមិឬស្សី៣ សង្កាត់ស្ទឹងមានជ័យ ខណ្ឌមានជ័យ កាលពីវេលាម៉ោង១១ និង០០នាទីព្រឹកថ្ងៃ១០ ខែធ្នូ ឆ្នាំ២០១៧ ។
លោកពេជ្រ កែវមុនី អភិបាលខណ្ឌមានជ័យឲ្យដឹងថា ការចុះមកត្រួតពិនិត្យទីតាំងផលិតទឹកសៀង និងទឹកម្ទេសខាងលើនេះគឺធ្វើឡើងក្រោយអាជ្ញាធរទទួលបានពាក្យបណ្តឹងពីពលរដ្ឋលើបញ្ហាអនាម័យ ដោយមានក្លិនសាយភាយខ្លាំងចេញមកខាងក្រៅប៉ះពាល់ដល់ខ្យល់ដង្ហើមពលរដ្ឋដែលរស់នៅជុំវិញតំបន់នោះ ។
លោកបញ្ជាក់ថា នៅថ្ងៃដដែលអាជ្ញាធរគ្រាន់តែចុះមកពិនិត្យមើលជាក់ស្តែងសិននោះទេ ហើយនឹងកំណត់កាលបរិច្ឆេតឲ្យម្ចាស់ទីតាំងចូលទៅបកស្រាយបំភ្លឺតបនឹងបណ្តឹងពលរដ្ឋ ។ ទន្ទឹមនឹងនោះក៏តម្រូវឲ្យម្ចាស់ទីតាំងយកឯកសារពាក់ព័ន្ធស្តីពីការអនុញ្ញាត្តិច្បាប់ឲ្យដំណើរការអាជីវកម្មទៅបង្ហាញជូនអាជ្ញាធរផងដែរ ក្នុងករណីដែលម្ចាស់ទីតាំងមិនមានច្បាប់អនុញ្ញាត្តិត្រឹមត្រូវពីមន្ទីរជំនាញ ឬក្រសួងពាក់ព័ន្ធទេ អាជ្ញាធរនឹងសម្រេចបិទអាជីវកម្មនេះចោលទាំងស្រុង ហើយមិនបន្តអនុញ្ញាត្តិឲ្យដំណើរអាជីវកម្មសារជាថ្មីតទៅទៀតឡើយ ។
គួររំលឹកថា កាលពីល្ងាចថ្ងៃទី០៦ ខែធ្នូ ឆ្នាំ២០១៧ កន្លងទៅទីតាំងផលិតទឹកសៀង និងទឹកម្ទេចខាងលើធ្លាប់ត្រូវបានកម្លាំងប្រតិបត្តិការពិសេសនៃគណៈកម្មាធិការប្រយុទ្ធប្រឆាំងផលិតផលក្លែងក្លាយដែលបង្កគ្រោះថ្នាក់ខ្ពស់ដល់សុខភាព និងសុវត្ថិភាពសង្គម ហៅកាត់ គ.ប.ផ.ក ដោយឯកភាពពីលោកងិន ពេជ ព្រះរាជអាជ្ញាររងអមសាលាដំបូងរាជធានីភ្នំពេញ បានសម្រេចផ្អាកអាជីវកម្មនេះជាបណ្តោះអាសន្នសិន ក្រោយរកឃើញថា ផលិតផលទឹកសៀងនៃទីតាំងខាងលើ មិនបានចុះបញ្ជីផលិតផលជាមួយស្តង់ដារកម្ពុជាត្រឹមត្រូវតាមច្បាប់ ។ ក្រោយការផ្អាកអាជីវកម្មបាន៤ថ្ងៃ អាជីវកម្មនេះក៏ដំណើរការវិញជាធម្មតា ៕
ចែករំលែកព័តមាននេះ