រាជធានីភ្នំពេញ ៖ គំនុំចាស់រវាងព្រះសង្ឃ និងព្រះសង្ឈ បានដោះស្រាយ ក្នុងវត្តទួលសំរោង បណ្តាលឲ្យ ព្រះសង្ឃ១អង្គរងរបួសបែកក្បាល បង្កឲ្យមានការភ្ញាក់ផ្អើលឡើង កាលពីវេលាម៉ោង៧យប់ ថ្ងៃទី៦ ខែធ្នូ ឆ្នាំ២០១៧ ក្នុងវត្តទួលសំរោង សង្កាត់ដង្កោ ខណ្ឌដង្កោ។ ព្រះសង្ឃរងគ្រោះមានព្រះនាម វ៉ា សែម ព្រះជន្ម៤៦ព្រះវស្សា ស្នាក់នៅក្នុងវត្តទួលសំរោង រងរបួសដេរ១២ថ្នេរ ចំណែកព្រះសង្ឃបង្កព្រះនាម អ៊ី វ៉ាហៃ ព្រះជន្មប្រហែល ២៥ព្រះវស្សា ស្នាក់នៅក្នុងវត្តទួលសំរោង និងម្នាក់ទៀត មិនស្គាល់ឈ្មោះ។
តាមសង្ឃដីកា ព្រះសង្ឃរងគ្រោះ បានឲ្យដឹងថា មុនពេលកើតហេតុព្រះអង្គកំពុងតែអង្គុយទន្ទេញធម៌ នៅមុខជិតខ្លោងទ្វារចូលវត្ត ខណៈនោះក៏ស្រាប់ តែមានព្រះសង្ឃដែលជាជនបង្ក មានគ្នា២នាក់ បងប្អូនជីដូនមួយ បាននាំគ្នាយកបន្ទះក្តាមកព្រួតវាយ មកលើព្រះកាយព្រះអង្គ បណ្តាលឲ្យរងរបួសរយះចិញ្ចើមខាងស្តាំ និងពកព្រះកេសខាងក្រោយ ប៉ុនក្បាលជង្គង់។ ភ្លាមៗនោះដែរ ព្រះអង្គបានរត់ចេញមកក្រៅឲ្យគេជួយ ហើយពេលនោះ ប្រជាពលរដ្ឋរស់នៅក្បែរវត្ត ក៏បានជួយហៅរថយន្តសង្គ្រោះឲ្យដឹកយកព្រះអង្គទៅ ព្យាបាលរបួសនៅគ្លិនិកឯកជនសួគា។ ដោយឡែកសង្ឃបង្កបានគេចព្រះកាយចូលសម្ងំក្នុងវត្តបាត់ស្រមោល។
ប្រភពបានឲ្យដឹងទៀតថា បន្ទាប់ពីព្រះសង្ឃរងគ្រោះ ត្រូវបានបញ្ជួនទៅដល់មន្ទីពេទ្យ ដំណឹងនេះត្រូវបានឮដល់សមត្ថកិច្ចមូលដ្ឋាន បានចុះទៅដល់កន្លែងកើតហេតុ តែត្រូវបានលោកចាក់សោរបងមិនឲ្យសមត្ថកិច្ចចូលទៅនោះទេ។ ប្រភពពីព្រះសង្ឃរងគ្រោះបានឲ្យដឹងថា ព្រះអង្គ និងសង្ឃបង្កធ្លាប់មានទំនាស់ពាក្យសម្ដីគ្នា បន្តិចបន្តួចម្តងរួចមកហើយ ហើយមកដល់ពេលនេះ ទើបខាងសង្ឃបង្កគុំគួន ទើបធ្វើបែបនេះមកលើព្រះអង្គតែម្តង។ ក្រោយពេលកើតហេតុ ព្រះសង្ឃរងគ្រោះ បានដាក់ពាក្យបណ្តឹងសុំឲ្យសមត្ថកិច្ចចាត់ការតាមផ្លូវច្បាប់៕
ចែករំលែកព័តមាននេះ