ខេត្តកំពត ៖ កម្លាំងសមត្ថកិច្ចកងអន្តរាគមន៍ពិសេសរបស់ស្នងការដ្ឋាននគរបាលខេត្ត ក្រោមការបញ្ជាផ្ទាល់របស់លោកឧត្តមសេនីយ ម៉ៅ ចន្ទ័មធុរិទ្ធ ស្នងការខេត្ត និងមានការសម្របសម្រួលសហការពីលោក ឯក ឆេងហ៊ួត ព្រះរាជអាជ្ញាអមសាលាដំបូងខេត្ត បានបញ្ជាកម្លាំងអន្តរាគមន៍ពិសេសចុះបង្ក្រាបសម្បុកលាក់ខ្លួនជួញដូរគ្រឿងញៀនមួយកន្លែង កាលពីល្ងាចថ្ងៃទី០៧ ខែធ្នូ ឆ្នាំ២០១៧ នៅចំណុចភូមិត្រពាំងសង្កែ ឃុំត្រពាំងសង្កែ ស្រុកទឹកឈូ ខេត្តកំពត ។
លោកវរសេនីទោ លក ញ៉ាវ នាយការិយាល័យព្រហ្មទណ្ឌកម្រិតស្រាល នៃស្នងការខេត្តបានឲ្យដឹងថា ជនសង្ស័យដែលកម្លាំងសមត្ថកិច្ចឃាត់ខ្លួនជាក់ស្តែងនៅនឹងកន្លែងខាងលើមានឈ្មោះ ធីម រ៉ូន ភេទប្រុស អាយុ៣៧ឆ្នាំ រស់នៅភូមិត្រពាំងសង្កែ ឃុំត្រពាំង សង្កែស្រុកទឹកឈូ ខេត្តកំពត និងរឹបអូសវត្ថុតាងថ្នាំញៀនប្រភេទម៉ាទឹកកកចំនួន១០កញ្ចប់តូច (វេចខ្ចប់ហើយបម្រុងយកទៅចែកចាយ) ។
លោកបានបន្តទៀតថា ជនសង្ស័យខាងលើ និងវត្ថុតាង បន្ទាប់ពីសមត្ថកិច្ចធ្វើការសាកសួររួច នៅព្រឹកថ្ងៃទី០៨ ខែធ្នូ ឆ្នាំ២០១៧ នេះ សមត្ថកិច្ចបានកសាងសំណុំរឿងបញ្ជូនទៅសាលាដំបូងខេត្ត ដើម្បីចាត់ការបន្តតាមនីតិវិធី ៕
ចែករំលែកព័តមាននេះ