ខេត្តកំពង់ចាម ៖ រថយន្តសណ្តោងធុនធំមួយគ្រឿងដឹកដំឡូងមី បានមកឈប់ចតនៅលើផ្លូវជាតិលេខ៧ ត្រង់ចំណុចមុខមន្ទីរពេទ្យ៧ដេ ក្នុងឃុំអំពិល ស្រុកកំពង់សៀម នៅអាធ្រាត្រថ្ងៃទី០៦ ខែធ្នូ ឈានចូលព្រឹកថ្ងៃទី០៧ ខែធ្នូ ឆ្នាំ២០១៧។ ដោយសារតែការដឹកនោះធ្ងន់ពេក បណ្តាលឲ្យជាប់ផុងទៅមុខមិនរួច ហើយត្រូវបានលោកអភិបាលខេត្ត បញ្ជាឲ្យស្ថាប័នសមត្ថកិច្ចគ្រប់លំដាប់ថ្នាក់ ចុះត្រួតពិនិត្យ និងមានចំណាត់ការលើរថយន្តនោះផងដែរ។ លោក ប៊ិន ឡាដា អភិបាលស្រុកកំពង់សៀម ប្រាប់ឲ្យដឹងថា រូបលោកបានចុះទៅពិនិត្យជាមួយនឹងនគរបាលចរាចរណ៍ អាវុធហត្ថស្រុក និងមន្ទីរសាធារណៈការខេត្ត នៅព្រឹកថ្ងៃទី០៧ ធ្នូ ឃើញថាដោយរថយន្តបានផុងជាប់កង់ ទោះបីជាអ្នកបើកបររថយន្តប្រឹងរោទ៍ម៉ាស៊ីន ទៅមុខយ៉ាងណាក្តីក៏ទៅមិនរួចដែរ ដោយបានរកគ្រឿងចក្រអេស្កាមកទាញ និងរើដំឡូងមីចេញខ្លះឲ្យស្រាល ទើបអាចបើកទៅមុខរួច។
លោកអភិបាលស្រុកកំពង់សៀម ប្រាប់បន្តថា នៅក្នុងឃុំអូរស្វាយ ស្រុកកំពង់សៀម គឺមានស្ថានីយថ្លឹងរថយន្តមួយកន្លែង នៅពេលដែលមានរថយន្តបើកឆ្លងកាត់ចេញពីស្រុកចម្ការលើ ប្រសិនបើពិនិត្យឃើញថា ដឹកលើសទម្ងន់ត្រូវតែរើចេញ និងពិន័យទៅតាមច្បាប់។ ហើយកន្លងមកអាជ្ញាធរធ្លាប់បានធ្វើការណែនាំដល់អ្នកបើកបរយានយន្តធុនធំៗ ដោយបានហាមមិនឲ្យឈប់នៅលើដងផ្លូវជាតិនោះទេ ចៀសវាងកុំឲ្យស្រុតខូចផ្លូវដូចរថយន្តខាងលើនេះជាដើម។ ជាមួយនោះរូបលោកធ្លាប់បានប្រជុំនៅសាលាខេត្ត ដោយលោកអភិបាលខេត្ត ឲ្យមានវិធានការលើរថយន្តដែលតទ្រុងឲ្យកាត់ចេញ និងបានដឹកនាំកម្លាំងចុះជាហូរហែផងដែរ។
លោក សុខ លឹមហ៊ាង អនុប្រធានមន្ទីរសាធរណៈការខេត្តប្រាប់ថា រថយន្តដឹកដំឡូងមីនេះចេញពីអូរពីរ នៅស្រុកស្ទឹងត្រង់ ក្នុងគោលបំណងយកទៅលក់នៅប្រទេសវៀតណាម ដោយបានឆ្លងកាត់ជញ្ជីងថ្លឹងរថយន្ត ស្របពេលដែលមកដល់ត្រង់ចំណុចឃុំអំពិល ស្រុកកំពង់សៀម អ្នកបើកបរបានឈប់ចេញពីផ្លូវជាតិលេខ៧១,៥០ម៉ែត្រ បណ្តាលឲ្យស្រុតដីផុងកង់មិនបានប៉ះពាល់ផ្លូវថ្នល់នោះទេ។ ហើយយោងតាមបញ្ជារបស់លោកអភិបាលខេត្ត តម្រូវឲ្យម្ចាស់រថយន្តនេះធ្វើកិច្ចសន្យា មិនឲ្យមានលើកទី២ទៀតនោះទេ ហើយអនុញ្ញាតឲ្យបន្តដំណើរ ដឹកកសិផលយកទៅលក់នៅទីផ្សារព្រំដែនប្រទេសវៀតណាមត្រើយខាងកើតទន្លេមេគង្គផងដែរ៕
ចែករំលែកព័តមាននេះ