ខេត្តព្រះវិហារ ៖ កាលពីថ្ងៃទី៨ ធ្នូ ឆ្នាំ២០១៧ សេចក្តីប្រកាសព័ត៌មានរបស់ WCS ឱ្យដឹងថា បន្ទាប់ពីបានការការពារពីសមាជិកសហគមន៍អស់រយៈពេល៥សប្តាហ៍ កូនសត្វអង្កត់ខ្មៅចំនួន៣ក្បាលបានញាស់ក្នុងដែនជម្រកសត្វព្រៃគូលែនព្រហ្មទណ្ឌនៃតំបន់ខ្ពង់រាបខាងជើងប្រទេសកម្ពុជា…
ខេត្តព្រះវិហារ ៖ កាលពីថ្ងៃទី៨ ធ្នូ ឆ្នាំ២០១៧ សេចក្តីប្រកាសព័ត៌មានរបស់ WCS ឱ្យដឹងថា បន្ទាប់ពីបានការការពារពីសមាជិកសហគមន៍អស់រយៈពេល៥សប្តាហ៍ កូនសត្វអង្កត់ខ្មៅចំនួន៣ក្បាលបានញាស់ក្នុងដែនជម្រកសត្វព្រៃគូលែនព្រហ្មទណ្ឌនៃតំបន់ខ្ពង់រាបខាងជើងប្រទេសកម្ពុជា ដែលផ្តល់ជាក្តីសង្ឃឹមដល់អនាគតនៃការអភិវឌ្ឍប្រភេទសត្វដ៏កម្រមួយនេះ ។
អង្កត់ខ្មៅ (ឬដំបងគ្រញូង) គឺជាសត្វស្លាបដ៏កម្រមួយប្រភេទនៅក្នុងតំបន់អាស៊ី និងស្ថិតនៅក្នុងបញ្ជីក្រហមរបស់អង្គការ IUCN ជាប្រភេទជិតរងគ្រោះជាសាកល ។ តាមការប៉ាន់ប្រមាណ អង្កត់ខ្មៅនៅលើសាកលលោកមានចំនួនចន្លោះពី១៥.០០០ក្បាលទៅ៣៥.០០០ក្បាល ហើយភាគច្រើននៃចំនួនទាំងអស់នោះមានរស់នៅក្នុងប្រទេសអូស្ត្រាលី ។ សត្វអង្កត់ខ្មៅចំនួនតិចជាង១០គូប៉ុណ្ណោះ កំពុងរស់នៅកម្ពុជាដែលជាប្រទេសតែមួយគត់នៅក្នុងតំបន់អាស៊ីអាគ្នេយ៍ ដែលគេតែងតែអង្កេតឃើញមានវត្តមានសត្វស្លាបដ៏កម្រមួយនេះ ។
លោកយឿន យឺប ដែលជាអ្នករកឃើញសំបុក ហើយត្រូវបានអង្គការ WCSជួលឱ្យយាមសំបុកសត្វអង្កត់ខ្មៅនេះ បាននិយាយថា៖ «ខ្ញុំពិតជាសប្បាយចិត្តខ្លាំងណាស់ដែលបានឃើញកូនសត្វអង្កត់ខ្មៅទាំង៣ក្បាលនេះ ពីព្រោះពួកវាគឺជាប្រភេទសត្វស្លាបកម្រ ហើយយើងមិនសូវប្រទះឃើញពួកវានៅក្នុងព្រៃឡើយ។ ខ្ញុំបានសម្រេចការងារយាមសំបុកនេះ ហើយសង្ឃឹមថាអ្នកផ្សេងទៀតនឹងជួយអភិរក្សពួកវាឱ្យនៅគង់វង្ស »។
កម្មវិធីការពារសំបុកសត្វស្លាបនៅក្នុងតំបន់ខ្ពង់រាបភាគខាងជើងប្រទេសកម្ពុជា ត្រូវបានរៀបបង្កើតឡើងដើម្បីទប់ស្កាត់ការប្រមូលយកពង និងកូនសត្វស្លាប សំខាន់ៗ ។ តាមរយៈកម្មវិធីនេះ ប្រជាជនរស់នៅក្នុងដែនជម្រកសត្វព្រៃឆែប និងដែនជម្រកសត្វគូលែន ព្រហ្មទេពដែលធ្លាប់តែប្រមូលយកពងកូនសត្វស្លាប ទទួលបានប្រាក់លើកទឹកចិត្ត ប្រសិនបើពួកគាត់ចូលរួមថែរក្សា និងការពារសំបុកពងកូនរបស់សត្វស្លាប សំខាន់ៗរហូតដល់កូនញាស់ និងហើរចេញពីសំបុក ។
លោករស់ វ៉ាន់ ប្រធានក្រុមស្រាវជ្រាវប្រចាំដែនជម្រកសត្វព្រៃគូលែន ព្រហ្មទេព នៃក្រសួងបរិស្ថាន និងអង្គការWCS បាននិយាយថា៖ «អង្កត់ខ្មៅគឺជាប្រភេទដ៏កម្រនៅក្នុងប្រទេសកម្ពុជា ។ ពួកវាមានរបា៉យនៅច្រើនទីកន្លែង ប៉ុន្តែចំនួនរបស់ពួកវាមានតិចតួចណាស់។ ប្រសិនបើយើងមិនអភិរក្ស ពួកវានឹងផុតពូជនៅក្នុងពេលខាងមុខដ៏ខ្លី »។
តំបន់ខ្ពង់រាបភាគខាងជើងប្រទេសកម្ពុជា រួមមានដែនជម្រកសត្វព្រៃគូលែន ព្រហ្មទេព ដែនជម្រកសត្វព្រៃឆែប និងជម្រកសត្វព្រៃព្រះរកា ។ អង្គការ WCS សហការជាមួយក្រសួងបរិស្ថាន បង់ប្រាក់ឱ្យសមាជិកសហគមន៍ដើម្បីការពារសំបុកសត្វ សំខាន់ៗដែលងាយរងការគំរាមកំហែងពីការប្រមូលយកពងកូន និងសត្វដទៃស៊ីពងវាជាអាហារ ។
តាមរយៈកម្មវិធីនេះ ប្រជាសហគមន៍ដែលធ្លាបប់តែប្រមូលយកពងកូនសត្វស្លាប បានក្លាយខ្លួនទៅជាអ្នកថែរក្សា និងការពារសត្វស្លាបដ៏ស្រស់ស្អាតទាំងអស់នោះវិញ ដូចជាសត្វអង្កត់ខ្មៅនេះជាដើម ។
លោកសុង ច័ន្ទសុជាតិ អនុប្រធានមន្ទីរបរិស្ថានខេត្តព្រះវិហារ បាននិយាយថា៖ «តំបន់ខ្ពង់រាបខាងជើងប្រទេសកម្ពុជា គាំទ្រការរស់នៅរបស់ថនិកសត្វប្រភេទរងគ្រោះជាសាកលចំនួន៥៧ប្រភេទ និងសត្វស្លាបចំនួន៣០០ប្រភេទ។ ការថែរក្សា និងការការពារតំបន់នេះ ពិតជាចាំបាច់ខ្លាំងណាស់ដើម្បីធានាដល់ការពងកូន និងការរស់រាននៃសត្វព្រៃ សំខាន់ៗ ។ សូមចូលរួមថែរក្សា និងការពារសត្វព្រៃនៅកម្ពុជាដោយបញ្ឈប់ការទិញ ឬបរិភោគសាច់សត្វព្រៃជាដើម» ៕
ចែករំលែកព័តមាននេះ