រាជធានីភ្នំពេញ ៖ មន្ត្រីជាន់ខ្ពស់ធនាគារជាតិនៃកម្ពុជាបានឲ្យដឹងថា ដើម្បីជំរុញបរិយាប័ន្នហិរញ្ញវត្ថុ និងពង្រឹងស្ថិរភាពហិរញ្ញវត្ថុ ធនាគារជាតិនៃកម្ពុជា ហៅកាត់ថា (NBC) បាននិងកំពុងអនុវត្តនូវយន្តការសំខាន់ៗចំនួន៦ចំណុច ។
ថ្លែងនៅក្នុងសន្និសីទម៉ាក្រូសេដ្ឋកិច្ចលើកទី៤ ស្តីពីតួនាទីរបស់បច្ចេកវិទ្យាក្នុងការលើកកម្ពស់បរិយាប័ន្នហិរញ្ញវត្ថុនៅកម្ពុជា កាលពីថ្ងៃទី៥ ធ្នូ កន្លងទៅ នៅសណ្ឋាគារសូហ្វីតែល ភ្នំពេញ ភូគីត្រា លោកជំទាវ នាវ ច័ន្ទថាណា ទេសាភិបាលរងធនាគារជាតិនៃកម្ពុជា បានឲ្យដឹងថា ធនាគារជាតិនៃកម្ពុជាកំពុងតែអនុវត្តយន្តការសំខាន់ៗចំនួន៦ចំណុចរួមមាន ៖
១-ពង្រឹងប្រព័ន្ធសុវត្ថិភាពប្រឆាំងនឹងឧក្រិដ្ឋកម្មបច្ចេកវិទ្យា ។
២-បន្តលើកកម្ពស់អក្ខរកម្មហិរញ្ញវត្ថុ តាមរយៈការធ្វើយុទ្ធនាការ «តោះ ! និយាយពីលុយ» ។
៣-អភិវឌ្ឍន៍យន្តការចែករំលែកព័ត៌មានឥណទាន ។
៤-ពង្រឹងកិច្ចការពារអតិថិជន បង្កើតប្រព័ន្ធHotline ក្នុងការឆ្លើយតប និងដោះស្រាយបញ្ហាដោយផ្ទាល់ជូនសាធារណជន ។
៥-ពង្រឹងច្បាប់ និងបញ្ញត្តិ
៦-ជំរុញកិច្ចសហការប្រតិបតិ្តការជាមួយភាគីពាក់ព័ន្ធដើម្បីពង្រឹងគុណភាពទិន្នន័យ ។
លោកជំទាវបន្ដថា ជាមួយនឹងការអនុវត្តនូវយន្ដការទាំងនេះ ធនាគារជាតិនៃកម្ពុជា ក៏បានដាក់ឱ្យប្រើប្រាស់ប្រព័ន្ធទូទាត់រាយនៅឆ្នាំ២០១២ សម្រាប់ផាត់ទូទាត់មូលប្បទានបត្រ និងបញ្ជាផ្ទេរឥណទាន ។ ប្រព័ន្ធសេវាទូទាត់រហ័សបានដាក់ឱ្យដំណើរការនៅឆ្នាំ២០១៦ សម្រាប់សម្រួលដល់ការទូទាត់ភ្លាមៗនូវរាល់ការផ្ទេរមូលនិធិ ។ ប្រព័ន្ធ Cambodian Sheared Switch (CSS) ដែលទើបតែដាក់ឱ្យដំណើរការនៅខែតុលា ឆ្នាំ២០១៧ សម្រាប់សម្រួលដល់ប្រតិបត្តិការម៉ាស៊ីន ATM និងម៉ាស៊ីន POS។ លើសពីនេះ ធនាគារជាតិនៃកម្ពុជា បច្ចុប្បន្ន កំពុងសិក្សាពីលទ្ធភាពក្នុងការប្រើប្រាស់រូបិយវត្ថុឌីជីថលផងដែរ សម្រាប់ការទូទាត់នៅក្នុងទីផ្សារអន្តរធនាគារ ។
ប្រធានសមាគមមីក្រូហិរញ្ញវត្ថុកម្ពុជា លោក ឧកញ៉ា ហួត អៀងតុង ធ្លាប់មាន
ប្រសាសន៍ថា ៖« ការរៀបចំនូវគោល នយោបាយទាំងអស់របស់ធនាគារជាតិនៃកម្ពុជា គឺដើម្បីឱ្យមានភាពងាយស្រួលនៅក្នុងការអនុវត្ត ។ ខ្ញុំមើលមិនឃើញធនាគារជាតិតាក់តែងគោលនយោបាយ ឱ្យកើតជាបញ្ហាប្រឈមសម្រាប់វិស័យហិរញ្ញវត្ថុរបស់យើងទេ ។ ការតាក់តែងច្បាប់ឡើង គឺចង់ឱ្យវិស័យហិរញ្ញវត្ថុរបស់កម្ពុជាប្រព្រឹត្តទៅបានដោយរលូន » ។
យោងតាមរបាយការណ៍ធនាគារជាតិនៃកម្ពុជាបានឱ្យដឹងថា ចាប់តាំងពីឆ្នាំ២០០៥ ទៅឆ្នាំ២០១៧ ចំនួនគ្រឹះស្ថានធនាគារ និងមីក្រូហិរញ្ញវត្ថុកើនឡើងពី១៩ ទៅ៤៥ និងពី៣៨ ទៅ៧៤ រៀងគ្នា ។ បណ្តាញសាខាកើនពី៤៧៨ ទៅ២.១៣៣ កើនឡើង៤,៥ដង ។
ទ្រព្យសកម្មកើនពី៥,៨ទ្រីលានរៀល ទៅ១២៨,៦ទ្រីលានរៀល កើនឡើង២២ដង ។ ភាពស៊ីជម្រៅផ្នែកហិរញ្ញវត្ថុ កើនពី១៩,៥% ដល់៧៧% កើនឡើង៣,៩ដង ៕
ចែករំលែកព័តមាននេះ