រាជធានីភ្នំពេញ ៖ យុជនម្នាក់បានស្លាប់បាត់បង់ជីវិតក្រោយពេលបញ្ជូនទៅសង្គ្រោះដល់មណ្ឌលសុខភាពដង្កោ ខណៈពេលជិះម៉ូតូ១គ្រឿងទៅធ្វើការ ហើយបានជួបគ្រោះថ្នាក់ចរាចរណ៍ជ្រុលទៅកៀរកញ្ចក់រថយន្ត១គ្រឿងបណ្ដាលឲ្យដួលខ្ទាតទៅកណ្តាលថ្នល់ ។ ពេលនោះស្រាប់តែមានម៉ូតូ១គ្រឿងផ្សេងទៀត បើកទៅដល់បុកកិនចំពាក់កណ្ដាលខ្លួនបណ្ដាលឲ្យស្លាប់បែបនេះតែម្ដង ។ គ្រោះថ្នាក់ចរាចរណ៍ខាងលើនោះបានកើតឡើងកាលពីវេលាម៉ោង៩និង១០នាទីព្រឹកថ្ងៃទី១០ ខែធ្នូ ឆ្នាំ២០១៧ នៅលើកំណាត់ផ្លូវព្រៃស ស្ថិតនៅក្នុងភូមិប្រកា សង្កាត់ព្រៃស ខណ្ឌង្កោ រាជធានីភ្នំពេញ។
ជនរងគ្រោះឈ្មោះតាប់ ណាក់ អា២៥ឆ្នាំ មុខរបរកម្មកររោងចក្រកាត់ដេរ ស្នាក់នៅភូមិអន្លង់សង្កែ ឃុំតាសាល ស្រុកឱរ៉ាល់ ខេត្តកំពង់ស្ពឺ ។ ជិះម៉ូតូ១គ្រឿង សេ១២៥ ពណ៌ខ្មៅ ស៊េរីឆ្នាំ២០១២ ស្លាកលេខកំពង់ចាម១I-៩៦១១ ។ ចំណែករថយន្តកូរ៉េ ពណ៌ខៀវ ដឹកអីវ៉ាន់ ស្លាកលេខ ភ្នំពេញ២B-៨៥០៣ បើក ដោយបុរសមិនស្គាល់ឈ្មោះម្នាក់ និងបានរត់គេចខ្លួនបាត់ស្រមោលបន្សល់ទុកនៅតែព្រូម្នាក់ ត្រូវបាននគរបាលឃាត់ខ្លួន ។ ដោយឡែកម៉ូតូ១គ្រឿងទៀត ដែលបានបើកបុក និងកិនជនរងគ្រោះរហូតដល់ស្លាប់នោះមិនត្រូវបានគេចាំម៉ាក និងស្លាកលេខឡើយ ព្រោះបានគេចទៅបាត់ដែរ ។
ព័ត៌មានបានឲ្យដឹងថា នៅមុនពេលកើតហេតុរថយន្ត មួយគ្រឿងនោះបានបើកធ្វើដំណើរក្នុងទិសដៅពីលិចទៅកើត ។ លុះពេលទៅដល់ត្រង់ចំណុចកើតហេតុបានឈប់អែបខាង ហើយអ្នកបើកចុះបត់ជើងតូច លុះបត់ជើងរួចក៏បានបើកចេញដំណើរបន្តទៅមុខទៀត ប៉ុន្តែទើបតែបើកៗយែតមិនទាន់ផុតពីកន្លែងឈប់ផង ជនរងគ្រោះក៏បានជិះម៉ូតូ១គ្រឿងក្នុងទិសដៅស្របគ្នាទៅដល់ល្មម ។ ពេលនោះដៃចង្កូតម៉ូតូបានកៀរទាក់ជាមួយកញ្ចក់រថយន្តបណ្ដាលឲ្យដួលខ្ទាតទៅកណ្ដាលផ្លូវ ហើយរងរបួស ។ ស្របពេលនោះដែរក៏មានម៉ូតូ១គ្រឿងផ្សេងទៀត មិនស្គាល់ម៉ាកបើកបរស្របគ្នាពីលិចទៅកើតបានទៅដល់បុកនឹងកិនចំពាក់កណ្ដាលខ្លួនបណ្ដាលឲ្យយុវជននោះរបួសធ្ងន់ និងបានស្លាប់ពេលបញ្ជូនទៅសង្គ្រោះដល់មណ្ឌលសុខភាពដង្កោ ។
បន្ទាប់មកនគរបាលបានទំនាក់ទំនងទៅគ្រួសារឲ្យយកសពទៅធ្វើបុណ្យតាមប្រពៃណី ចំណែករថយន្ត និងម៉ូតូត្រូវបាននគរបាលនាំយកទៅរក្សាទុករង់ចាំការដោះស្រាយគ្នានៅពេលក្រោយ ៕
ចែករំលែកព័តមាននេះ