ខេត្តកំពង់ស្ពឺ ៖ បុរស៣នាក់ជិះម៉ូតូឌុបគ្នាដោយល្បឿនលឿន បានបើកវ៉ាយានយន្តផ្សេងៗ ជ្រុលចូលគន្លងផ្លូវម្ខាងទៀត រួចក៏រេចង្កូតប៉ះរថយន្តធុនធំ១គ្រឿង កំពុងបើកបញ្ច្រាសមកពីមុខ បណ្តាលឲ្យដួលម៉ូតូ ខ្ទាតមនុស្សចូលក្រោមរថយន្ត ត្រូវរថយន្តកិនស្លាប់ទាំង៣នាក់ភ្លាមៗនៅកន្លែងកើតហេតុ។ គ្រោះថ្នាក់ចរាចរណ៍គួររន្ធត់ខាងលើនេះ បានកើតឡើងកាលពីម៉ោង៥ និង៤០នាទីល្ងាចថ្ងៃទី៥ ខែធ្នូ ឆ្នាំ២០១៧ ស្ថិតនៅលើផ្លូវលេខ៤៤ ចន្លោះគីឡូម៉ែត្រលេខ១០៣-១០៤ ក្នុងភូមិត្បែងប្រជាប់ ឃុំប្រាំបីមុំ ស្រុកថ្ពង។
រថយន្តបង្កម៉ាក ហ៊ីណូភ្លៅ៥ពណ៌លឿង ពាក់ស្លាកលេខ ព្រះសីហនុ ៣A-០៨៩៨ អ្នកបើកបរមិនស្គាល់ឈ្មោះ។ ចំណែកម៉ូតូរងគ្រោះម៉ាកហុងដាឌ្រីមសេ១២៥ ពណ៌ខ្មៅ ពាក់ស្លាកលេខ ភ្នំពេញ ១GH-០៣៤៧ ពណ៌លឿង បើកបរដោយ ១-ឈ្មោះ ហ៊ុន សៅរិទ្ធ ភេទប្រុស អាយុ២៤ឆ្នាំ នៅភូមិត្រពាំងខ្នា ឃុំពោធិ៍ម្រៀល ស្រុកបរសេដ្ឋ ខេត្តកំពង់ស្ពឺ មានប្រពន្ធនៅភូមិស្មិត ឃុំមានជ័យ ស្រុកឧដុង្គ ខេត្តកំពង់ស្ពឺ មានមួកសុវត្ថិភាព។
២-ឈ្មោះ ច័ន្ទ រស្មី ភេទប្រុស អាយុ១៨ឆ្នាំ នៅភូមិស្មិត ឃុំមានជ័យ មានមួកសុវត្ថិភាព។ ៣-ឈ្មោះ ថា រ៉េត ភេទប្រុស អាយុ១៨ឆ្នាំ នៅភូមិស្មិត ឃុំមានជ័យ។ ប្រភពព័ត៌មានពីសាក្សីនៅកន្លែងកើតហេតុ បានរៀបរាប់ប្រាប់ថា មុនពេលកើតហេតុ គេឃើញជនរងគ្រោះទាំង៣នាក់ ជិះម៉ូតូដឹកគ្នាយ៉ាងលឿន ដោយសង្ស័យស្រវឹងស្រា បើកជ្រែយានយន្តផ្សេងៗតាមដងផ្លូវ ទិសដៅពីកើតទៅលិច ដោយមានពាក់មួកសុវត្ថិភាពគ្រប់គ្នា។ លុះដល់កន្លែងកើតហេតុ ម៉ូតូបានជ្រុលចូលគន្លងផ្លូវម្ខាងទៀតនៅខាងឆ្វេងដៃ។ ស្របពេលនោះក៏មានរថយន្តបង្ក១គ្រឿងបើកបរពីលិចទៅកើត បញ្ច្រាសទិសមកដល់ដែរ ហើយម៉ូតូបានរេចង្កូតកៀររថយន្តនោះ បណ្តាលឲ្យដួលខ្ទាតជនរងគ្រោះទាំង៣នាក់ចូលក្រោមរថយន្ត បណ្តាលឲ្យកិនស្លាប់ភ្លាមៗ ចំណែកម៉ូតូខ្ទាតចេញក្រៅ ខូចខាតតិចតួច។
ប្រភពដដែលបន្តទៀតថា ក្រោយកិនមនុស្សស្លាប់ ជនបង្កព្យាយាមបើករថយន្ត រត់គេចខ្លួនពីកន្លែងកើតហេតុ ទើបកម្លាំងនគរបាលស្រុក សហការជាមួយសមត្ថកិច្ចស្រុកឧដុង្គ ឃាត់បាននៅឃុំវាលពង់ ស្រុកឧដុង្គ។ ចំពោះអត្តសញ្ញាណប័ណ្ណឈ្មោះ ម៉ី សៅរី ភេទប្រុស អាយុ៥២ឆ្នាំ គឺជារបស់ឪពុកជនរងគ្រោះ មិនស្ថិតនៅក្នុងហេតុការណ៍នោះទេ។
សពជនរងគ្រោះទាំង៣នាក់ ត្រូវសមត្ថកិច្ចជំនាញ បានប្រគល់ជូនសាច់ញាតិយកទៅធ្វើបុណ្យតាមប្រពៃណី។ ចំណែកវត្ថុតាង រថយន្ត និងម៉ូតូសមត្ថកិច្ច យកមករក្សាទុកនៅអធិការដ្ឋាន នគរបាលស្រុកបរសេដ្ឋចាត់ការតាមនីតិវិធី៕
ចែករំលែកព័តមាននេះ