រាជធានីភ្នំពេញ ៖ ស្របពេលដែលវិស័យកាត់ដេរបានជួយជំរុញកំណើនសេដ្ឋកិច្ច និងបានផ្ដល់ការងារដល់ពលរដ្ឋកម្ពុជាផ្ទាល់ជាង៧០ម៉ឺននាក់ និងប្រយោលប្រមាណ២លាននាក់ អ្នកពាក់ព័ន្ធក្នុងវិស័យមួយនេះ ដូចជា សមាគមរោងចក្រកាត់ដេរសម្លៀកបំពាក់ និងស្បែកជើង កម្ពុជា…
រាជធានីភ្នំពេញ ៖ ស្របពេលដែលវិស័យកាត់ដេរបានជួយជំរុញកំណើនសេដ្ឋកិច្ច និងបានផ្ដល់ការងារដល់ពលរដ្ឋកម្ពុជាផ្ទាល់ជាង៧០ម៉ឺននាក់ និងប្រយោលប្រមាណ២លាននាក់ អ្នកពាក់ព័ន្ធក្នុងវិស័យមួយនេះ ដូចជា សមាគមរោងចក្រកាត់ដេរសម្លៀកបំពាក់ និងស្បែកជើង កម្ពុជា តំណាងសហជីព និងជាតំណាងកម្មករ បានបង្ហាញពីការព្រួយបារម្ភលើការដាក់ទណ្ឌកម្មបិទការបញ្ជាទិញពីប្រទេសទិញធំៗដូចជា សហ រដ្ឋ អាមេរិក និងសហភាពអឺរ៉ុប ជាដើម ។
លោក សោម អូន ប្រធានក្រុមប្រឹក្សាសហជីពជាតិកម្ពុជាបានឲ្យដឹងថា ក្នុងនាមសម្ព័ន្ធសហជីពជាតិកម្ពុជា និងជាតំណាងឲ្យកម្មករ កម្មការិនីប្រមាណ៤០ម៉ឺននាក់ លោកបានបង្ហាញពីការព្រួយបារម្ភចំពោះការដាក់ទណ្ឌកម្មសេដ្ឋកិច្ចមកលើកម្ពុជាពីសំណាក់អ្នក បញ្ជាទិញធំៗ ដូចជា សហគមន៍អឺរ៉ុប និងសហរដ្ឋអាមេរិកជាដើម ។ លោកថា ៖« បញ្ហានេះ យើងក៏បានដាក់លិខិតមួយជូនទៅសហគមន៍ឲ្យពិចារណា និងទិញទំនិញពីកម្ពុជាបន្តទៀត។ ក្រៅពីនេះ យើងក៏បានសុំណាត់ជួបពួកគាត់ ដើម្បីឲ្យយើងបានបកស្រាយជូនគាត់ពីបញ្ហានៅកម្ពុជា និងបង្ហាញពីផលប៉ះពាល់មកលើប្រជាជនកម្ពុជា ក្នុងករណីពួកគាត់ដាក់ទណ្ឌកម្មណាមួយមកលើប្រទេសកម្ពុជា ។ មិនតែប៉ុណ្ណោះ យើងក៏បានដាក់លិខិតជូនសហគមន៍អឺរ៉ុប និងអ្នកបញ្ជាទិញធំៗនៅក្រៅប្រទេសឲ្យបន្តទិញ និងបង្កើនការទិញទំនិញពីកម្ពុជាឲ្យបានកាន់តែច្រើន ដើម្បីផ្ដល់ប្រយោជន៍ដល់ពលរដ្ឋក្នុងប្រទេសកម្ពុជា» ។
លោកបន្តថា រហូតមកដល់ពេលនេះ មិនទាន់មានសញ្ញាណាមួយពីការដាក់ទណ្ឌកម្ម សេដ្ឋកិច្ច ជាពិសេស លើវិស័យកាត់ដេរនៅកម្ពុជាទេ ក៏ប៉ុន្តែមិនដឹងថា សហគមន៍អឺរ៉ុប ក៏ដូចជាប្រទេសអ្នកបញ្ជាទិញពីកម្ពុជា នឹងដាក់ទណ្ឌកម្មពេលណាមកលើកម្ពុជាដែរ ។ លោកថា ៖« វិស័យកាត់ដេរនៅតែដំណើរការល្អនៅពេលបច្ចុប្បន្ន ហើយរោងចក្រធំៗនៅតែដំណើរការផលិតជាធម្មតា គឺមានតែរោងចក្រតូចៗមួយចំនួនប៉ុណ្ណោះដែលបានបិទទៅវិញ ហើយការបិទពីសំណាក់រោងចក្រតូចតាចទៅនោះ វាក៏មិនបង្កផលប៉ះពាល់ដល់កម្មករ កម្មការិនីកម្ពុជាទេ » ។
លោក អាត់ ធន ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា (ស៊ីខៅឌូ) បានឲ្យដឹងថា ជាការពិតណាស់ ក្នុងករណីសហគមន៍អឺរ៉ុប ឬសហរដ្ឋអាមេរិកដាក់ទណ្ឌកម្មមកលើវិស័យកាត់ដេរកម្ពុជា ការប៉ះពាល់នឹងមិនមែនត្រឹមតែកម្មករនោះទេ តែនឹងប៉ះពាល់ដល់ក្រុមគ្រួសារកម្មករ កម្មការិនី ដែលទទួលផលពីកម្មករផងដែរ ។ ជាក់ ស្ដែង ឪពុកម្ដាយ និងកូនៗរបស់ពួកគេ នឹងបាត់បង់ការផ្គត់ផ្គង់ ហើយវិបត្តិនឹងអាចកើតមានឡើងនៅកម្ពុជា ។
លោកបន្តថា ទណ្ឌកម្មសេដ្ឋកិច្ចពីបណ្ដាប្រទេសអ្នកបញ្ជាទិញធំៗក្នុងវិស័យកាត់ដេរពីកម្ពុជា នឹងមិនកើតឡើងនៅក្នុងពេលខ្លីខាងមុខនេះទេ ក៏ប៉ុន្តែវាអាចកើតមាននៅពាក់ កណ្ដាលឆ្នាំក្រោយនេះ បើសិនជាសហគមន៍អឺរ៉ុប ឬបណ្ដាប្រទេសអ្នកទិញធំៗគេមើល ឃើញថា កម្ពុជាមិនធ្វើតាមការចង់បានរបស់ពួកគេ ។ លោកថា ៖«នៅក្នុងវិស័យកាត់ដេរកម្ពុជា បញ្ហារំលោភសិទ្ធិការងារ មិនមានអ្វីធំដុំ និងកត់សម្គាល់ទេ ក៏ប៉ុន្តែបញ្ហានយោបាយ បញ្ហាសិទ្ធិមនុស្សនៅក្នុងសង្គម ត្រូវបានសហគមន៍អឺរ៉ុប និងសហរដ្ឋអាមេរិកបង្ហាញការព្រួយបារម្ភ និងស្នើឲ្យរដ្ឋាភិបាលកម្ពុជាពិចារណា និងដោះស្រាយបញ្ហាទាំងនោះឲ្យបានល្អប្រសើរឡើងវិញ។ បើសិនជាការដោះស្រាយរវាងអ្នកនយោបាយបានល្អនោះ បញ្ហាទណ្ឌកម្មនានាមកលើសេដ្ឋកិច្ចកម្ពុជា ខ្ញុំថា វាគ្មានអីត្រូវបារម្ភទេ » ។
លោកបន្ថែមថា បើសិនជាមានការដាក់ទណ្ឌកម្មពីសហគមន៍អឺរុ៉ប និងអាមេរិកមែននោះ ផលប៉ះពាល់ក៏នឹងកើតមានដល់បណ្ដាប្រទេសក្នុងតំបន់អាស៊ាន និងចិនផងដែរ ព្រោះវត្ថុធាតុដើមមួយចំនួនធំត្រូវបាននាំចូលពីបណ្ដាប្រទេសទាំងនោះដើម្បីយកមកផលិត រួចហើយនាំចេញទៅអឺរ៉ុប និងអាមេរិកវិញ ។ ដូចនេះ កុងត្រាទាំងប៉ុន្មានដែលបានចុះកន្លងមក អាចនឹងត្រូវលុបចោល ។
នៅក្នុងសេចក្តីថ្លែងការណ៍មួយរបស់សមាគមរោងចក្រកាត់ដេរកម្ពុជា ផ្ញើជូនដល់អង្គការសហប្រជាជាតិ អង្គទូតនានា និង ប្រទេសអ្នកបញ្ជាទិញ បានស្នើសុំកុំឲ្យបិទការនាំចូលសម្លៀកបំពាក់ពីកម្ពុជា និងសុំកុំឲ្យប្រទេសទាំងនោះដាក់ទណ្ឌកម្មសេដ្ឋកិច្ចមកលើកម្ពុជា ដោយភ្ជាប់ជាមួយនឹងស្ថានភាពនយោបាយ ។
ក្នុងសេចក្តីថ្លែងការណ៍នេះបានបញ្ជាក់ផងដែរថា សមាគមរោងចក្រកាត់ដេរកម្ពុជាចង់រក្សាឲ្យមានប្រតិបត្តិការរលូនសម្រាប់រោងចក្រសមាជិកចំនួន៦០០ ដែលទ្រទ្រង់សេដ្ឋកិច្ចដល់កម្មករជាង៧០ម៉ឺននាក់ ភាគច្រើនជាស្ត្រី ។ និយោជក និងកម្មករនិយោជិតទាំងអស់ ព្រមទាំងសហជីពបាននិងកំពុងធ្វើការងារដូចធម្មតា និងដោយសន្តិភាព ដើម្បីផ្គត់ផ្គង់សេដ្ឋកិច្ចខ្លួនឯងផ្ទាល់ និងសេដ្ឋកិច្ចកម្ពុជា ។ សមាគមអំពាវនាវដល់អ្នកបញ្ជាទិញអន្តរជាតិទាំងអស់ បន្តគាំទ្រកម្ពុជា និងរោងចក្រសមាជិករបស់សមាគមដើម្បីសម្រេចគោលដៅសេដ្ឋកិច្ចរបស់យើង ដែលជាសុខុមាលភាពប្រសើរឡើងរបស់ប្រជាពលរដ្ឋកម្ពុជាទាំងអស់ ៕
ចែករំលែកព័តមាននេះ