ហ្វ្រេស៊ីហ្គើល សុខ វិច្ឆរ៉ា មានទេពកោសល្យលើសិល្បៈចម្រៀង និងសម្តែង
- ភ្នំពេញ
រាជធានីភ្នំពេញ ៖ រាងតូចស្រឡូន សម្បុរខ្មៅស្រឯម ញញឹមស្រស់ស្រាយ គឺយុវតី សុខ វិច្ឆរ៉ា ជាហ្វ្រេស៊ីហ្គើលប្រចាំឆ្នាំ២០១៧ ។…
រាជធានីភ្នំពេញ ៖ រាងតូចស្រឡូន សម្បុរខ្មៅស្រឯម ញញឹមស្រស់ស្រាយ គឺយុវតី សុខ វិច្ឆរ៉ា ជាហ្វ្រេស៊ីហ្គើលប្រចាំឆ្នាំ២០១៧ ។
យុវតីសុខ វិច្ឆិកា អាយុ១៦ឆ្នាំ ជាសិស្សវិទ្យាល័យ ។ នាងខំប្រឹងប្រែងរៀនសូត្រប្រាថ្នាឈានចូលមហាវិទ្យាល័យនាពេលខាងមុខ ។ យុវតីស្អាតរូបនេះចាប់កំណើត និងរស់នៅភ្នំពេញ។ នាងជាកូនពៅក្នុងចំណោមបងប្អូនចំនួន៥នាក់ ។ ដោយឪពុកបង់ជីវិតទៅហើយ វិច្ឆរ៉ា រស់នៅជាមួយម្តាយ និង បងៗរបស់នាង ។
គ្រងតំណែងជាហ្វ្រេស៊ីហ្គើលសុខ វិច្ឆរ៉ា តែងតែឆ្លៀតពេលពីការសិក្សាចូលរួមសម្តែងឈុតផ្សាយពាណិជ្ជកម្ម និងកម្មវិធីផ្សេងៗតាមតម្រូវរបស់ក្រុមហ៊ុនដែលរៀបចំប្រកួតហ្វ្រេស៊ី ។ ឈុតផ្សាយពាណិជ្ជកម្មមួយចំនួនដែលវិច្ឆរ៉ា ចូលរួមសម្តែងបានចាក់ផ្សាយតាមកញ្ចក់ទូរទស្សន៍នានា ។
សិល្បៈចម្រៀង និងសម្តែងភាពយន្ត គឺជាប្រភេទសិល្បៈដែលយុវតីសុខ វិច្ឆរ៉ា មាននិស្ស័យចូលចិត្ត ។ នាងមានទឹកដមសំឡេងពីរោះ និងមានទេពកោសល្យសម្តែងល្អ ។ កាលពីពេលថ្មីៗកន្លងមក យុវតីស្អាតរូបនេះនិយាយថា «ខ្ញុំចូលចិត្តច្រៀង និងសម្តែងកាយវិការ វាជាអ្វីដែលខ្ញុំអាចធ្វើបានពីធម្មជាតិ ។ ខ្ញុំរឹតតែមានទេពកោសល្យ និងយល់ដឹងខ្លាំងឡើងពីសិល្បៈទាំងនេះនៅពេលចូលរួមប្រកួតហ្វ្រេស៊ី ព្រោះកម្មវិធីតម្រូវឲ្យហ្វឹកហាត់សិល្បៈច្រើនទម្រង់ មានផ្នែករបាំបុរាណ ចម្រៀង និងសិល្បៈបង្ហាញម៉ូដជាដើម »។
ក្តីស្រមៃធំមួយរបស់សុខ វិច្ឆរ៉ា គឺកសាងជីវិតជាតារាចម្រៀង តារាភាពយន្ត និងតារាបង្ហាញម៉ូដ ។ នាងចង់ប្រើប្រាស់ទេពកោសល្យ និងក្តីស្រលាញ់សិល្បៈទាំងនោះចាប់ជាអាជីព ដើម្បីចិញ្ចឹមជីវិត និងដើម្បីកេរ្តិ៍ឈ្មោះ ។
បច្ចុប្បន្នសុខ វិច្ឆរ៉ា មិនទាន់អាចបំពេញក្តីស្រមៃរបស់ខ្លួននោះបាន ព្រោះត្រូវចំណាយពេលច្រើនយកចិត្តទុកដាក់លើការសិក្សា ។ ម្យ៉ាងទៀតនាងកំពុងស្ថិតក្នុងរង្វង់កិច្ចសន្យាពីរឆ្នាំជាមួយក្រុមហ៊ុនរៀបចំការប្រកួតហ្វ្រេស៊ី ។ ចំណែកក្រុមគ្រួសារចង់រង់ចាំឲ្យនាងមានវ័យច្រើនជាងនេះបន្តិច ។
ដោយសាងកេរ្តិ៍ឈ្មោះ បន្តិចម្តងៗពីពេលនេះទៅ ហ្វ្រេស៊ីហ្គើលសុខ វិច្ឆរ៉ា ទាញយកឱកាសចូលរួមច្រៀងលើឆាកតន្ត្រីទូរទស្សន៍ ឬចូលរួមក្នុងកម្មវិធីកម្សាន្តផ្សេងទៀតរបស់ទូរទស្សន៍ ។
មិត្តភក្តិរួមថ្នាក់ និងក្រុមគ្រួសារសុទ្ធតែដឹងសុខ វិច្ឆរ៉ា មាននិស្ស័យ និងទេពកោសល្យសិល្បៈ ។ មិត្តរួមថ្នាក់សរសើរថាវិច្ឆរ៉ា ច្រៀងពីរោះណាស់ ។
មិត្តម្នាក់និយាយថា «វិច្ឆរ៉ាច្រៀងពីរោះពីធម្មជាតិ ទឹកដមសំឡេងរបស់នាងសក្តិសមជាតារាចម្រៀង ។ នាងអាចប្រើប្រាស់ទឹកដមសំឡេងជាអាជីពបាន » ។
ទាំងក្រុមគ្រួសារ ទាំងមិត្តភក្តិ គាំទ្រសុខ វិច្ឆរ៉ា ចំពោះគោលដៅអនាគតសាងជីវិតជាអ្នកសិល្បៈ ។ ពួកគេជឿជាក់នាងនឹងបានសម្រេចសមតាមបំណង ។
នាពេលប៉ុន្មានខែកន្លងមកសុខ វិច្ឆរ៉ា បានយកឈ្នះយុវតីរាប់រយនាក់គ្រងតំណែងជាហ្វ្រេស៊ីហ្គើលប្រចាំឆ្នាំ២០១៧ ។ តំណែង និងកិត្តិយសថ្លៃថ្លានេះធ្វើឲ្យយុវតីសុខ វិច្ឆរ៉ា រីករាយ និងមានមោទនភាពយ៉ាងខ្លាំង ។ ក្រុមគ្រួសាររបស់នាងក៏ដូចគ្នាដែរ ។
ទាំងទឹកមុខញញឹម យុវតីដ៏ស្រស់ផូរផង់សុខ វិច្ឆរ៉ា និយាយរាបសាថា «ខ្ញុំប្រាថ្នាចង់ឲ្យមហាជនស្គាល់មុខ និងឈ្មោះសុខ វិច្ឆរ៉ា ទៅទីណា ឬអ្នកណា ក៏ស្គាល់ ។ ជាតារាល្បី ជាអ្វីដែលខ្ញុំចង់ឲ្យកើតឡើងសម្រាប់ជីវិតរបស់ខ្ញុំ » ៕
ចែករំលែកព័តមាននេះ