ខេត្តកំពង់ស្ពឺ ៖ ក្រុមអ្នកញៀនល្បែងជល់មាន់ និងជាមុខសញ្ញាថ្នាំញៀនមួយក្រុមត្រូវបានសមត្ថកិច្ចឆ្មក់ធ្វើការបង្ក្រាបបានមួយសម្បុកធំ បន្ទាប់ពីពួកគេផ្តុំគ្នាជល់មាន់ និងចែកចាយថ្នាំញៀន។ ប្រតិបត្តិការនេះធ្វើឡើងតាមការចង្អុលបង្ហាញរបស់លោកអភិបាលខេត្តកំពង់ស្ពឺ ដឹកនាំដោយលោកអភិបាលរងខេត្ត លោកព្រះរាជអាជ្ញារង អ៊ូ…
ខេត្តកំពង់ស្ពឺ ៖ ក្រុមអ្នកញៀនល្បែងជល់មាន់ និងជាមុខសញ្ញាថ្នាំញៀនមួយក្រុមត្រូវបានសមត្ថកិច្ចឆ្មក់ធ្វើការបង្ក្រាបបានមួយសម្បុកធំ បន្ទាប់ពីពួកគេផ្តុំគ្នាជល់មាន់ និងចែកចាយថ្នាំញៀន។ ប្រតិបត្តិការនេះធ្វើឡើងតាមការចង្អុលបង្ហាញរបស់លោកអភិបាលខេត្តកំពង់ស្ពឺ ដឹកនាំដោយលោកអភិបាលរងខេត្ត លោកព្រះរាជអាជ្ញារង អ៊ូ ផាត និងកម្លាំងនគរបាលខេត្ត ព្រមទាំងស្រុកគងពិសីដឹកនាំដោយលោក ឃឹម សុផាន់រ៉ា ជាអធិការនគរបាល។
ប្រតិបត្តិការនេះធ្វើឡើងកាលពីរសៀលថ្ងៃ សុក្រ៥រោច ខែមិគសិរ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី០៨ ខែធ្នូ ឆ្នាំ២០១៧ នៅភូមិព្រៃកែស ឃុំព្រៃវិហារ ស្រុកគងពិសី ខេត្តកំពង់ស្ពឺ។ ប្រភពពីមន្ត្រីសាលាស្រុកគងពិសីបានប្រាប់ថា ក្រោមការដឹកនាំដោយផ្ទាល់ របស់លោក សរ សុពុត្រា អភិបាលរងខេត្តកំពង់ស្ពឺ និងដោយអនុវត្តតាមបទបញ្ជារបស់លោក វ៉ី សំណាង អភិបាលនៃគណៈអភិបាលខេត្តកំពង់ស្ពឺ ដែលជាប្រធានគណៈបញ្ជាការឯកភាពខេត្ត គណៈបញ្ជាការឯកភាពស្រុក កម្លាំងសមត្ថកិច្ចនគរបាលខេត្ត និងស្រុក បានចុះបង្ក្រាបជាក់ស្តែងបទល្មើសគ្រឿងញៀន និងល្បែងជល់មាន់នេះប្រកបដោយភាពជោគជ័យ ព្រមទាំងឃាត់ខ្លួនមុខសញ្ញាមានដីកាចាប់ខ្លួនម្នាក់ផងដែរ។
ជាលទ្ធផលក្នុងប្រតិបត្តិការនេះសមត្ថកិច្ចដែលដឹកនាំដោយលោកវរសេនីយ៍ ម៉ាត់ ធុច និងលោកវរសេនីយ៍ឯកឃឹម សុផាន់រ៉ា បានឈានទៅដល់ការឆែកឆេរផ្ទះជនសង្ស័យម្នាក់ឈ្មោះ ហៃ ចិត្រា ហៅក្នុយ ដកហូតបានម្សៅក្រាមពណ៌សថ្លាចំនួន ០៥កញ្ចប់ ទូរស័ព្ទ០៨គ្រឿង ដាវ២ដើម កាំបិត០១ មាន់១៥ក្បាល ជាលដាក់មាន់ ចំនួន៣២ ម្សៅក្រាមពណ៌សជាច្រើនកញ្ចប់ទៀតដែលជនសង្ស័យ ដាក់ចូលក្នុងដបទឹកសុទ្ធដើម្បីបំផ្លាញភស្តុតាង។ ក្នុងនោះឃាត់ខ្លួនមនុស្ស៥នាក់ ទី១-ឈ្មោះ ហៃ ចិត្រា ភេទប្រុស អាយុ២៦ឆ្នាំ នៅភូមិព្រៃកែស ឃុំព្រៃវិហារ (មានដីកាចាប់ខ្លួន) ទី២-ឈ្មោះ ង៉ែត អៀង ភេទប្រុស អាយុ១៧ឆ្នាំ នៅភូមិព្រៃកែស ឃុំព្រៃវិហារ ស្រុកគងពិសី ទី៣-ឈ្មោះ ហៀម ភារ៉ា ភេទប្រុស អាយុ២២ឆ្នាំ រស់នៅភូមិព្រៃស្មាច់ ឃុំព្រៃវិហារ ស្រុកគងពិសី។
ទី៤-ឈ្មោះ ឡុង ភារម្យ ភេទប្រុស អាយុ៣៦ឆ្នាំ ភូមិដំណាក់ពង្រ ឃុំព្រៃវិហារ ស្រុកគងពិសី ទី៥-ឈ្មោះ ស៊ឹម សំ ភេទប្រុស អាយុ៥៥ឆ្នាំ នៅភូមិស្វាយទង ឃុំខ្វាវ ស្រុកសំរោង ខេត្តតាកែវ។ បន្ទាប់ពីឆែកឆេរផ្ទះជនសង្ស័យ ហៃ ចិត្រា រួចមកសមត្ថកិច្ចបានបន្តធ្វើការឆែកឆេរផ្ទះឈ្មោះ ហ៊ួក ចាន់ថន ភេទស្រី អាយុ៤៤ឆ្នាំ។ ក្នុងការឆែកឆេរនោះសមត្ថកិច្ចរកឃើញម្សៅក្រាមពណ៌សថ្លា គ្រឿងញៀនប្រភេទម៉េតំហ្វេតាមីន១០កញ្ចប់ មូតូ៦គ្រឿង មាន់ជល់២០ក្បាល ដាវសាំម៉ូរៃ៣ដើម ពូថៅចំនួន១។ ក្រោយឃាត់ខ្លួនសមត្ថកិច្ចបានកសាងសំណុំរឿងបញ្ជូនក្រុមជនសង្ស័យទៅកាន់ការិយាល័យប្រឆាំងគ្រឿងញៀនដើម្បីចាត់ការបន្តតាមនីតិវិធី៕
ចែករំលែកព័តមាននេះ