ខេត្តស្វាយរៀង ៖ ស្ត្រីម្នាក់បានស្លាប់ភ្លាមៗនៅនឹងកន្លែងកើតហេតុ និងម្នាក់ទៀតរងរបួសស្រាលក្នុងហេតុការណ៍គ្រោះថ្នាក់ចរាចរណ៍ដ៏រន្ធត់មួយ រវាងរថយន្តដឹកតុ រោងការ បើកបុកម៉ូតូជនរងគ្រោះពីក្រោយរួចកិនពីលើជើងបាក់ ហើយថយក្រោយកិនថែមទៀត បណ្តាលឲ្យស្លាប់ភ្លាមៗនៅនឹងកន្លែង គួរឲ្យរន្ធត់។ ករណី គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង១១ និង១០នាទីព្រឹក ថ្ងៃទី៨ ខែធ្នូ ឆ្នាំ២០១៧ នៅត្រង់ចំណុចលើកំណាត់ផ្លូវជាតិលេខ១ ចន្លោះគីឡូម៉ែត្រលេខ១៣៧-១៣៨ ស្ថិតក្នុងភូមិ ប្រសូត្រ២ ឃុំ កណ្តៀងរាយ ស្រុកស្វាយទាប ខេត្តស្វាយរៀង។
បើតាមប្រភពប្រជាពលរដ្ឋនៅកន្លែងកើតហេតុបានឲ្យដឹងថា នៅមុនពេលកើតហេតុគេឃើញស្ត្រីរងគ្រោះទាំងពីរនាក់ជិះម៉ូតូមួយគ្រឿងម៉ាកហុងដាឌ្រីម សេ១២៥ ស៊េរីឆ្នាំ២០១៦ ពណ៌ខ្មៅពាក់ ស្លាក់លេខ ស្វាយរៀង ១H -៥៧៤៧ (មិនពាក់មួកសុវត្ថិភាព) ធ្វើដំណើរពីលិចទៅកើតស្របទិសគ្នាជាមួយរថយន្ត លុះមកចំណុចកើតហេតុខាងលើស្រាប់តែរថយន្តបុកពីក្រោយពេញទំហឹងលាន់ដូចរន្ទះ ប៉ើងស្ត្រីជិះពីក្រោយបុកនឹងកញ្ចក់រថយន្តរួចធ្លាក់នៅលើថ្នល់ពីមុខរថយន្ត ។ ខណៈនោះរថយន្តមិនព្រមចាប់ហ្វ្រាំងទេបើកកិនស្ត្រីរងគ្រោះពីលើចំជើងទៅហួសបន្តិចស្រាប់តែ ដាក់លេខថយក្រោយកិនបន្ថែមទៀតធ្វើឲ្យជនរងគ្រោះរបួសធ្ងន់ និងដាច់ខ្យល់ស្លាប់ភ្លាមៗនៅនឹងកន្លែងកើតហេតុតែម្តង។
ក្រោយពីបង្កហេតុរួច ជនបង្កបានបើករថយន្តទៅមុខបម្រុងរត់គេចខ្លួន ក៏ប៉ុន្តែត្រូវសមត្ថកិច្ចដេញតាមចាប់ខ្លួនបានទាំងមនុស្ស និងរថយន្ត។ សមត្ថកិច្ចបានឲ្យដឹងថា អ្នកបើកបររថយន្តមានឈ្មោះ ធុន សំបូរ ភេទប្រុស អាយុ២៥ឆ្នាំ ជនជាតិខ្មែរ មុខរបរ បើកបររថយន្តដឹកកម្មករ មានទីលំនៅភូមិជប់ ឃុំកណ្តៀងរាយ ស្រុកស្វាយទាប ខេត្តស្វាយរៀង គ្មានរបួសស្នាមទេ។ រថយន្តបង្ក ម៉ាកហ៊ីយ៉ាន់ដាយ ចំណុះ១តោនកន្លះ ពណ៌ខៀវ ស្លាកលេខ ភ្នំពេញ ២AL-៥៧១៦ ទិសដៅពីលិចទៅកើត។ ភាគីខាងម៉ូតូឈ្មោះ វ៉ាន់ លីដា ភេទស្រី អាយុ២៤ឆ្នាំ ជនជាតិខ្មែរ មុខរបរកសិករ មានទីលំនៅភូមិពោធិ៍ថ្មី ឃុំស្វាយតាយាន ស្រុកកំពង់រោទ៍ រងរបួសស្រាលអ្នកបើកបរម៉ូតូ។
រីឯអ្នករួមដំណើរឈ្មោះ រ័ត្ន មន្នីរ៉េត ភេទស្រី អាយុ ៦០ឆ្នាំ មុខរបរកសិករ រស់នៅភូមិឃុំជាមួយគ្នា បានស្លាប់នៅកន្លែងកើតហេតុ (មិនពាក់មួកសុវត្ថិភាព)។ ក្រោយពីធ្វើការវាស់វែងរួច សមត្ថកិច្ចបានប្រគល់សពឲ្យក្រុមគ្រួសារយកទៅផ្ទះធ្វើបុណ្យតាមប្រពៃណី ។ ចំពោះមធ្យោបាយទាំងពីរ និងជនបង្កសមត្ថកិច្ចជំនាញយកទៅរក្សាទុកនៅអធិការដ្ឋាននគរបាលស្រុកនិងកសាងសំណុំរឿងបញ្ជូនមកស្នងការដ្ឋាននគបាលខេត្តចាត់ការតាមផ្លូវច្បាប់៕
ចែករំលែកព័តមាននេះ