ខេត្តស្ទឹងត្រែង ៖ វារីអគ្គិសនីទន្លេសេសានក្រោម២ បានធ្វើការសាកល្បងម៉ាស៊ីនទី១ជោគជ័យហើយ ដោយបញ្ជូនថាមពលបាន៥០មេហ្គាវ៉ាត់ទៅក្នុងបណ្តាញជាតិ ។
លោក កែវ រតនៈ អគ្គនាយកអគ្គិសនីកម្ពុជា រួមនឹងមន្ត្រីអគ្គិសនីដែលបានអញ្ជើញចូលពិនិត្យវារីអគ្គិសនីសេសានក្រោម២ កាលពីថ្ងៃទី៦ ធ្នូ បានឱ្យដឹងថា ៖ « វារីអគ្គិសនីទន្លេសេសានក្រោម២ បានធ្វើការសាកល្បងម៉ាស៊ីនទី១ ដោយបញ្ជូនថាមពលបាន៥០មេហ្គាវ៉ាត់ទៅក្នុងបណ្តាញជាតិ ។ នៅពេលខាងមុខជាបន្តបន្ទាប់ ម៉ាស៊ីន៧គ្រឿងទៀត នឹងដាក់ដំណើរការទាំងស្រុងគម្រប់៤០០មេហ្គាវ៉ាត់ » ។
ជាមួយនឹងជោគជ័យនៃម៉ាស៊ីនទី១នេះ ក្នុងរយៈពេលប្រមាណ១ខែខាងមុខ អគ្គិសនីកម្ពុជានឹងបញ្ជូនភ្លើងប្រមាណ១០មេហ្គាវ៉ាត់ទៅជួយខេត្តរតនគិរី និងមណ្ឌលគិរី ដែលកំពុងខ្វះខាត ។
បើតាមការបញ្ជាក់ពីលោក កៅ វាំងអុីវតំណាងក្រុមហ៊ុនបានឲ្យដឹងថា ៖ « វារីអគ្គិសនី សេសានក្រោម២ នឹងដំណើរការ១០០% ដែលមានថាមពលរហូតដល់៤០០មេហ្គាវ៉ាត់ គឺនៅចុងខែតុលា ឆ្នាំ២០១៨ខាងមុខ ។ ដោយឡែកនៅដើមខែធ្នូ ឆ្នាំ២០១៧នេះ មានការសាកល្បងម៉ាស៊ីនទី១ និងបញ្ជូនថាមពលបាន៥០មេហ្គាវ៉ាត់សម្រាប់ប្រើប្រាស់ » ។
យោងតាមសេចក្តីជូនដំណឹងរបស់អាជ្ញាធរអគិ្គសនី កាលពីថ្ងៃទី១ ធ្នូ ឆ្នាំ២០១៧ កន្លងមក អាជ្ញាធរអគ្គិសនីកម្ពុជា គ្រោងនឹងបន្ថយបញ្ជីថ្លៃលក់អគិ្គសនីនៅតំបន់ធ្វើសេវាកម្មរបស់អគ្គិសនីកម្ពុជា នៅទីរួមខេត្តក្រចេះ ស្ទឹងត្រែង និងមណ្ឌលគិរី ដែលទើបទទួលប្រភពអគ្គិសនីពីបណ្តាញជាតិ តាមប្រភេទអតិថិជន និងអត្រាថ្លៃលក់អគិ្គសនីសម្រាប់ខួបឆ្នាំ២០១៧ ដើមខែមករា ឆ្នាំ២០១៨ ដល់ចុងខែមីនា ឆ្នាំ២០១៨។ លំនៅឋានពលរដ្ឋកម្ពុជា ដែលប្រើប្រាស់មិនលើសពី១០គីឡូវ៉ាត់ម៉ោងក្នុង១ខែ អត្រាលក់ចាស់៩៥០រៀលក្នុង១គីឡូវ៉ាត់ម៉ោង អត្រាលក់ថ្មី៤៨០រៀលក្នុង១គីឡូវ៉ាត់ម៉ោង, ប្រើប្រាស់ចាប់ពី១១ដល់៥០គីឡូវ៉ាត់ម៉ោងក្នុង១ខែ អត្រាលក់ចាស់៩៥០រៀលក្នុង១គីឡូវ៉ាត់ម៉ោង មកនៅអត្រាលក់ថ្មី៦១០រៀលក្នុង១គីឡូវ៉ាត់ម៉ោង។ ដោយឡែក ចំពោះការប្រើប្រាស់ចាប់ពី៥១គីឡូវ៉ាត់ម៉ោងឡើងក្នុង១ខែ អត្រាលក់ចាស់៩៥០រៀល មកនៅត្រឹមអត្រាលក់ថ្មី៧៧០រៀលក្នុង១គីឡូវ៉ាត់ម៉ោង ។
គម្រោងវារីអគ្គិសនីនេះ ជាចំណែកមួយនៃយុទ្ធសាស្ត្រពង្រីកការផ្គត់ផ្គង់ និងការបន្តចុះថ្លៃអគ្គិសនីរបស់សម្តេចតេជោ ហ៊ុន សែន ។
ថ្លែងក្នុងពិធីបិទទ្វារទឹកទំនប់វារីអគ្គិសនីនេះ កាលពីខែកញ្ញាកន្លងមក សម្ដេចតេជោ ហ៊ុន សែន នាយករដ្ឋមន្ត្រី បានបញ្ជាក់ថា នៅពេលដំណើរការវារីអគ្គិសនីនេះ មិនត្រឹមតែផ្គត់ផ្គង់សម្រាប់ខេត្តស្ទឹងត្រែងទេ ប៉ុន្ដែនឹងមានសមត្ថភាពផ្គត់ផ្គង់ខេត្តផ្សេងៗទៀត ហើយកម្ពុជាមានបណ្តាញផ្គត់ផ្គង់ខ្លួនឯងប្រកបដោយស្ថិរភាព និងឯករាជ្យភាព ។ ទន្ទឹមនឹងការផលិតអគ្គិសនីនៅទីនេះ គឺទាមទារការតបណ្តាញពីស្ទឹងត្រែងទៅក្រចេះ ពីក្រចេះទៅកំពង់ចាម និងពីកំពង់ចាមទៅភ្នំពេញ គឺត្រូវតភ្ជាប់បណ្តាញមេទាំងអស់ ដែលនឹងធ្វើឲ្យតម្លៃអគ្គិសនីធ្លាក់ចុះថោកជាបន្តបន្ទាប់ ។
សម្ដេចតេជោថ្លែងថា ៖« សព្វថ្ងៃ មានប្រជាពលរដ្ឋជាង៣លានខ្នងផ្ទះដែលទទួលបានអគ្គិសនីប្រើប្រាស់ ហើយយើងត្រូវរៀបចំឲ្យប្រជាពលរដ្ឋនៅទូទាំងប្រទេស ជាពិសេស នៅតាមជនបទមានអគ្គិសនីប្រើប្រាស់គ្រប់ៗគ្នា » ។
វារីអគ្គិសនីសេសានក្រោម២នេះ នឹងលក់ឲ្យអគ្គិសនីកម្ពុជា តម្លៃ៦,៩៥សេនអាមេរិកក្នុង១គីឡូវ៉ាត់ម៉ោងក្នុងរយៈពេល៤០ឆ្នាំ (BOT) បន្ទាប់មក នឹងត្រូវប្រគល់ជូនរាជរដ្ឋាភិបាលកម្ពុជាគ្រប់គ្រង ។ ក្រោយពីចប់៤០ឆ្នាំ គឺរដ្ឋយកមកគ្រប់គ្រងទាំងស្រុង ឬជួលបន្តឲ្យក្រុមហ៊ុន ។
គួរបញ្ជាក់ថា គម្រាងវារីអគ្គិសនីសេសានក្រោម២ ត្រូវបានរាជរដ្ឋាភិបាលកម្ពុជាអនុញ្ញាត ឲ្យក្រុមហ៊ុន Hydro Power Se San 2 Co., Ltd ធ្វើការវិនិយោគ និងសាងសង់ ដែលមានក្រុមហ៊ុនរួមទុនចំនួន៣គឺ ៖
១-ក្រុមហ៊ុន Hydrolancang International Energy របស់ចិន មានភាគហ៊ុន៥១% ជាក្រុមហ៊ុនបុត្រសម្ព័ន្ធនៃក្រុមហ៊ុន China Huaneng Group.,។
២-ក្រុមហ៊ុន Royal Group របស់អ្នកឧកញ៉ា គិត ម៉េង មានភាគហ៊ុន៣៩% ។
៣-ក្រុមហ៊ុន EVN International របស់វៀតណាម មានភាគហ៊ុន១០% ។
យោងតាមទិន្នន័យរបស់ក្រសួងរ៉ែ និងថាមពលបានឲ្យដឹងថា បច្ចុប្បន្ននេះ នៅកម្ពុជា ក្រុមហ៊ុនចិនវិនិយោគវារីអគ្គិសនីចំនួន៧ ដែលមានទុនវិនិយោគសរុប២.៣០០លានដុល្លារអាមេរិក គិតត្រឹមឆ្នាំ២០១៦ ។
លោកបណ្ឌិត ម៉ី កល្យាណ ទីប្រឹក្សាជាន់ ខ្ពស់ឧត្តមក្រុមប្រឹក្សាសេដ្ឋកិច្ចជាតិ បានថ្លែងថា តម្រូវការថាមពលអគ្គិសនីនៅកម្ពុជាពិតជាត្រូវការកាន់តែច្រើនទៅៗហើយ ដោយសារកម្ពុជាកំពុងអភិវឌ្ឍន៍យ៉ាងឆាប់រហ័ស ព្រោះវិស័យអ្វីក៏ត្រូវការអគ្គិសនីដែរដើម្បីធ្វើឲ្យខ្សែសង្វាក់ផលិតកម្មបានរលូន ប៉ុន្តែថាមពលអគ្គិសនីនៅកម្ពុជានៅមានតម្លៃថ្លៃនៅឡើយ បើធៀបជាមួយប្រទេសជិតខាង ប៉ុន្តែនៅក្នុងគោលនយោបាយអភិវឌ្ឍន៍វិស័យឧស្សាហកម្ម ឆ្នាំ២០១៥-២០២៥ រាជរដ្ឋាភិបាលបានផ្តោតអាទិភាពលើការបញ្ចុះតម្លៃថាមពលអគ្គិសនីផងដែរ ។
យោងតាមផែនការរបស់ក្រសួងរ៉ែ និងថាមពលបានឲ្យដឹងថា រាជរដ្ឋាភិបាលមានផែនការធ្វើឲ្យភូមិចំនួន៧៣%មានបណ្តាញអគ្គិសនី ប្រើប្រាស់នៅឆ្នាំ២០២០ និងផ្ទះ៦០%មានការភ្ជាប់បណ្តាញអគ្គិសនី និងគ្រោងបង្កើនឲ្យបាន៧០%នៃខ្នងផ្ទះមានបណ្តាញអគ្គិសនីប្រើប្រាស់នៅឆ្នាំ២០៣០ ៕
ចែករំលែកព័តមាននេះ