«Reuter»បានផ្សាយពីកិច្ចប្រជុំសភានៅក្រុងកង់បឺរ៉ា ប្រទេសអូស្ត្រាលីដោយបញ្ជាក់ថា បរិយាកាសនៃកិច្ចប្រជុំកាន់តែមានភាពអធិកអធមឡើងនៅពេលលោក Tim Wilson ពីគណបក្សសេរីនិយម ដែលជាបុរសស្រឡាញ់ភេទដូចគ្នាបានប្រកាសសុំរៀបការជាមួយបុរសគូស្នេហ៍នៅកណ្តាលកិច្ចប្រជុំ ដែលពិភាក្សាលើសេចក្តីព្រាងច្បាប់ស្តីពីអ្នកស្រឡាញ់ភេទដូចគ្នា ។
សេចក្តីព្រាងច្បាប់នោះនឹងអនុម័តក្នុងសប្តាហ៍នេះ ក្រោយពីព្រឹទ្ធសភាបានយល់ស្របកាលពីសប្តាហ៍មុន ។ ខណៈពេលកិច្ចពិភាក្សាកំពុងដំណើរការលោក Wilson បានថ្លែងដោយក្តីសោមនស្សដល់លោកRyan Bolger ដែលចូលរួមស្តាប់ដោយបង្ហាញស្នាមញញឹម និងទទួលយកការរៀបការក្រោមសំឡេងទះដៃអបអរសាទរលាន់ឮរំពង ។
លោក Wilson និងលោក Bolger បានបំពាក់ចិញ្ចៀនឲ្យគ្នា ប៉ុន្តែសន្យាថាដរាបណាសេចក្តីព្រាងច្បាប់រៀបការរបស់អ្នកស្រឡាញ់ភេទដូចគ្នាបានឆ្លងកាត់ការយល់ស្របពីសភា រួចទើបពួកគេរៀបការ ។
ប្រសិនបើសភាអូស្ត្រាលីឆ្លងសេចក្តីព្រាងច្បាប់នេះ អូស្ត្រាលីគឺជាប្រទេសទី២៦ នៅលើពិភពលោក ដែលការរៀបការរបស់អ្នកមានភេទដូចគ្នាជារឿងស្របច្បាប់ ៕
ចែករំលែកព័តមាននេះ